Read Khoekhoegowab Filipeǁîn 1 Bible Online

Filipeǁîn 1 - Khoekhoegowab bible

Filipeǁîn 1

¹Paulub tsî Timoteub, Xristub Jesub ǃgākha, Xristub Jesub ǃnâ hâ ǃanun Filipis ǃnâ hân hoan ǃoa, mûǂamaogu tsî hui-aogu tsîn ǀkha:

²ǀKhomma ab hâǀkhā du tsî ǂkhîb, Elob sada Îb tsî ǃKhūb Jesub Xristub diba!

³Ti Eloba ta ge ra gangan, sadu xa ta ra ǂâi ǁaeb hoab ai,

⁴ǁîsa ta hugaǀgui ra dī ti ǀgores hoas ǃnâ, sadu hoado ǃgâiaǂgaob ǀkha ra ǀgorebase,

⁵sadu amǃnâxasib ǃgâiǂhôas ǃnâ du ūhâb ǃaroma, ǂguro tsēsa xu nētsēs kōse;

⁶nēsa ra mûmâinǃgâse, sadu ǃnâ ǃgâi sîsenna ge tsoatsoab ge ǁîba nîra dīǀamǀam ǃkhaisa, Jesub Xristub tsēs kōse,

⁷tita i a ǂhanuba khami, sadu hoadu xa ta nēsa nî ǂâisa, ti ǂgaob ǃnâ ta sado ūhâ amaga, ti ǃgae-ūdan ǃnâ, tsî ǃgâiǂhôas ǂama ta ra dī ǃereambasens tsî ǀgaiǀgais, tita ǀkha du hoado ǁkhā ǀkhommi ǃnâ ra amǃnâxa amaga;

⁸Elob ge a ti ǃkhō-amao, matikōse ta sadu hoado ra ǁkhoresa ǃgam ǀnammi Xristub Jesub dib ǀkha.

⁹Tsî nēsa ta ra ǀgore, îb sadu ǀnamma ǃaruǀî tsî ǃaruǀîǀgui ǃnāǂam ǂans tsî hōǃâs hoas ǃnâ;

¹⁰ǁîsa xu ra ǀgora xūna du nî ǃâitsâ ǁkhāse, ǃanu tsî ǂnao-ose du nî īse Xristub tsēs ai,

¹¹ǂhanu-aisib di ǂûn ǀkha ǀoaǀoahe hâse, Jesub Xristuba xu hân Elob di ǂkhaisib tsî kares tsîra ǃoa.

¹²Tsî ta sado ra ǂanǂan ǂgao, ǃgâsado, tita ǀkha ge īn ge ǃaruǀî ǃgâiǂhoas di ǃhaeǃhaehes ǃoa īsa.

¹³On ge ti ǃgae-ūdana Kaesari ommi hoaragab ǃnâ tsî naun hoan tawa Xristub ǃnâ ge ǂhai;

¹⁴o gu ge ǃnāsa ǃgâsaga ti ǃgae-ūdana xu ǃKhūb ǃnâ mûmâinǃgâsa hō, tsî ǃnā hâ ǁkhoaǂgaosib ǀkha mîsa ǃaob ose ge ǃhoa ǁkhā.

¹⁵ǀNîgu ge ǁkhāti Xristuba surib tsî ǃkhams tsîra ǃaroma ra aoǁnâ, xawe naugu ǃgâiǂâibasens ǀkha.

¹⁶Naugu ge Xristuba surib ǀkha ra aoǁnâ tsî ǂhanu ǂâibasens ǀkha tama, ti ǃgae-ūdana gu ǃnāsa ǁgâiǀāba ra ǀaro, ti ǂâi tsî;

¹⁷xawe nēgu ge ǀnammi ǀkha ra dī, ǃgâiǂhôas ǂama ǃereambasens ǃoa ta ǂnûihe hâsa ǂan tsî.

¹⁸Mati ǁnâi? Mâ dommi hoab ai a-i ī, ǀhôagaosib ǀkha i ga ī xawe, amab ǀkha i ga ī xawe; Xristub ǀguib ga aoǁnâheo, o ta nēs ǃnâ ra ǃgâiaǂgao; ā, ǃgâiaǂgao ta nîra;

¹⁹ǂan ta a xui-ao, nēs nî tita ǃgâiǃōsib ǃoa huisa, sadu di ǀgoresa xu tsî Jesub Xristub Gagab di huiba xu;

²⁰ǃâubasen tsî ta ra ǁkhore khami, xū-i xare-i ǃnâ ta taotaohe tidesa, tsîb nî Xristuba ǁkhāti nēsi huga i ge ī khami ǂhauǃnâsib hoab ǀkha ti soros ǃnâ kaikaihesa, ûiba xus kas, ǁōba xus kas hoasa.

²¹Ti ûib a Xristu, tsî ǁōb a ti harebe xui-ao;

²²xawe ǁgans ǃnâ ûis ga ti sîsenna harebebao, o ta a ǀū, tare-e ta nî ǃkhōǂuibasen ǃkhaisa.

²³Nē ǀgamra xa ta kom ra ǁgariheo: Turaba ta ūhâ, orehe tsî ta nî Xristub tawa hâsa; ǁîs hoan ǂamai a ǃgâi xui-ao;

²⁴xawe ǁgans ǃnâ hâs kom sadu ǃaroma ǁnās ǃgâ-ai ǂhâbasao.

²⁵Tsî nēsa ta ǂgom tsî a ǂan, hâ ta nî ǃkhaisa, tsî ta nî sadu hoadu ǀkha hâhâ ǃkhaisa, sadu aiǃgûs ǃoa tsî sadu ǂgoms di ǃgâiaǂgaob ǃoa;

²⁶tita ǃnâ du ūhâ koasens âdu nî Xristub Jesub ǃnâ ǃnā, ǁkhawa ta nî sadu tawa sīs ǀkha.

²⁷Nēs ǀguisa dī, î du anuse tanisen Xristub di ǃgâiǂhôasa ǃoa, î ta sī tsî ta ga sado mû tamas ka io sī tama ta ga i xawe sadu xa ǁnâu, ǀgui gagas ǃnâ du mâsa, tsî ǀgui ǂâis ǀkha du ǃgâiǂhôas di ǂgoms ǃaroma ra ǃkhamsa;

²⁸tsî ǀgui xū-i ǃnâ du mâǃoa-aon xa ǃaoǃaokaisen tidesa; ǁîs ge ǁîna kāǁōsib saose ība, xawe sado ǃgâiǃōsib dise, tsîs ge nēsa Eloba xu ra ī.

²⁹Sadu ge ǀkhomma xu māhe hâ, Xristub ǃaroma ǁîb ǃnâ ǂgoms ǀguisa hî tama i, tsî ǁkhāti ǁîb ǃaroma tsâsa;

³⁰tsî du ǁkhā ǃkhamsa ūhâ, tita ǃnâ du ge mûs, tsî tita xu du nēsi ra ǁnâusa.