Read Khoekhoegowab Galateǁîn 2 Bible Online

Galateǁîn 2 - Khoekhoegowab bible

Galateǁîn 2

¹ǁNās khaoǃgâ ta ge ǁkhawa disihakaǀa kurigu khaoǃgâ Barnabab ǀkha Jerusalems ǃoa ge ǃgû, Titub ona ǃgû-ū tsî.

²Tsî ta ge ǂhaiǂhaisi-e xu ǃgû tsî ǀūben ǃnâ ta ra aoǁnâ ǃgâiǂhôasa ge ǁgui-aiǃâ gu, ǃgōsase ǁnā gu ǃgôasib ǃnâ hâ ga, mûǂan gu nîga, ise ta ga ǁause ǃgû tama i, tamas ka io ǁause ge ǃgû tama hâ i ǃkhaisa.

³Tsî Titub on, tita ǀkha ge hâ ib ge ǃgaokaisensa ǁgarihe tama ge hâ i, Grikeǁîb a xawe.

⁴Tsîs ge nēsa ge ī ǀkhuriǂgâ ge hâ i ǂkhaba ǃgâsagu ǃaroma, xōǀkhāba xu ge ǁgūǂgâgu, sige ǃnorasis, Xristub Jesub ǃnâ ge ūhâsa gu nî ǃkhēǃgâse, sige gu nî ǃgādīga;

⁵ǁîga ge ǀgui iri kōse xawe ǂgō tama ge i ǃnaga hâs ǀkha, ǃgâiǂhôas di amab nî sadu tawa hâhâse.

⁶Tsî ǃgôasib ǃnâ hâgu xasa, (tarebe gu ge aibe isa ta ǁae tama; Elob ge khoe-i ai-e ǃkhōǃoa tama hâ) ǃgôasib ǃnâ hâgu xasa ta xū-i xare-e ǁguiribahe tama hâ;

⁷xawe ǁnās ǃoa-ai, mûǂan gu geo, ǃgaohe taman di ǃgâiǂhôasa ta ǂgomǃgâbahe hâ ǃkhaisa, Petrub ge ǃgaohesan disa ǂgomǃgâbahe hâ is ǁkhās xase;

⁸(ǁnāb, Petrub ǀkha ǃgaohesan di apostelsis ǃnâ ǀgaisa ge ib kom tita on ǀkha ǀūben ǃnâ ge ǀgaisa io).

⁹Tsî tita māhe hâ ǀkhomma gu ge Jakobub tsî Kefab tsî Johaneb tsîgu ǂkhâǃnâgu ase ǃgôahe hâga mûǂano, o gu ge tita tsî Barnabab tsîkhoma amǀkhāb ǃommi ǀhûhâsib diba ge mā, sikhom nî ǀūben ǃnâ, tsî gu nî ǁîga ǃgaos ǃnâ sîsen ti;

¹⁰nēs ǀguis, ǀgâsan xa khom nî ǂâisa, ǁîsa ta ge ǁkhāti ǃnoesase gere dī.

¹¹Tsî Petrub ge Antioxias tawa sīo, o ta ge mûmûsase ge mâǃoa bi; ǂgōǀauheb nîsab ge anu i xui-ao.

¹²Aibe ǀnîgu Jakobub digu ge hās aiǃâb ge ǀūben ǀkha goro ǂû amaga; xawe hā gu geo, ob ge ǂgaedawasen tsî ge khaisen, ǃgaos dina ǃao tsî;

¹³tsîn ge ǁkhāti nau Jodeǁî ǂgomsana ǁîb ǀkha ge hîna, Barnabab tsîn ge ǁîn di hînaxasiba xu ǂgaebēhes kōse.

¹⁴Tsî mû ta geo, ǂhanusen ǃgâiǂhôas di amab ǃoa ǃgû tama ǃkhaisa, o ta ge hoan aiǃâ Petrub ǃoa ge mî: Sats ga, Jodeǁîts a hîa, ǀūbesi dommi ai ûio, tsîts ga Jodeǁî dommi ai ûi tama io, tarexats ǁnâi ǀūbena ra ǁgari Jodeǁîn khami ûisa?

¹⁵Sada ǂūsiba xu Jodeǁîda, tsî ǀūbena xu hâ ǁore-ao tamada xawe;

¹⁶tsî ǂan da a, khoe-i ǂhanub di sîsenga xu ǂhanu-ai kaihe tama ǃkhaisa tsî ǂgoms ǀguisa xu i ra ī ǃkhaisa, amaga da ge ǁkhāti Xristub Jesub ǃnâ ge ǂgom, Xristub ǃnâ ǂgomsa xu da nî ǂhanu-ai kaihese, tsî ǂhanub di sîsenga xu tama; ǂhanub di sîsenga xu i ǁgan-i xare-e ǂhanu-ai kaihe tide xui-ao.

¹⁷Tsî da ga sada, Xristuba xu nî ǂhanu-ai kaihe ǃkhaisa ra ôa-am da ǁkhāti ganupe ǁore-aose hōheo, ǁnâi Xristuba ǁoreb di ǃoabasabeba? Tātsē!

¹⁸Khôaǁnâ da gena da ga ǁkhawa omkhâio, o da kom ǃûǂamaose ra ǁgauseno;

¹⁹ǂhanub ǀkha ta ge tita ǂhanuba ge ǁōǁnâ xui-ao, Eloba ta nî ûibase.

²⁰Tita ge Xristub ǀkha ǃgâuhe hâ ta; o ta ge tita ǃaruǀî ûi tama, xaweb ra Xristuba tita ǃnâ ûi; o ta ge ǁgans ǃnâ ta nēsi ûi hâsa ǂgoms Elob Ôab dis ǃnâ ra ûi, tita ge ǀnam hâ ib, tsî ǁî-aitsama tita ǃaroma ge māsenna.

²¹Elob ǀkhomma ta ǁauǁau tama; ǂhanu-aisib ga ǂhanuba xu hâo, ob kom ga Xristuba ǁause ǁō hâo.