Read Khoekhoegowab Koloseǁîn 1 Bible Online

Koloseǁîn 1 - Khoekhoegowab bible

Koloseǁîn 1

¹Pauluta, Xristub Jesub di apostelta, Elob di ǂâisa xu, tsî ǃgâsab Timoteub tsîkhom.

²Koloses ǃnâ hâ ǃanun tsî Xristub ǃnâ ǂgom hâ ǃgâsagu ǃoa: ǀKhomma ab hâǀkhā du, tsî ǂkhîba Elob sada Îba xu tsî sada ǃKhūb Jesub Xristuba xu!

³Sikhom ge Elob tsî ǁGûb sada ǃKhūb Jesub Xristub diba ra gangan, hugaǀgui sado ra ǀgorebaǃâ,

⁴sadu ǂgoms Xristub Jesub ǃnâ du ūhâs, tsî sadu ǀnammi ǃanun hoan ǃoa du ūhâb xa khom ge ǁnâuo;

⁵ǁnā ǃâubasens, ǀhommi ǃnâ du sâubahe hās ǃaroma, ǁîs xa du ge aibe amab di mîs ǃgâiǂhôas dis ǃnâ ǁnâusa,

⁶sadu tawa ge sīs, ǃhūbaib hoab ais ge ǁkhāti sī khami, tsîs ge ra ǂûtani, sadu tawas ǁkhāti ī khami, ǁnā tsēs, ǁîsa du ge ǁnâus tsî Elob ǀkhomma du ge amab ǃnâ mûǂansa xu.

⁷ǁKhāti du ge ǁkhāǁkhāhe khami Epafrab, sikhom ǀnamǀnamsa ǀhaoǃoabasabeb xa, ǁîb ge ǂgomǂgomsa ǃgāb Xristub diba sadu ǃaroma;

⁸ǁîb ge ǁkhāti sadu ǀnammi, Gagab ǃnâ hâba ge ǂanǂan khom.

⁹ǁNā-amaga khom ge ǁkhāti, ǁnâu khom ge tsēsa xu, ǀû tama hâ sado ǀgoreba tsî ǂganbas ǀkha, ǀoaǀoahe du nîga ǁîb ǂâis di ǂans ǀkha, gagasi gā-aisib tsî ǁnâuǃāb hoab ǃnâ;

¹⁰î du ga, anu hâ khami, ǃKhūba tanisenba ti, ǃgâiba bi a khami, ǃgâi dī-i hoa-i ǃnâ ra ǂûtanise, tsî Elob di ǂans ǃnâ ra ǀomkhâise.

¹¹Î du ga ǀgaiǀgaihe ti hoa ǀgaib ǀkha, ǁîb ǂkhaisib di ǁkhāsib ǃoa, taniǀnamxasib tsî ǃnūǃnâxasib hoab ǃoa, ǃgâiaǂgaob ǀkha;

¹²î du ǁGûba gangan, ǀumi-amǃnâs ǃanun dis di ǃnâb ǃnâ hâs ǃoa sada ge ǁkhā kaiba,

¹³sada ge ǃkhaenab di ǀgaiba xu oreb, tsî sada ǀGôab âb ǀnammi âb di gaosib ǃnâ ge sī-ūba.

¹⁴ǁÎb ǃnâ da oresa ūhâb ǀaob âba xu: ǁNās ge ǁoren ǀûbasa.

¹⁵ǁÎb ge mûheǁoasa Elob di ǀguiti-īb, tsî kurusaben hoan di ǂGuroǃnaesabeba.

¹⁶ǁÎb ǃnân xūn hoana kuruhe hâ xui-ao, ǀhommi ǃnâ hân tsî ǃhūbaib ai hân hoan, mûsan tsî mûheǁoasan karao, trondi karao, gaosigu karao, ǂamkhoegu karao, ǀgaigu karao, ǁîn hoan ge ǁîba xu tsî ǁîb ǃoa kuruhe hâ;

¹⁷tsîb ge xūn hoan aiǃâ ge hâ i, tsîn ge xūn hoana ǁîb ǃnâ hâ;

¹⁸tsîb ge a soros di Dana, ǁnāb ge ǀhaohâba, ǁîb tsoatsoasa xu hâb tsî ǁō hâna xu ǂGuroǃnaesabeba, hoan xab nî ǂgurose.

¹⁹ǁGûba i ge ǃgâiba ge i xui-ao, ǀoasib hoab nî ǁîb ǃnâ ǁansa;

²⁰tsîb nî ǁîba xu xūn hoana ǁîb ǀkha ǂkhîbagu kaise, ǁîb ǃgâuhaib di ǀaob ǀkha ǂkhîba ra dīǃâ, ā, ǁîba xu, ǃhūbaib ai hâ xūn karao, ǀhommi ǃnâ hâ xūn karao.

²¹Tsîb ge ǁkhāti sadu, aibe ǃhaokhoe tsî ǂkhaba sîsengu ǂansa xu khākhoe ge ido nēsi ge ǂkhîbagu kai,

²²soros ǁîb ǁgans dis ǃnâ, ǁōba xu, ǃanuse tsî ūose tsî ǀhapioseb nî sado mâi-aiǃâsense;

²³ǁnāti du ga ǂgoms ǃnâ hâhâo, ǃgaoǃgaohe tsî ǁapoǁapohe hâse, tsî du ga ǁnopeǁnopehe tama io ǃgâiǂhôas di ǃâubasensa xu, sadu ge ǁnâus, kurusaben ǀhommi ǃnaga hân hoana gere aoǁnâbahes, ǁîs tita Pauluta ge ǃoabasabe kaibasa.

²⁴O ta nēsi ra ǃgâiaǂgao sado ta ra tsâba tsân xa, tsî ta Xristub di ǁgâiǀāgu tawa tôasi hâna ti ǁgans ǃnâ ra ǀoaǀoa ǁîb soros ǃaroma, ǁnāb ge a ǀhaohâ;

²⁵ǁîb di ǃoabasabe kai ta geb Elob di ǂhûiǂuis, sadu ǃnâ ta ge māhes ǃoa, Elob mîsa ta nî dīǀoaǀoase,

²⁶ǁnā ǂganǃgâsib, ǀamosiba xu tsî ǃhaodi hoade xu ǂganǃgâsa ge ib, xawe nēsi ǁîb di ǃanuna ǂhaiǂhaibahe hâba;

²⁷ǁînab ge Eloba ǂanǂan ǂgao, mâb a ǂkhaisa ǃkhūsib nē ǂganǃgâsib diba ǃkhaisa ǀūben ǃnâ, Xristub ge ǁnāba sadu ǃnâ, ǂkhaisib di ǃâubasenna;

²⁸ǁîb, sige ra aoǁnâba, hoa khoena ra ǁnama tsî hoa khoena ra ǁkhāǁkhāǃâ gā-aisib hoab ǀkha, mâ khoe-i hoa-e ge nî Xristub Jesub ǃnâ dītoahe hâse mâi-aiǃâse;

²⁹ǁîs ǃoa ta ǁkhāti ǃgomse ra sîsen, ǁîb di ǀgaib tita ǃnâ ǀgaisase ra sîsenni ǃoa.