Read Khoekhoegowab Efeseǁîn 3 Bible Online

Efeseǁîn 3 - Khoekhoegowab bible

Efeseǁîn 3

¹ǁNā-amaga ta ge tita Pauluta a Xristub Jesub di ǃkhōsabe sadu ǀūbedu ǃaroma.

²ǁNâu du ga hâo ǁnā ǃoabas Elob ǀkhommi dis, sadu ǃaroma ta ge māhes xa:

³ǂHaiǂhais ǃnâb ge tita nē ǂganǃgâsiba ǂanǂansa, aibe ta ge ǀoro mîdi ǀkha xoa khami;

⁴ǁîsa xu du, khomai du kao, a mûǂan ǁkhā ti ǂansa Xristub di ǂganǃgâsib ǃnâ;

⁵aibekam ǁaegu ǃnâ khoen ôana ǂanǂanhe tama ge hâ ib, nēsisab ǁîb di ǃanu apostelgu tsî kēbo-aogu tsîga Gagaba xu ǂhaiǂhaibahe hâ khami:

⁶ǀŪben a Xristub Jesub ǃnâ ǀhaoǀumi-ao, tsî ǁkhā soros di, tsî mîmâis âb di amǃnâxa-ao ǃkhaisa, ǃgâiǂhôasa xu.

⁷ǁÎ ǃgâiǂhôas di ǃoabasabe ta ge tita ǁnā hōs Elob ǀkhommi dis, ǁîb ǀgaib di sîsenǂuisa xu ta ge māhesa ǃoa.

⁸Tita ǃanun hoan xa ǂkhari ta ge nē ǀkhomma ge māhe, ǀūben ǃnâ ta nî ǃgâiǂhôasa xu ôaǃnâheǁoasa ǃkhūsib Xristub diba aoǁnâse;

⁹tsî ta nî hoana ǃnâǃnâbase, mâs a ǂganǃgâsib di ǀape ǃkhaisa, ǀamo ǁaega xu Elob, xūn hoana Jesub Xristuba xu ge kurub ǃnâ ǂganǃgâsase ge hâ isa;

¹⁰ǀhaohâb tawab nî nēsi ǃhonarisa gā-aisib Elob diba ǀhommi di ǂamsigu tsî ǀgaigu tsîga ǂanǂanhese;

¹¹ǁnā ǀamo ǂâibasens, Xristub Jesub sada ǃKhūb ǃnâb ge dīs ǃoa;

¹²ǁîb ǃnâ da ǁkhoaǂgaosib tsî mûmâinǃgâs ǁîb tawa sīs disa ūhâba, ǁîb ǃnâ ǂgomsa xu.

¹³ǁNā-amaga ta ra ǀkhoma, ti tsūǀkhāgu, sadu ǃaroma ra hāǂam te gu, sadu di ǂkhaisise īgu ǃnâ du ǂkhabuǂâi kaihe tide ǃkhaisa.

¹⁴ǁNā ǃkhais ǃaroma ta ti ǁgoara ra ǃhon ǁGûb sada ǃKhūb Jesub Xristub dib aiǃâ;

¹⁵ǁîba xus mâ ǃhaoǃnās hoasa ǀonsa ra ǃkhōǃoaba, ǀhommi ǃnâs karao, ǃhūbaib ais karao,

¹⁶sadob nî ǀgaiba māse ǁîb ǂkhaisib di ǃkhūsib ǃoa, ǃnākhoesib ǃnâ du nî ǀgaiga Gagab âba xu;

¹⁷Xristub nî ǂgomsa xu sadu ǂgaogu ǃnâ ǁanse, tsî du nî ǀnammi ǃnâ ǁaposase ǃnomaǃkhō hâse tsî ǃgaoǃgaohe hâse hâga;

¹⁸ǃanun hoan ǀkha du nî ǃkhā ǁkhāse, mâb a ǂhaba tsî mâb a gaxu, tsî mâb a ǃgam tsî mâb a ǀgapi ǃkhaisa;

¹⁹tsî du nî mûǂanse ǂansa ra īǂam ǀnammi Xristub diba, mâ ǀoasib Elob dib hoab ǀkha du nî ǀoaǀoahese.

²⁰Tsî ǁnāb, sada ra ǂgan tsî ǁnâuǃān hoana ǃnāǂamsase a dī ǁkhāb, sada ǃnâ ra sîsen ǀgaib âb ǃoa,

²¹ab ǂkhaisiba ūhâ ǀhaohâb ǃnâ, Xristub Jesub ǃnâ hâba, ǃhaodi hoadi ǃnâ, ǀamosib hoab kōse! Amen.