Read Khoekhoegowab Efeseǁîn 6 Bible Online

Efeseǁîn 6 - Khoekhoegowab bible

Efeseǁîn 6

¹Sadu ǀgôado, sadu îna ǁnâuǀnam re, ǃKhūb ǃnâ; ǁîs a ǂhanu xuige.

²Saob tsî saos tsîrats ge nî ǃgôa; nēs ge ǂguro mîmās mîmâi-i ǀkha hâsa,

³ǃgâibahets nîse, tsîts nî ǂomxase ǃhūbaib ai ûise.

⁴Tsî sago ǁgûgo, sago ôana tā ǁaib ǃoa ǁgonǁgon, î go ǁîna ǃKhūb ǂgōǀaus tsî ǁnamas tsîra ǃnâ kaikai.

⁵Sadu ǃgādo, sadu ǃhūbaisi ǀhonkhoena ǃnaga hâba ǃaob tsî ǀkhūb tsîkha ǀkha, sadu ǂgaogu di ǀguiǃnâxasib ǃnâ Xristub ǃoagus axase;

⁶mûs ǃoabas ǀkha tama, khoena ǃgâiǃgâiba-aose, xawe Xristub di ǃgān, Elob ǂâisa ǂgaob ǀkha ra dīn axase,

⁷î du ǃgâiǂâixasib ǀkha ǃoaba ǃKhūbas axase, tsî khoenas axase tama;

⁸ǂan du a amaga, khoe-i ga dī ǃgâi-i hoa-i, ǁnā-e i ge ǃKhūba xu nîra hōdawa, ǃgā-i karao, ǃnorasa-i karao.

⁹Tsî sadu ǀhonkhoedo, ǁnās ǁkhās xase ǁîna dība, î du ǁîna ǁgarisa ǀû, ǂan du a amaga, sadu ǃKhūb on ǀhommi ǃnâ hâsa, tsî khoe-i ai-e ǃkhōǃoas ǁîb tawa hâ tamasa.

¹⁰ǀAms ai, ti ǃgâsago, ǃKhūb ǃnâ ǀgai, tsî ǁîb ǀgaib di ǁkhāsib ǃnâ.

¹¹Hoaraga ǁâtanin Elob dina ana, î du ǁgâuab di gāxaǃnâde mâǃoa ǁkhā.

¹²ǁGans tsî ǀaob tsîra ǀguira ǃoagu da ǃkham tama hâ xuige, xawe ǂamsagu ǃoagu, tsî ǀgaisagu ǃoagu, tsî ǃhūbaib di gaosagu nē hâ ǁaeb ǃkhaenab digu ǃoagu, tsî ǂkhaba gagagu, ǀhommi ǃnaga hâgu ǃoagu.

¹³ǁNā-amaga hoaraga ǁâtanin Elob dina ǃkhōbasen, î du ǂkhabatsēs ai mâǃoa ǁkhā, î du hoana dī hâǃâ mâhâhâ ǁkhā.

¹⁴Mâ ǁnâi re, î du kamanagu âdo amab ǀkha ǃgaeǂnami, î du ǁkhaib ǁâsarab ǂhanu-aisib diba ana;

¹⁵î du ǂaide ǂgaeǂgā māsenxasib ǂkhîb ǃgâiǂhôas dib ǀkha.

¹⁶Î du nēn hoan ǂamai khōsikhōb ǂgoms diba ǃkhōbasen, ǁîb ǀkha du ǀaexa ǂāgu ǂkhabab digu hoaga a ǀari ǁkhāba;

¹⁷î du toroǀgapas ǃgâiǃōsib disa ū, tsî Gagab di gôab, ǁnāb ge a Elob mî.

¹⁸Î du hugaǀgui ǀgores tsî ǀkhomas hoas ǀkha ǀgore Gagas ǃnâ; î du ǁîs xōǀkhā ǂkhaikari hâ, ǀûs ose tsî ǀkhomas hoas ǀkha ǃanun hoana ra ǀgorebase,

¹⁹î du tita ǀgoreba, mîsa ta nî māhese, ǁkhoaǂgaose ta ti amsa ǁkhowa-am tsî ǃgâiǂhôas di ǂganǃgâsiba nî ǂanǂanse;

²⁰ǁîs ǃaroma ta a sîsabe ǃgaesase, î ta ǁîs ǃnâ ǁkhoaǂgaose ǃhoa ǁkhā, ǃhoa ta nî khami.

²¹Tsî sadu on nî ǂanse, mati ta hâsa, tsî tare-e ta ra dīsa, ob ge Tixikuba hoana nî ǂanǂan du, ǀnamǀnamsa ǃgâsab tsî ǂgomǂgomsa ǃoabasabeba ǃKhūb ǃnâ;

²²ǁîba ta ge ǁîs ǃaroma sadu ǁga go sî, sige hâǃnâ mâsiba du nî ǂanse, tsîb nî sadu ǂgaoga ǁkhaeǂgaose.

²³ǂKhîba ab ǃgâsadu ǀkha hâ, tsî ǀnamma ǂgoms ǀkha, Elob ǁgûb tsî sada ǃKhūb Jesub Xristuba xu.

²⁴ǀKhomma ab hoan ǀkha hâ, sada ǃKhūb Jesub Xristuba toa tama ǀnammi ǀkha a ǀnamna! Amen.