Read Khoekhoegowab Efeseǁîn 5 Bible Online

Efeseǁîn 5 - Khoekhoegowab bible

Efeseǁîn 5

¹Î du Elob di ǁgaeǁgae-ao ǀnamǀnamsa ǀgôan axase.

²Î du ǀnammi ǃnâ tanisen, Xristub ge ǁkhāti sada ǀnam, tsî ǁî-aitsama sada ǃaroma ǀkhaese tsî ǁguibase Eloba māsen khami ǃgâi ǁamab ase.

³Xawe ǀaib tsî mâ ǃanuoǃnâsib hoab tsî xūǃgunuxasib tsîna an sadu ǃnâ tā ǂgaihe, ǃanuna i a anu khami;

⁴tsî ǁkhāti taotaosa xūn, tsî ǁaugowab, tsî ǀnoremî-ain ǁîna anu tamana an tā ǂgaihe; î du nēn di ǃās ai gangansa dī;

⁵nēsa du nî ǂan xuige, ǀai-ao-i karao, ǃanuoǃnâ-i karao, xūǃgunuxa-i, ǁî-i ǁgôatsuiǁgoaǃoaba-ao-i karao i Xristub tsî Elob di gaosib ǃnâ ǀumi-amǃnâ-e ūhâ tama hâ ǃkhaisa.

⁶A-i khoe-i xare-e sado tā ǂgaeǂhapu ǁau mîdi ǀkha, nēn ǃaromab Elob ǁaiba ǁnâuoǃnâsib di ôan ǂama ra hā xuige.

⁷ǁNā-amaga tā ǁîn ǀkha ǀgui.

⁸Aibe du ge ǃkhaena i, xawe du ge nēsi a ǃnâ ǃKhūb ǃnâ; xuige ǃnâb di ôase tanisen re.

⁹Gagab di ǂûb ge ǃgâisib hoab, tsî ǂhanu-aisib hoab, tsî amab hoab ǃnâ hâ.

¹⁰Î du ǃâitsâ, mâ xū-i a ǃKhūba ǃgâibasa.

¹¹Î du ǂûtanioǃnâ sîsengu ǃkhaenab digu ǃnâ tā amǃnâxa; î du ǁîga ǁnās ǃgâ-ai ǂgōǀau.

¹²ǂGanǃgâsib ǃnân ra dī xūn xa ǃhoas xawes a taotaosa xuige.

¹³Tsîn ge nē xūn hoana ra ǂhai, ǃnâb xan ra ǂgōǀauheo; ǂhai kai ra-i hoa-i a ǃnâ xui-ao.

¹⁴ǁNā-amagab ra mî: “ǃNoaǂkhai sats ǁom hâtse, îts ǁō hâna xu khâi, ob ge Xristuba nîra ǃnâǃnâ tsi.”

¹⁵ǂAnbasen ǁnâi re, mati du nî tanisen ǃkhaisa, gârese tama xawe gā-aise;

¹⁶î du ǁaeba ǁamaǂuibasen, tsēdi a ǂkhaba xuige.

¹⁷ǁNā-amaga tā ǁnâuǃāoǃnâ, î du ǁnâuǃā, mâs a ǃKhūb di ǂâi ǃkhaisa.

¹⁸Î du tā ǂauxûib xa ākhanu, ǁîsa xus hîǀhurusens ǀguisa ra hā xuige; î du Gagab xa ǀoa,

¹⁹î du psalmdi tsî karetsanadi tsî gagasi amdi ǀkha ǃhoa-ūgu, î du ǃKhūba ǂgaob âdu ǃnâ ǁnaeba tsî ǀkhōba;

²⁰î du mâ ǁaeb hoab ai hoa xūn ǂama Elob tsî ǁGûba gangan sada ǃKhūb Jesub Xristub di ǀons ǃnâ.

²¹Î du ǃnaga hâbagu re, eloǃaoǃgâsib ǃnâ.

²²Saso taraso, saso aoga ǃnaga hâba, ǃKhūb ǃoagus khami;

²³aob ge a taras di dana xuige, Xristub a ǁkhāti ǀhaohâb di dana khami; tsîb ge a soros âb di ǃGâiǃōdī-ao.

²⁴Tsî ǀhaohâb ra Xristuba ǃnaga hâba khami, ǁnās ǁkhās xase adi tarade ǁkhāti ǁîdi aogu ǂûga ǃnaga hâba hoa xūn ǃnâ.

²⁵Sago aogo sago taradi ǂûde ǀnam, Xristub ge ǀhaohâba ǀnam, tsî ǁî-aitsama ǁîb ǃaroma māǁnâsens ǁkhās khami;

²⁶ǁîbab nî khaise, ǁgam-i khōs ǀkha ǁîba ǃanuǃanu hâǃâ mîs ǃnâ;

²⁷ǁîb aiǃâb nî ǀhaohâba mâise ǂkhaisa tsî, ǂnao-i tsî ǁairo-i tsî nēti ī xū-i ǀnî-e ūhâ tama hâb ase; îb ga ǃanu tsî ūose ī ti.

²⁸ǁNāti gu nî aoga ǁîgu tarade ǀnam, ǁîgu sorodi ǂûdi khami. ǁÎb tarasa ra ǀnammi ge ǁî-aitsama a ǀnamsenna;

²⁹khoe-i xare-i ge tātsē ǁî-i ǁgans ǂûsa ǁkhan tama hâ xui-ao; xawe i ge ǂûmā tsî ra sâu si, ǃKhūb on ra ǀhaohâb ǀkha dī khami;

³⁰ǁîb soros di uniǁaeda, ǁîb ǁgans di ǁganda, tsî ǁîb ǂkhōgu di ǂkhōda xui-ao.

³¹ǁNā-amagab ge khoeba ǁgûb tsî ǁgûs tsîra ǁnāxū tsî nî tarasa âb ai ǂgāmâisen, o ra ge ǁî ǀgamra nî ǀgui ǁgan.

³²Nē ǂganǃgâsib ge a kai; o ta ǁîsa Xristub tsî ǀhaohâb tsîkha xa ra mî.

³³Tsî sago tsîna ab mâb hoaba taras âba ǁîb a ǀnamsens ǁkhās khami ǀnam; tsî tarasa as aoba ǃgôa.