Read Khoekhoegowab Galateǁîn 1 Bible Online

Galateǁîn 1 - Khoekhoegowab bible

Galateǁîn 1

¹Pauluta, apostelta, khoen xa tsî khoe-e xu hâ tama ta, tsî Jesub Xristub tsî ǁgûb Elob, ǁîba ǁō hâna xu ge ǂkhaiǂkhaiba xu hâ ta,

²tsî tita ǀkha hâ ǃgâsagu hoagu tsîge, Galatiab ǃnâ hâ ǀhaohâgu ǃoa:

³ǀKhomma ab hâǀkhā du, tsî ǂkhîba Elob ǁgûb tsî sada ǃKhūb Jesub Xristuba xu;

⁴ǁî-aitsama sada ǁoren ǃaroma ge māsenna, sadab nî orega nē hâ ǂkhaba ǃhūbaiba xu, Elob sada Îb di ǂâisa ǃoa;

⁵ǁîba ab ǂkhaisiba ūhâ ǀamosiba xu ǀamosib kōse! Amen.

⁶Buru ta ra, nētikō ǃhaese du ge Xristub, ǀkhommi ǃnâ sado ge ǂgaiba xu ǀkhara ǃgâiǂhôas ǃoa a dawaǃkhunikaisen ǃkhaisa;

⁷ǀkhara ǃgâiǂhôas hâ tama xawe; xawe gu ge ǀnîga hâ, sado ra are kaiga, tsî Xristub di ǃgâiǂhôasa ra dabaǃkhuni ǂgaoga.

⁸Xawe sige kas, ǀhomma xu ra hā ǀhomǃgāb kas ga sige gere aoǁnâba du ǃgâiǂhôasa xu ǀkhara-e ǂhôa du o, ab ǁîba ǀâxarexūhe hâ!

⁹ǀNai ge go aiǃâ mî khami ta nēsi ǁkhawa ra mî: Khoe-i ga sado ǃkhōǃoa du ge ǃgâiǂhôasa xu ǀkhara-e ǂhôao, a-i ǀâxarexūhe hâ!

¹⁰Khoena ta ǁnâi nēsi ra ǃhoaba? Eloba? Khoena ta nî ǃgâiǃgâisenba ǃkhaisa ôa-am ta ra? Khoena ta ga ganupe ǃgâiǃgâisenbao, o ta ge Xristub di ǃgā tama hâ.

¹¹O ta ra ǂanǂan du, ǃgâsado, tita xa gere aoǁnâhe ǃgâiǂhôas khoese ī tamasa;

¹²tita ǁîsa ǁkhāti khoe-e xu ǃkhōǃoa tama tsî ǁkhāti ǁkhāǁkhāsen tama xui-ao, xawe ta ge Jesub Xristub di ǂhaiǂhaisa xu ǁîsa ūhâ.

¹³ǁNâu du kom geo ti aibekam tanisens xa Jodeǁîsis ǃnâ, mati ta Elob di ǀhaohâba ǃnāǂamsase ǃgôaǃgon tsî gere hîǀhuru ǃkhaisa.

¹⁴Tsî mati ta Jodeǁîsis ǃnâ ǂguigu ti ǁhāga ge ǃnā ǃkhaisa ti ǃhaos ǃnâ, tsî mati ta ǁgûsi ǂnûiǂgādi ǂama ǃnāsase gere tau ǃkhaisa.

¹⁵Xawe Elob, tita ti îs di sorosa xu ǃkhōǂuibasen hâb, tsî tita ǁîb di ǀkhommi ǀkha ǂgai hâba-i ge ǃgâiba io,

¹⁶ǁîb Ôabab nî tita ǃnâ ǂhaiǂhai ǃkhaisa ǀūben ǃnâ ta nî ǃgâiǂhôas ǀkha aoǁnâ bise, o ta ge ǁnātimîsi ǁgans tsî ǀaob tsîra ǀkha ǀapeǀape tama;

¹⁷tsî ta ge ǁkhāti Jerusalems ǃoa ǃgû tama ǁnāgu, tita aiǃâ ge apostel igu ǃoa; xawe ta ge Arabiab ǃoa ǃgû, tsî ǁkhawa Damaskus ǃoa ge oa.

¹⁸ǁNās khaoǃgâ ta ge ǃnona kurigu khaoǃgâ Jerusalems ǃoa ge ǃgû, Petruba ta nî sarise, tsî ta ge disikoroǀa tsēde ǁîb tawa ge hâ;

¹⁹tsî ta ge ǀnî apostel-e mû tama ge hâ i, Jakobub, ǃKhūb di ǃgâsab ǀguiba.

²⁰Tsî sado ta ra xoaban, mû, Elob ao ta ǂhumi tama.

²¹ǁNās khaoǃgâ ta ge Siriab tsî Silisiab ǃhūkha ǃnâ ge sī;

²²tsî ta ge Judeab ǃnâ hâ Xristub di ǀhaohâga ge ǀū i;

²³ǁnâus ǀguisan ge hî hâ i: Aibe sada gere ǃgôaǃgonni, ǁîb ge nēsi ǁnā ǂgoms, ǁîsab gere hîkākāsa ra aoǁnâ ti.

²⁴On ge Eloba tita ǂama ge ǂkhaiǂkhai.