Read Khoekhoegowab Filipeǁîn 2 Bible Online

Filipeǁîn 2 - Khoekhoegowab bible

Filipeǁîn 2

¹O ǁkhaeǂgao-i ga Xristub ǃnâ hâo, khoakhoa-i ǀnammi di-i ga hâo, ǀhûhâsi-i Gagab di-i ga hâo, ǀnamxaǃnâsi-i tsî ǀkhomxaǂgaosi-i ga hâo,

²ǁnâi ti ǃgâiaǂgaoba ǀoaǀoa, î du ǀguiǂâixa, î du ǁkhā ǀnamma ūhâ, î du ǁnâugu, î du ǀgui ǂâibasens ǀkha hâ.

³Xū-i xare-e tā ǂnīǂnīsens tsî ǁîǃgôasensa xu dī, î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa.

⁴A i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.

⁵ǁKhā ǂâisa as sadu ǃnâ hâ, Xristub Jesub ǃnâ ge ǁkhāti hâ isa.

⁶ǁÎb, Elob īsib ǃnâb hâ xawe ǁkhâuǁnâbasense Elob ǀkha ǀguiti-īsa ǃgôa tama ge iba;

⁷xaweb ge ǁî-aitsama ge ǀâǀhanasen, tsî ǃgāb ība ū, tsî khoen ǀkha ǀguiti ge ī.

⁸Tsî īsib ǃnâ khoe-i ase hōhe hâǃâb ge aitsama ge ǃgamǃgamsen, ǁōb kōse ǁnâuǀnam hâǃâ, ā, ǃgâuhaib aib ge ǁōs kōse.

⁹ǁNā-amagab ge Eloba ǁîba kaise ge ǀgapiǀgapi, tsî ǀons, ǀondi hoadi ǃnā hâsa ge mā bi:

¹⁰Jesub di ǀons ǃnâ i nî mâ ǁgoa-i hoa-e ǃhonga, ǀhommi ǃnâ hân di-i kas, ǃhūbaib ai hân di-i kas, ǃhūb ǃnaga hân di-i kas hoasa;

¹¹tsî i nî mâ nam-i hoa-e ǁguiǁnâga, Jesub Xristub a ǃKhū ǃkhaisa, Elob ǁgûb di ǂkhaisiba ǃoa.

¹²ǁNā-amaga, ti ǀnamsabedo, hugaǀgui du ge ǁnâuǀnam hâ i khami, ti hās ǀguis ǃnâ tama i, tsî ǁnās ǃgâ-ai ǁkhāti nēsi ǀkhai ta apa, ǃaob tsî ǀkhūb tsîkha ǀkha sadu ǃgâiǃōsiba sîsen re;

¹³Elob ge ǁnāb, sadu ǃnâ ǂâibasens tsî dīs tsîra ra sîsenna xuige, ǁîb di ǃgâiǃgâibasensa ǃoa.

¹⁴Hoa xūna ǀaras tsî ǃhoaǃoas ose dī re;

¹⁵ǀauheǁoasase tsî ǂhauǃnâse du nî īga, Elob di ūo ǀgôase, gamaǃgâ tsî ǂkhaba ǃhaos ǃnâ, ǁîs ǃnâ du ǃhūbaib di ǃnân ase ra ǃnâsa;

¹⁶î du mîs ûib disa ǃkhōǀgaipebasen, ti koasa ǃoa Xristub tsēs ai, î ta ga tā ǁause ǃgû hâ, tsî ǁause sîsen hâ ti.

¹⁷Tsî sadu ǂgoms di ǁguibas tsî eloǃoabas ǃaroma ta ga ǁguibahe xawe ta ra ǃgâiaǂgao, tsî ta sadu hoadu ǀkha ra ǃgâiaǂgao.

¹⁸ǁNās ǁkhās xase sadu tsîna ǃgâiaǂgao, î du tita ǀkha ǃgâiaǂgaoǀhao re.

¹⁹Tsî ta ra ǂâi ǃKhūb Jesub ǃnâ, Timoteuba ta nî ǃhaese sadu ǃoa sîsa, tita ǁkhāti nî ǂkhîǂâixaga, mati i sadu ǀkha īsa ta ga ǁnâuo.

²⁰ǀGuib xaweba ta kom ūhâ tamao, ǁkhā ǀguiǂâixasib ǀkha nî sadu dina ǂhansenbaba.

²¹ǁÎgu hoagu kom ǁîgu ǃgâiba ra ôao, tsî Xristub Jesub dina ôa tamao.

²²Tsî ǂhauǃnâb a ǃkhaisa du a ǂan: ǀGôaseb tita ǁgûta ǀkha ǃgâiǂhôas ǃnâ gere sîsen xui-ao.

²³O ta ǁîba ǁnātimîsi nî sî, ti ta ra ǂâi, mati i tita ǀkha nî īsa ta ga kōkō ǃnubai,

²⁴tsî ta ra ǂgomǃgâ ǃKhūb ǃnâ, ǃhaese ta nî aitsama sīsa.

²⁵Xawe ta ra ǂâi, ǂhâbasa i a ǃkhaisa, Epafroditub ti ǃgâsaba ta nî sadu ǃoa sîsa, ti ǀhaoǃoabasabeb tsî ti ǀhaoǂnoagu-aob, tsî sadu sîsabeb, tsî ti ǂhâsib di ǃoabasabeba.

²⁶Sadu hoadob ge ǁkhore tsî kaise gere ǂhansen amaga, ǁîb ge ǀaesen hâ i ǃkhaisa du ge ǁnâus ǃaroma;

²⁷tsî amaseb ge ǁōb kōse ge ǀaesen hâ i, xaweb ge Eloba ǁîba ge ǀkhom, tsî ǁîb ǀguiba tama i, tsîb ge tita ona ge ǀkhom, nē ǃoasiba ta nau ǃoasib ama ūhâ tidega.

²⁸O ta ge ǁnās ǃgâ-ai ǃhaese ra sî bi, ǁkhawa du nî ǃgâiaǂgaose, ǁîba du ga mûo, î ta ga tita ǀorose ǃoa ti.

²⁹Î du ǁîba ǃKhūb ǃnâ ǃgâiaǂgaob hoab ǀkha ǃkhōǃoa, î du nēti īga ǃgôab ǃnâ ūhâ re;

³⁰Xristub di sîsenni ǃaromab kom ge ǁōǁgao, ǁîb ûiba ǃgôa tama i tsî sadu di amǃnâs ǃnâb nî tita ǃoabase.