Read Khoekhoegowab Filipeǁîn 4 Bible Online

Filipeǁîn 4 - Khoekhoegowab bible

Filipeǁîn 4

¹ǁNā-amaga, ti ǀnamsa tsî ǁkhoresa ǃgâsado, ti ǃgâiaǂgao tsî krondo, nēti ǃKhūb ǃnâ mâǀgai re, ǀnamsabedo.

²Euodiasa ta ra ǁnama, tsî Sintixesa ta ra ǁnama, î ra ǃKhūb ǃnâ ǀguiǂâixa.

³Ā, satsa ta ǁkhāti ra ǀkhoma, ti ǂhauǃnâ ǀhaoǃoabasabetse, ǁîra hui, tita tsî Klemenni tsî nau ǀhaoǃoabasabegu âtagu tsî ge ǀkha ǃgâiǂhôas ǃnâ gere sîsenǀhao ra, ǀondi âra ûib ǂkhanis ǃnâ mâ ra.

⁴ǃGâiaǂgao re ǃKhūb ǃnâ mâ ǁaeb hoab ai; tsî ǁkhawa ta ra mî: ǃGâiaǂgao re!

⁵Ab sadu tsamǂâixasiba khoen hoana ǂhaisaba; ǃKhūb a ǀgū xuige.

⁶Xū-i xare-i xa tā ǂhansen, î du xūn hoan ǃnâ sadu ǂgande ǀgores tsî ǀkhomas tsîra ǃnâ gangans ǀkha Elob aiǃâ ǂhaisa kai.

⁷Tsî Elob di ǂkhîb, ǁnâuǃāb hoaba ǃnā hâba, ab sadu ǂgaogu tsî ǂâidi tsîna Xristub Jesub ǃnâ sâu.

⁸ǃAruǀî, ǃgâsado, ama-ain hoan, tsî anu hân hoan, tsî ǂhanu-ain hoan, tsî ǃanun hoan, tsî ǀnamǀnamsan hoan, tsî ǃgâise ra ǀōn hoan, mâ ǃgâi ǂū-i tsî mâ koa-i ga hâo, ǁî-i xa ǂâiǂâisen.

⁹ǁKhāǁkhāhe du gen, tsî ǃkhōǃoa du gen, tsî ǁnâu du gen, tsî tita ǃnâ du ge mûn, ǁîna dī re, ob ge ǂkhîb di Eloba sadu ǀkha nî hâ.

¹⁰Tsî kaise ta ge ǃKhūb ǃnâ ǃgâiaǂgao hâ i, tita xa du nî ǂâiǂâisense du ge ǁkhawa ǃnoaǂkhai ǃkhaisa; ǁîsa du gere ǂâibasen, xawe du ge ǃgâi ǁae-e hō tama ge i.

¹¹Tôasib xa ta nēsa mî tama; ǁkhāǁkhāsen ta ge xui-ao, hâǃnâ ta a īsib ǀkha ǂâusa.

¹²ǃGamse hâsa ta a ǂan; ǃnāǂamse hâsa ta a ǂan; mâ xū-i hoa-i ǃnâ ta ǁkhāǁkhāhe hâ, ǁâs tsî ǃâsa, ǃnāǂamsase ūhâs tsî ǂhâb ǃnâ hâsa;

¹³hoana ta a ǁkhā ǁîb, tita ra ǀgaiǀgaib, Xristub ǃnâ.

¹⁴Xawe du ge ǃgâise ge dī, ti ǁgâiǀāb ǃnâ du ge tita ǀkha amǃnâxa ǃkhaisa.

¹⁵Tsî sadu ǁkhāti a ǂan, Filipeǁîdo, ǃgâiǂhôas di tsoatsoas ǃnâ, Masedoniaba xu ta ge ǂoa ǃnubai i ge ǀnî ǀhaohâ-i xare-e māǂuis tsî ǃkhōǃoas ǃereamsa ǃoa tita au tama hâ isa, sadu ǀguidu.

¹⁶Tesalonikas ǃoa du ge ǀguis xa ǃnāsa ǃnāde huiba ge sîba te.

¹⁷ǀKhaexū-e ta ra ôa khami tama, xawe ta ǂû-e ra ôa, sadu ǃgôaǁnâs ǃnâ nî ǃnā-e.

¹⁸Hoana ta ge ǃkhōǃoa tsî ta ǃnāǂamsiba ūhâ. Sado xu ra ǀkhīna ta ge Epafroditub ǀkha ǃkhōǃoao, ǃgâise ra ham ǁamab ase tsî ǃkhōǃoasa ǁguibas, Eloba a ǃgâibas ase.

¹⁹Tsî ti Elob ge ǁîb di ǃkhūsib ǃoa sadu ǂhân hoana nî ǀoaǀoa ǂkhaisib ǃnâ Xristub Jesuba xu.

²⁰Ab sada Elob tsî ǁGûba ǂkhaisiba ūhâ ǀamosib hoab kōse! Amen.

²¹Hoa ǃanuna tawede re Xristub Jesub ǃnâ. Tita ǀkha hâ ǃgâsagu ra tawede du.

²²ǃAnun hoan ra tawede du, ǀō-ai Kaesari ommi dina.

²³Ab sada ǃKhūb Jesub Xristub di ǀkhomma sadu hoadu ǀkha hâ! Amen.