Read Khoekhoegowab Filipeǁîn 3 Bible Online

Filipeǁîn 3 - Khoekhoegowab bible

Filipeǁîn 3

¹ǃAruǀî, ti ǃgâsago, ǃgâiaǂgao re ǃKhūb ǃnâ! ǁKhā xūna sadu ǃoa xoas ge tita ǃgomba tama hâ, tsîs ge sado ǁaposasiba ra mā.

²Kō arina, kō ǂkhaba sîsenaoga, kō ǃgaoǂkhūsa.

³Sada ge a ǃgaohesa, Gagab ǃnâ Eloba ra sîsenba da, tsî Xristub Jesub ǃnâ ra koasen da, tsî ǁgans ai mûmâinǃgâ tamada xui-ao;

⁴tita ǁkhāti ǁgans ǃnâ mûmâinǃgâs di ǃaroma-e ūhâ xawe. Khoe-i ga ǁgans ǃnâ i a mûmâinǃgâ ǁkhā, ti ǂâio, tita ge ǁî-i ǃgâ-ai a ǁkhā:

⁵Tita ǁkhaisaǁî tsēs ai ge ǃgaohe, Israelǁaes tsî Benjaminni ǃhaos di ta, Hebreǁîn di Hebreǁîta, ǂhanub ǃoa Fariseta,

⁶ôasasib ǃoa ǀhaohâb di ǃgôaǃgonaota, ǂhanu-aisib ǃoa ǂhanub ǃnâ ūose ge ī ta.

⁷Xawe tita ge harebeba hâ in, ǁîna ta ge Xristub ǃaroma ǂkhôan ase ge ǃgôa.

⁸Ā, xūn hoana ta ganupe ǂkhôan ase ra ǃgôa, ǃnā hâ ǂans Xristub Jesub ti ǃKhūb dis ǃaroma, ǁîb ǃaroma ta ge hoana ǂhara tsî ǀapon ase ge ǃgôa, Xristuba ta nî hōse,

⁹tsî ǁîb ǃnâ hâse ta nî hōhese, ti ǂhanu-aisib ǂhanuba xu hâba ūhâ tamase, xawe Xristub ǃnâ ǂgomsa xu hâb, ǁnā ǂhanu-aisib, ǂgoms ǀkha Eloba xu hâba;

¹⁰ǁîba ta nî ǂanse, tsî ǁîb khâis di ǀgaib, tsî ǁîb tsâb di amǃnâxasiba, ǁōb âb ǀkha ta nî ǀguiti-īga;

¹¹î ta ga, īǁkhā i kao, ǁō hân di khâis tawa sī ti.

¹²ǀNai ta hō si hâ khami tama, tsî ǀnai dīǀoaǀoahe hâ khami tama, xawe ta ra sauruǃgon si, ǃkhō si ta nîse, Xristub Jesub xa ta ge ǁkhāti ǃkhōhe khami.

¹³ǃGâsado, tsî ta ǂâi tama, aitsama ta ǃkhō si hâsa;

¹⁴xawe ta ǀgui xū-e ra dī, khaoǃgâ hâna ǀuru tsî ta aiǃâ hân ǃoa ra ǀhōǂuisen, tsî ta daob di ǀams ǃoa ra ǃkhoe, dans di amǃnâsa ta nî hōse, ǁnā ǂgais, ǁîs ǀkhab Eloba Xristub Jesub ǃnâ ǀgapiseb ǃoa ra ǂgai tes ǃoa.

¹⁵O dīǀoaǀoasa da as kōse, a da ǁnāti ǂâi, tsî xū-e du ga ǀkharase ǂâio, ob nî Eloba ǁnā-e ǁkhāti sado ǂhaiǂhaiba;

¹⁶xawe hō da ge-i ǃnâ a da ǁkhā dommi ǃoa tanisen, a da ǀguiǂâixa.

¹⁷Tita ǁgaeǁgae re, ǃgâsado, î du ǁîna ǃgaoǃgâ, sige du aiǁgause ūhâ khami ra tanisenna,

¹⁸ǂguin ge ra tanisen, ǁîn xa ta ǀnai gere mîba du khami, tsî nēsi ta ǁkhāti ās ǀkha ra mî, Xristub ǃgâuhaib di khākhoen asa;

¹⁹ǁîn di ǀams ge a kāǁōsi, tsî ǃnāb ge a ǁîn di elo, ǁîn di ǂkhaisib ge taotaosib ǃnâ hâ, tsîn ra ǃhūbaib din xa ǂâiǂâisen.

²⁰Xawe sada di hâǃkhais ge ǀhommi ǃnâ hâ, ǁîsa xu da ǁkhāti ǃGâiǃōdī-aob ǃKhūb Jesub Xristuba ǃâu hâsa.

²¹ǁÎb, sada ǃgamǃgamsa sorosa nî ǀkharaǀkharaba, ǁîb di ǂkhaisa soros ǀkhas nî ǀguiti-īse, ǁnā ǀgaib ǀkhab ǁkhāti xūn hoana ǁîba ǃgamǃgamba ǁkhāb ǃoa.