Read Khoekhoegowab Galateǁîn 3 Bible Online

Galateǁîn 3 - Khoekhoegowab bible

Galateǁîn 3

¹Okha ǁnâuǃāoǃnâ Galateǁîdo, tari-e kha sado ǃgaiǃgam hâ, amaba du ǁnâuǀnam tidese; sadu Jesub Xristuba sadu ǃnâb ge ǃgâuhe hâs ǁkhās xase ǁgaeǁgaemûǃnâhe hâdo?

²Nēs ǀguisa ta sadu xa ra ǂan ǂgao: Gagaba ǂhanub di sîsenga xu du ge ǃkhōǃoa bi tamas ka io ǂgoms di aoǁnâsa xu?

³Nētikōse du kha a ǁnâuǃāoǃnâ? Gagab ǀkha tsoatsoa hâse du kha ǁnâi ǁgans ǀkha ra ǀam?

⁴Nētikōna du kha ǁause ge tsâ? ǁAu i ga io!

⁵Tsî Gagaba sado ra māb tsî buruxana sadu ǃnâ ra sîsenna, ǂhanub di sîsenga xub ra ǁnāsa dī tamas ka io ǂgoms di aoǁnâsa xu?

⁶Abrahammi ge Eloba ǂgom, tsîb ge ǁîsa ǂhanu-aisise ǃgôabahe khami.

⁷O du ge ra mûǂan, ǂgomsa xu hân a Abrahammi ôa ǃkhaisa.

⁸Tsî xoas ge ge aimû, Elob nî ǀūbena ǂgomsa xu ǂhanu-ai kaisa; ǁnā-amagas ge Abrahamma ǃgâiǂhôasa ge aoǁnâba mîraǃâ: “Sats ǃnâ di ge ǁaedi hoade nî ǀkhaehe,” ti.

⁹Nētin ge ǂgomsa xu hâna ǂgomsa Abrahammi ǀkha ra ǀkhaehe.

¹⁰ǂHanub di sîsenga xun hâs kōsen ǀâxareb ǃnâ hâ xui-ao; xoamâihe hâ xui-ao: “ǀÂxarexūsa i ge mâ-i hoa-i, nē ǂkhanis ǂhanub dis ǃnâ xoahe hân hoan ǃnâ hâhâ tama-e, ǁîna i nî dīse.”

¹¹Tsî khoe-i xare-i ǂhanuba xu Elob aiǃâ ǂhanu-aikaihe tama ǃkhais ge a ǂhaisa; ǂhanu-ai-i ge ǂgomsa xu nîra ûi xui-ao.

¹²Ob ge ǂhanuba ǂgomsa xu hâ tama hâ, xawe ǁîna kara dī khoe-i ge ǁîna xu nîra ûi-e.

¹³Xristub ge ǂhanub di ǀâxareba xu ge ǁamaǂui da, sadab ge ǀâxare kaiba ǃnubai, xoamâihe hâ xui-ao: “ǀÂxarexūsa i ge mâ-i hoa-i, haib ai ǂgāhe hâ-e,” ti.

¹⁴Abrahammi di ǀkhaeb nî Xristub Jesub ǃnâ ǀūben ǃoa hāse, sada nî ǂgomsa xu Gagab di mîmâisa hōga.

¹⁵ǃGâsado, khoe ta ase ta ra ǃhoa: Khoe-i xare-i ge khoe-i xa ǀgaiǀgaihe hâ testamensa ǁauxūdī tama hâ, tsî i ge ǁkhāti xū-e ǀaro tama hâ.

¹⁶O di ge mîmâide Abrahammi tsî ǁîb di suriba ge mîbahe. Tsîb ge: “Tsî surigu,” ti mî tama, ǂguigu axase, xaweb ge ǀguib axase: “Tsî sa surib,” ti mî, ǁnāb ge Xristuba.

¹⁷O ta nēsa ra mî: ǁNā ǃgaeǀhaos, Elob xa aibe Xristub ai ge ǀgaiǀgaihes, ǁîs ge ega hakakaidisi ǃnonadisi kurigu ǁnās khaoǃgâ ge hā ǂhanuba xu ǀgaio kaihe tama hâ, mîmâisab nî ǁauǁause.

¹⁸ǀUmis ga ǂhanuba xu ǀkhīo, os ga ǃaruǀî mîmâisa xu ǀkhī tama hâ; xaweb kom Eloba ǁîsa Abrahamma mîmâisa xu ge ǀkhaeo.

¹⁹Mâs ǃoab kha ǂhanuba hâ? ǃÛǂamdi ǃaromab ge māǀarohe hâ, ǁnā surib, ǁîsa mîmâibahe hâb nî hās kōse, tsîb ge ǀhomǃgāgu xa mâba-aob di ǃomǁaeba xu ge ǂnûiǂgāhe.

²⁰Tsî mâba-ao-i ge ǀgui khoe-i di mâba-ao tama-e; xawe Elob ge a ǀgui.

²¹ǂHanuba kha Elob di mîmâidi ǃoagub hâ? Tātsē! ǂHanu-i ga māhe hâ, ûi-ûi ǁkhā-e, ob ga ǂhanu-aisiba amase ǂhanuba xu hâ i xui-ao;

²²xawes ge xoasa hoana ǁoreb ǃnâ ǃkhōǂgā hâ, mîmâis nî Jesub Xristub ǃnâ ǂgomsa xu ǂgomsana māhese.

²³Xawe ǂgoms di hās aiǃâ da ge ǂhanub ǃnâ ǃkhōsase ge sâuhe hâ i, tsî da ge ǂhaiǂhaihe nîra ǂgomsa sâubahe hâ i.

²⁴Nētib ge ǂhanuba sada ǂgōǀau-ao ge i Xristubǀî, ǂgomsa xu da nî ǂhanu-ai kaihese;

²⁵xawe ǂgoms ge hāsa xu da ǃaruǀî ǂgōǀau-aob ǃnâ mâ tama.

²⁶Hoadu ge a Elob ôa xui-ao, Xristub Jesub ǃnâ ǂgomsa xu;

²⁷Xristub ǃnâ du ǁāǁnâhe hâs kōse du Xristuba ǂgaeǂgā hâ amaga.

²⁸Nēs ǃnâ i ǀgora-e hâ tama hâ: Jodeǁî-i karao, Grikeǁî-i karao, ǃgā-i karao, ǃnorasa-i karao, ao-i karao, tara-i karao; sadu hoadu ge Xristub Jesub ǃnâ a ǀgui xui-ao.

²⁹Tsî Xristub di du kao, o du kom Abrahammi surido, tsî mîmâis ǃoa du kom ǀumi-aodo.