Read Khoekhoegowab Efeseǁîn 4 Bible Online

Efeseǁîn 4 - Khoekhoegowab bible

Efeseǁîn 4

¹O ta ra ǁnama du, tita ǃKhūb ǃnâ a ǃkhōsabe ta, ǂgai-ūhe du ge ǂgaisa anuse du nî tanisensa,

²ǃgamǃgamsens hoas tsî tsamtsiǃnâsib hoab ǀkha, ǃnūǃnâxasib ǀkha ǀnammi ǃnâ tanigu re;

³î du ǁgū, Gagab di ǀguiǂâixasiba ǃkhōǀgaipesa ǂkhîb di ǃgaeǁaresa xu.

⁴ǀGui soros ge a, tsî ǀgui Gagab, ǀgui ǃâubasens sadu ǂgais dis ǃoa du ge ǂgaihes ǁkhās khami;

⁵ǀgui ǃKhūb, ǀgui ǂgoms, ǀgui ǁāǁnâs;

⁶ǀgui Elob tsî ǁgûb hoada dib, sadu hoadu ǂamai hâb, tsî sadu hoado xu hâb, tsî sadu hoadu ǃnâ hâba.

⁷Tsî mâ-i sada di-i hoa-i ge ǀkhomma ge māhe Xristub mās di ǀnōba ǃoa;

⁸ǁnā-amagab ra mî: ǀGapiseb ǃoab ge ǃapao, ob ge ǃkhōsana ǃkhōhe hâse ǃgû-ū, tsî khoena māde ge mā.

⁹Tsî nēs: Tsîb ge ǃapa, tisa taresa, aibeb ga ǁkhāti ǁgôa tama io hoan xa ǃgam ǃâdi ǃhūb didi ǃoa?

¹⁰Tsî ǁgôa geb ge ǁnāb ǁkhāb, ǀhomgu hoagu ǂamai ge ǃapaba, hoanab nî ǀoaǀoase.

¹¹Tsîb ge ǀnîga apostelse ge mâi, tsî ǀnîga kēbo-aose, tsî ǀnîga ǃgâiǂhôa-aose, tsî ǀnîga ǃûi-aose tsî ǁkhāǁkhā-aose;

¹²ǃanun nî dīǀoaǀoahese ǃoabas di sîsenni ǃoa, Xristub soros di ǂnubikhâihesa ǃoa;

¹³hoada nî ǂgoms di ǀguiǃnâxasib tsî ǂans Elob Ôab dis tawa sīs kōse, tsî kaikhoeb, Xristub di ǀoa hâ ǁkhāsiba ūhâb ǀkha da nî ǀguiti-īs kōse;

¹⁴ǃaruǀî da ǀgôarose ī tidese tsî ǁkhāǁkhā-ai-i hoa-i di ǂoab xa da ǃgommahe tsî doeǁgamahe tidese, khoen di gāxaǃnâsiba xu, hînaxasiba xu, gāxaǃnâsisen nî ǁhapu kai dase;

¹⁵î da ǀnammi ǃnâ ama-ai, î da hoa xūn ǃnâ ǀomkhâi ǁîb ǃnâ, ǁnāb ge a dana: Xristub ǂûba;

¹⁶ǁîba xus ge soros hoasa, uniǁaedi hoadi, hîa ra ǃoabagude xu ǃkhōǁaehe tsî ǃgaeǀhaohe hâse soros di ǀomkhâisa ra dītoa, ǁnā sîsenǂui-i mâ uniǁaes hoas di-i ǃoa ǁîs di ǀgaus ǃnâ, ǁîs ǂûs di ǂnubikhâisens ǃoa ǀnammi ǃnâ.

¹⁷O ta nēsa ra mî tsî ǃKhūb ǃnâ ra ǃkhō-am, ǃaruǀî du tanisen tide ǃkhaisa, nau ǀūben ra ǁîn di ǁau ǂâis ǃnâ tanisen khami,

¹⁸ǁnâuǃāb ân ǃnâ ǃkhae hân, Eloba xu hâ ûiba ǃhaokhoese īban, ǀūsib ǁîn ǃnâ hâba xu, ǁîn ǂgaob di karokarosens ǃaroma,

¹⁹ǁîn karokarosensa xu ǁî-aitsama ǁgaiǁgaisana ge māǁnâsenn, ǂguiǃnâgu ǃanuoǃnâ dīgan nî turaxase dīse.

²⁰Xawe du ge sado Xristuba ǁnāti ǁkhāǁkhāsen tama hâ;

²¹ǁîba du ga ǁnâu, tsî ǁîb ǃnâ ǁkhāǁkhāheo, Jesub ǃnâb amaba hâ khami:

²²ǁGuiǁnâ du nîga aibekam tanisens ǃoa ǀoro khoeb, ǂgaeǂhapu ra turagu xa ra ǁgaoǁgaosenna;

²³tsî du nî ǀasakaisenga sadu ǂâis di gagas ǃnâ;

²⁴tsî du nî anaga ǀasa khoeb, Elob ǃoa kuruhe hâba ama ǂhanu-aisib tsî ǃanusib ǃnâ.

²⁵ǁNā-amaga ǂhumiba ǁguiǁnâ, î du amaba ǃhoa mâ-i hoa-e ǁî-i di ǀgūkhoe-i ǀkha; uniǁaebagu da a xuige.

²⁶ǁAixa, î xawe tā ǁore; as soresa sadu ǁaixasib hâ hîa tā ǂgâ.

²⁷Î du ǁgâuaba tā ǃkhai-e mā.

²⁸ǃNari ge-e, a-i ǃaruǀî tā ǃnari, î-i ǃomkha ǀkha ǃgâi xū-e sîsen, ǂhâsib ǃnâ hâ-e i nî au ǁkhāse.

²⁹Î du ǀurisa mî-i xare-e sadu amsa xu tā ǂoa kai; î du ǃgâi mî-i ǂnubikhâigusa ǃoa ǂhâbasa-e ǂoa kai, ǁnâu ran nî ǀkhomma hōse.

³⁰Î du Elob di ǃAnu Gagaba tā ǃoaǃoa, ǁîb ǀkha du ǂganamǀgaiǀgaihe hâba, ores di tsēs kōse.

³¹Hoa au-ausens, tsî ǁaixasib, tsî ǁaib tsî ǃaugus, tsî ǃkhāǃkhāgus tsîna, an sado xu bē ǂkhabasib hoab ǀkha.

³²Î du khoexagu tsî ǀkhomxagu, î du ǀûbagu, Elob ge ǁkhāti sado Xristub ǃnâ ǀûbas ǁkhās khami.