Read Khoekhoegowab Efeseǁîn 2 Bible Online

Efeseǁîn 2 - Khoekhoegowab bible

Efeseǁîn 2

¹Tsîb ge ǁkhāti sado ge ûi-ûi, ǃûǂamdi tsî ǁoren tsîn ǃnâ du ǁō hâ hîa,

²ǁîn ǃnâ du aibe gere ûina nē hâ ǃhūbaib di īsiba ǃoa, ǁnā ǂamsab, ǂoab ǃnâ ra gaob di dommi ǃoa, ǁnā gagab, nēsi ǁnâuǁoasib di ôan ǃnâ ra sîsenni ǃoa.

³ǁÎn ǃnâ da ge ǁkhāti sada hoada aibe gere ûina sada ǁgans di turagu ǃnâ, ǁgans tsî ǂâidi tsîn di ǂâisa dī tsî; o da ge ǂūsiba xu ǁaib di ôa ge i naun ǁkhān khami;

⁴xawe Elob, ǀkhommi xa ǃkhū hâb ǁîb di kai ǀnammi, ǀnamū dab geba xu,

⁵ǃûǂamdi ǃnâ da ǁō hâ hîa ǁkhāti Xristub ǀkha ge ûi-ûi da, (ǀkhomma xu du kom ge ǃgâiǃō kaiheo),

⁶tsîb ge ǂkhaiǂkhaiǀhao da, tsîb ge ǀhommi ǃnâ ǂnûǀhao kai da Xristub Jesub ǃnâ;

⁷ǃgoaxa ǁaegu ǃnâb nî ǁgause ǃnāǂamsa ǁuib ǀkhommi âb diba, ǁnā ǃgâisib, Xristub Jesub ǃnâ ge sada ǂama hāba xu.

⁸ǀKhomma xu du ge ǃgâiǃō kaihe ǂgomsa xu xui-ao; tsîs ge ǁîsa sado xu ī tama; Elob di mās komo;

⁹sîsenga xu tama, khoe-i koasen tidega.

¹⁰ǁÎb kurusabeda komo, Xristub Jesub ǃnâ ǃgâi sîsengu ǃoa kuruhe hâda, ǁîgu ǃoab ge Eloba aiǂhomi daga, ǁîgu ǃnâ da nî ǃgûse.

¹¹ǁNā-amaga ǂâiǂâisen re, sadu aibe ǁgans ǃnâ ǀūbe ge i tsî ǃgaohesa ti ra ǂgaihen xa ǃgaohesa taman ase gere ǂgaihedo, ǁnā ǃgaos, ǃommi ǀkha ǁgans ai ra dīhesa;

¹²ǁnā ǁaeb ai du ge Xristub ose ge hâ i, Israeli ǁgâuǁîsisa ǀū-ai hâse, tsî mîmâidi di ǃgaeǀhaode ǃhaokhoese ībase, ǃâubasen-i xare-e ūhâ tamase tsî Elob ose ǃhūbaib ai hâse.

¹³Xawe nēsi Xristub Jesub ǃnâ du ge sadu, aibe ge ǃnū ido a ǀgū Xristub di ǀaoba xu.

¹⁴ǁÎb a sada di ǂkhî xui-ao, ǁîb ǀgamna ge ǀgui kaiba; tsî ǀgora ra ǂnubiǂgoaba ge khôaǁnâba;

¹⁵tsîb ge ǃhuigusa ǁîb di ǁgans ǃnâ ge hîkākā, ǁnā ǂhanub mîmādi tsî ǂnûiǂgādi dibab ge dīǁnâo, ǁnā ǀgamnab nî ǁîb ǂûb ǃnâ ǀgui ǀasa khoese kuruga, ǂkhîba dī tsî;

¹⁶tsîb nî ǁnā ǀgamna ǀgui soros ǃnâ Elob ǀkha ǂkhîbagu kaise ǃgâuhaiba xu, ǃhuigusa ǁîb ai ǃgam tsî.

¹⁷Tsî hā tsîb ge ǃgâiǂhôasa xu ǂkhîba gere aoǁnâba sadu ǃnū ge idu, tsî ǁîn ǀgūse ge hâ in tsîna;

¹⁸ǁîb ǃnân ge ǁî ǀgamn hoana ǀgui Gagaba xu ǁGûb tawa sīs ǁkhāsiba ūhâ xui-ao.

¹⁹O du ge ǃaruǀî ǃhaokhoe tama tsî ǁaerob ǀguib ǁanǂgā-ao tama, xawe du ge a ǃanun di ǀhaoǁgâuǁî, tsî du ge a Elob ommi di,

²⁰ǃgaoǃgaos apostelgu tsî kēbo-aogu tsîgu dis ai omhe hâdo, ǁîgu di ǁhôaǀuib ge Xristub Jesuba;

²¹ǁîb aib ge ommi hoaragaba ǃkhōǁaehe hâse ra ǀomkhâi, ǃKhūb ǃnâ ǃanu tempeli axase;

²²ǁîb ai du ge ǁkhāti sado ǀhûpe ra omkhâihe Elob di ǁanǃkhaise Gagab ǃnâ.