Read Khoekhoegowab Galateǁîn 5 Bible Online

Galateǁîn 5 - Khoekhoegowab bible

Galateǁîn 5

¹ǁNā ǃnorasasis, ǁîs ǀkhab Xristuba sada ǃnoraǃnora hâs ǃnâ mâhō re, î du tā ǁkhawa ǃgāsis di ǃnaoba ǁgui-aikaisen.

²Mû, tita Pauluta ra mîba du: ǃGaokaisen du kao, ob Xristuba sado xū-i xare-e harebe tide;

³tsî ta ǁkhawa mâ khoe-i hoa-i, ǃgaokaisen ra-e ra ǀhûǀguitimîba, ǂhanub hoaba dīsa i surude hâ ǃkhaisa.

⁴Xristuba xu du xoresen hâ, ǂhanuba xu du nî ǂhanu-ai kaihe ǃkhaisa ra ǂâido; ǀkhomma xu du ge ǁnāǁgôa;

⁵sada Gagab ǃnâ ǂgomsa xu ǂhanu-aisib di ǃâubasensa ra ǁkhore xui-ao.

⁶Xristub Jesub ǃnâ ra kom ǃgaos karao, aikhōb karao xū-i xare-e harebe tamao, xawe ǂgoms, ǀnammi ǃnâ a sîsenxasa.

⁷ǃGâise du gere ǃgû; tari-e sado ge ǂhani, o du amaba ǁnâuǀnam tama hâ?

⁸Nē ǃhoagaobakaisens ge ǁnāb, sado ge ǂgaiba xu hâ tama hâ.

⁹ǂKhari ǀkhuruǀkhuruperero-i kom ǀâpereb hoaba ra ǀkhuruǀkhuruo.

¹⁰Tita ge sadu ai ǃKhūb ǃnâ ra ǂgomaiǂnûi, ǀkhara ǂâisa du hō tide ǃkhaisa; xawe sado ra gongonǃnâ-i ge ǁî-i ǀgoraǃgâsa nîra tani-e, tari-i kas hoasa.

¹¹Tsî tita, ǃgâsado, ganupe ta ga ǃgaosa aoǁnâo, tarexa ta kha ganupe ra ǃgôaǃgonhe? Os kom ǃgâuhaib di ǁgonǁgonǂgaosa ǁauǁauhe hâo.

¹²Î gu ga ǁkhāti ǃgaoǁnâhe, sado ra hîǀhuruga!

¹³Sadu ge ǃnorasasis ǃoa ǂgaihe hâ, ǃgâsado; nēs ǀguisa ǂanbasen, î du ǃnorasasisa tā ǁgans di xūse ūhâ, î du ǀnammi ǃnâ ǃoabagu re;

¹⁴ǂhanub hoab ge ǀgui mîs ǀguis ǃnâ ra ǀoa xui-ao, nēs ǃnâ: “Sa ǀgūkhoebats ge sats ǁkhāts khami nî ǀnam.”

¹⁵Xawe nâgu tsî du ga ōguo, ǂanbasen, î du tā nē-e nau-e hapu.

¹⁶O ta ra mî: Gagas ǃnâ tanisen re, î du ǁgans di turaga tā dīǀoaǀoa;

¹⁷ǁgans ra Gagas ǃoagu tura tsî Gagasa ǁgans ǃoagu xuige; ǁîra ge ra mâǃoagu, dī ǂgao du hâna du dī tidega.

¹⁸Xawe Gagab xa du kara ǂgaeǂguiheo, o du kom ǂhanub ǃnaga hâ tamao.

¹⁹Tsî ǂhaisa gu ge a ǁgans di sîsenga, ǁîgu ge: ǃGamekhôas, ǀaib, ǀurixasib, ǂūǁoasib,

²⁰ǁgôatsuiǁgoaǃoabas, ǃgaidīb, ǃhuigub, ǂnoagub, tauxasib, ǁaib, sunuxasib, ǁîǁâsens, ǀgorasens,

²¹surib, ǃgams, ǃkhariǃkhōb, ōb tsî ǀnîn nēti īna; ǁîn xa ta ra aimîba du, ǀnai ta ge aimîba khami, nēna ra dīn Elob gaosiba ǀumi tide ǃkhaisa.

²²Xawe Gagab di ǂûb ge: ǀNammi, ǃgâiaǂgaob, ǂkhîb, ǃnūǃnâxasib, khoexasib, ǃgâixasib, ǂgoms, tsamtsiǃnâsib tsî ǀgausib tsîna;

²³nēti īn ǃoagub ge ǂhanuba hâ tama hâ;

²⁴tsî Xristub Jesub din ge ǁgansa ge ǃgâu ǂkhaba ǂūgu tsî turagu tsîgu ǀkha.

²⁵Tsî Gagab ǃnâ da kara ûio, a da ǁkhāti Gagab ǃoa tanisen.

²⁶Î da tā ǁau ǃgôasiba ôa-am, nē-e nau-e ra ǂoeǂoeǃâ, nē-e nau-e ra suriǃâ.