Read Khoekhoegowab Efeseǁîn 1 Bible Online

Efeseǁîn 1 - Khoekhoegowab bible

Efeseǁîn 1

¹Pauluta, Jesub Xristub di apostelta, Elob di ǂâisa xu, Efesus ǃnâ hâ ǃanun, tsî Xristub Jesub ǃnâ ǂgom hân ǃoa:

²ǀKhomma ab hâǀkhā du, tsî ǂkhîba Elob sada îba xu tsî ǃKhūb Jesub Xristuba xu!

³Ab Eloba karehe sada ǃKhūb Jesub Xristub Îb, sada gagasi ǀkhaexūn hoan ǀkha ge ǀkhaeba ǀhommi din ǀkha Xristub ǃnâ.

⁴Sadab ge ǁîb ǃnâ ǃhūbaib di ǃgaoǃgaohes aiǃâ ǃkhōǂuibasen khami, ǃanu tsî da nî ūose īse ǁîb aiǃâ ǀnammi ǃnâ;

⁵tsîb ge sada ge aiǂnûiǂgā, ǁîb ǂûb di ǀgôase da nî Jesub Xristub ǃnâ ǃkhōǃoahese, ǁîb ǂâis di ǃgâiǃgâibasensa ǃoa;

⁶ǁîb ǂkhaisa ǀkhommi nî karehese, ǁîb ǀkhab ge sada ǀkhomxaǂgaoba ǀnamǀnamsa ǀGôab âb ǃnâ;

⁷ǁîb ǃnâ da oresa ūhâ ǀaob âba xu: ǁOren di ǀûbasa, ǁîb ǀkhommi di ǃkhūsib ǃoa,

⁸ǃnāǂamsase sada ǂama ge hāba gā-aisib tsî ǁnâuǃāb hoab ǃnâ;

⁹sada ǂanǂan hâǃâ ǂganǃgâsib ǁîb ǂâis diba, ǁîb di ǃgâiǃgâibasensa ǃoa, ǁîb ǂûb ǃnâb ge ǂâibasensa,

¹⁰ǁaegu ǀoasib diga ǂhomisa ǃoa xūn hoanab nî ǀgui danab ǃnâ ǃkhōǀhaose: Xristub ǃnâ, ǀhommi ǃnâ hân kas, ǃhūbaib ai hân kas hoasa.

¹¹ǁÎb ǃnâ da ge ǁkhāti ǀumixū kaihe, sada aiǂnûiǂgāhe hâda, ǁnāb, xūn hoana ǁîb ǂâis di ǀapeǀapes ǃoa ra dīb di ǂâibasensa ǃoa;

¹²ǁîb ǂkhaisib di koas ǃoa da nî īse, sada Xristub ai ge ǂgomaiǂnûida.

¹³ǁÎb ǃnâ du ge ǁkhāti sado hâ, mîs amab disa du ge ǁnâus khaoǃgâ, sadu ǃgâiǃōsib di ǃgâiǂhôasa; ǁîb ǃnâ du ge ǁkhāti ǂgom du ges khaoǃgâ ge ǀgaiǀgaihe ǃAnu Gagab mîmâis dib ǀkha;

¹⁴ǁîb ge mâiǁkhaeb sada ǀumis diba, ǁîb dinab nî orese, ǁîb di ǂkhaisib nî koahese.

¹⁵ǁNā-amaga sadu ǂgoms, ǃKhūb Jesub ǃnâ du ūhâs xa ta ge ǁnâuo, tsî ǃanun hoan ǃoa du ūhâ ǀnammi xa,

¹⁶o ta ǀû tama hâ, sado gangansa, tsî ta ti ǀgoredi ǃnâ sadu xa ra ǂâi:

¹⁷Ab Elob sada ǃKhūb Jesub Xristub dib, ǁGûb ǂkhaisib diba sado mā: Gagab gā-aisib dib tsî ǂhaiǂhaisib diba, ǁîba du nî ǂanse,

¹⁸îb sadu ǁnâuǃāb di mûde ǃnâǃnâ, mûǂan du nîse, mâs a ǃâubasens ǁîb ǂgais disa, tsî mâb a ǂkhaisa ǁui ǁîb ǀumis dibasa ǃanun ǃnâ;

¹⁹tsî mâb a ǃnāǂamsa kaisi ǁîb ǀgaib dibasa sada ǂgom hâda tawa, ǁîb ǀgaisa ǁkhāsib di sîsenǂuisa ǃoa,

²⁰ǁîb ǀkhab ge Xristub ǃnâ ge sîsen, ǁîbab ge ǁō hâna xu a ǂkhaiǂkhai ǃnubai; tsîb ge ǁîb amǀkhāb ǁôab ai ǀhommi ǃnâ ge ǂnûi bi:

²¹Kaise ǀgapise ǂamkhoen hoan tsî ǀgaib hoab tsî ǁkhāsib hoab tsî gaosis hoas ǂamai, tsî ǀon-i hoa-i ǂamai nē ǃhūbaib ǃnâ ǀgui tama xawe, ǃgoaxab ǃnâs ona.

²²Tsîb ge xūn hoana ǁîb di ǂaira ǃnaga ge ǁgui; tsîb ge ǀhaohâb danase ge mâi bi xūn hoan ǂamai;

²³ǁnāb ge a ǁîb di soro, ǁnā ǀoasasib âb, hoan ǃnâ hoana ra ǀoaǀoaba.