Read Khoekhoegowab Galateǁîn 4 Bible Online

Galateǁîn 4 - Khoekhoegowab bible

Galateǁîn 4

¹Tsî ta nēsa ra mî: ǀUmi-ao-i a ǀgôa hîa i ge ǃgā-e xu ǀgorahe tama hâ, xūn hoan di ǀhonkhoe i a xawe;

²tsî i ge kaikai-aogu tsî mûǂamaogu ǃnaga mâihe hâ, ǁgûb xa mîmâihe hâ ǁaeb kōse.

³ǁNās ǁkhās xase ǁkhāti sada, ǀgôada ge i ǃnubai da ge ǃhūbaib di tsoatsoa-ain ǃnâ ǃgādīhe ge hâ i;

⁴xawe ǁaeb ge ǀoao, ob ge Eloba ǁîb di Ôaba ge sî, tara-e xu ge ǃnaeb, tsî ǂhanub ǃnaga ge dīheba,

⁵ǁnān ǂhanub ǃnaga hânab nî ǁamaǂuise, sada nî ǀgôasisa hōga.

⁶Tsî ǀgôa du a amagab ge Eloba ǁîb Ôab di Gagaba sadu ǂgaogu ǃnâ ge sî, ǁîb Abba ti îtse, ti ra ǂgaiba.

⁷Ots ge ǃaruǀî ǃgā tama hâ, ots ge a ǀgôa; tsî ǀgôats kao, ots ge ǁkhāti a Elob di ǀumi-ao Xristuba xu.

⁸Tsî Eloba du ge ǂan tama hâ i ǃnubai du ge ǁnāgu ǂūsiba xu elo tamaga gere ǃoaba;

⁹xawe nēsi, Eloba du a ǂan ǃnubai, ā nēs ǃgâ-ai kais: Elob xa du mûǂanhe hâ ǃnubai, mati du kha ǁkhawa ra ǃhoba ǁnā ǂkhabusa tsî ǁkhoatsama tsoatsoa-ain, ǀasa-ame du ǁkhawa ra sîsenba ǂgaon ǃoa?

¹⁰Tsēde du ra tsēdī, tsî ǁkhâgu, tsî ǁaegu, tsî kurigu tsîna.

¹¹ǃAoba du ta ra, ǀnîsi ta nî ǁause sadu tawa sîsen hâ ǃkhaisa.

¹²Tita khami ī re; sadu khami ta ǁkhāti ī xuige. ǃGâsado, ǂgan du ta ra; tsū xū-e du kom tita dī tamao.

¹³Tsî du ge a ǂan, ǁgans di ǂkhabusasib ǃnâ ta ǂguro ǃnāsa ǃgâiǂhôasa gere aoǁnâba dusa;

¹⁴tsî du ge ǃharaxū tama tsî ǃkhāǃkhā tama ge i ti ǃâitsâb, ǁgans ǃnâ ge hāba teba; xawe du ge Elob di ǀhomǃgā-i ase, ā, Xristub Jesub ase ge ǃkhōǃoa te.

¹⁵Tarebe ǃgâiǃōsi-e du ǁnāǃnubai ge ūhâ i? ǃKhō-amba du ta ra, īǁkhā i ga io, o du ga sadu mûde ǁhoroǂui tsî du ga ǁîde tita mā hâ.

¹⁶Sadu khākhoe kai ta ge, amaba ta ge mîba dus ǀkha?

¹⁷Sadu ǂama gu ra tau ǃgâi dommi ai tama i, tsî gu ge sado ǂgaebē ǂgao hâ, î du ga ǁîgu ǃaroma tau ti.

¹⁸ǁGūbasens ge a ǃgâi, hugaǀgui i ga ǃgâi xū-i ǃaroma īo, tsî sadu ǀkha ta hâ ǁaeb ǀguib ai tama.

¹⁹Ti ôarodo, ǁkhawa ta tsûb ǀkha ra ǁorado, Xristub nî sadu ǃnâ īsi-e hōs kōse!

²⁰O ta ǂgao hâ, nēsi sadu tawa hâ tsî ta ga ti domma ǀkharaǀkhara ǁkhā; sadu ǂama ta ra îganǀgē xui-ao.

²¹Mîba te, sadu ǂhanub ǃnaga hâ ǂgao hâdo, ǂhanuba du kha ǁnâu tama hâ?

²²Xoamâihe hâ xui-ao, Abrahammi ge ǀgam ǀgôakha ūhâ isa, ǀguiba ǃgāsa xu, tsî nauba ǃnorasasa xu.

²³Tsîb ge ǃgāsa xu hâba ǁgans ǃoa ge ǃnae; tsî naub ǃnorasasa xu hâb ge mîmâisa xu ge ǃnae.

²⁴Nē xūn ge ǂkhōs xase ī; nē tarara ge ǀgam ǃgaeǀhaora xui-ao: ǀGuis Sinaiǃhommi dis, ǃgāsis ǃaroma ra ǀgôana hōs, ǁîs ge Hagarsa.

²⁵Hagars ge Arabiab ǃnâ ǁgoe Sinaiǃhomma, tsîs ge nēsi hâ Jerusalems ǀkha ra ǀgui, tsî ǀgôan âs ǀkha ra ǃoabasa;

²⁶xawe ǁnā Jerusalems, ǀgapise hâs ge a ǃnorasa, ǁîs ge a sada hoada di î,

²⁷xoamâihe hā xui-ao: “Dâ, sas ǀgamǀkhā tamas, sas ǁora tamas; dâxase ǂgai, sas, ǁoratsû-e tsâ tamas; ǃū-aise hâs di ôan nî aoba ūhâs din xa ǂgui xuige.”

²⁸O da ge sada, ǃgâsado, Isaki xase a mîmâis di ôa.

²⁹Tsî ǁnāǃnubaib ǁgans ǃoa ge ǃnaeba Gagab ǃoa ge ǃnaeba gere ǃgôaǃgon khami, ǁnās ǁkhās xase i ge ǁkhāti nēsi ī.

³⁰Xawe xoasa matis ra mî? “ǂHāǂui ǃgāsa ǁîs di ôab ǀkha; ǃgās di ôab ge ǃnorasas di ôab ǀkha tātsē ǀumi tide xuige,” ti.

³¹ǁNā-amaga, ǃgâsado, ǃgās di ôa tamada, tsî da a ǃnorasas di.