Read Khoekhoegowab Koloseǁîn 2 Bible Online

Koloseǁîn 2 - Khoekhoegowab bible

Koloseǁîn 2

¹ǂGao ta ra, ǂan du nîsa, matikō kai ǂnoagusa ta sadu ǂama ūhâsa, tsî Laodiseas din, tsî ti aisa ǁgans ǃnâ mû taman hoan ǂama;

²ǂgaogu ân nî ǁkhaeǂgaohega, tsî ǀnammi ǃnân nî ǃgaeǁaehega, ǀoa hâ ǁnâuǃāb hoab di ǃkhūsib ǃoa, Elob tsî ǁGûb tsî Xristub di ǂganǃgâsiban nî mûǂanse,

³ǁîb ǃnâ gu gā-aisib tsî ǂans tsîra di ǁuigu hoaga ǂganǃgâsase hâba.

⁴Tsî ta nēsa ra mî, khoe-i xare-i sado ǂhaeǂhapu tidega ǃgâi khami ī ǃhoadan mîdi ǀkha.

⁵Tsî ǁgans ǀkha ta a ǀkhai, xawe ta gagas ǃnâ sadu ǀkha hâ, tsî ǃgâiaǂgaob ǀkha ra mû sadu ǃamkusib tsî sadu ǂgoms di ǁaposasiba Xristub ǃnâ xui-ao.

⁶O Xristub Jesub ǃKhūba du ge ǃkhōǃoa khami ǁîb ǃnâ tanisen re;

⁷ǁîb ǃnâ ǃnomaǃnomahe tsî omkhâihe hâse, tsî ǂgoms ǃnâ ǁapoǁapohe hâse, ǁkhāǁkhāhe du ge khami, î du ǁîs ǃnâ ǃnāsase ganganxa.

⁸ǂAnbasen re, î-i khoe-i xare-e tā ǃnarixū-i ase ǃgû-ū du, khoesi gā-aisib tsî ǁau ǂgaeǂhapus ǀkha khoen di ǂnûiǂgādi ǃoa, ǃhūbaib di tsoatsoan ǃoa, tsî Xristub ǃoa tama;

⁹ǁîb ǃnâb ǀoasib Elosib dib hoaba sorosise ǁan hâ xui-ao.

¹⁰Tsî du ge ǁîb ǃnâ dīǀoaǀoasa; ǁîb hoa ǂamkhoegu tsî ǀgaib di Danab ǃnâ;

¹¹ǁîb ǃnâ du ǁkhāti ǃgaohe hâ, ǃommi ǀkha dīhe tama ǃgaos ǀkha, ǁorexa ǁgans soros disa ǁguiǁnâs ǃnâ, Xristub di ǃgaos ǀkha,

¹²ǁāǁnâs ǃnâ ǁîb ǀkha ǁkhōhe hâǃâ, ǁîs ǃnâ du ǁkhāti ǁîb ǀkha khâi hâ ǂgomsa xu, Elob, ǁîba ǁō hâna xu ge ǂkhaiǂkhaib di sîsenni ǃoa;

¹³tsîb ge ǁkhāti sadu, dāsādi tsî ǃgaohe tama is sadu ǁgans dis ǃnâ ge ǁō hâ ido, ǁîb ǀkha ge ûi-ûi, tsî dāsādi hoade ge ǀûba du,

¹⁴tsîb ge sada ǃoagu ge hâ i ǃommi xoas ǂnûiǂgādi dis, sada ge mâǃoasa ge ǀari, tsî ǁîsa ge dībē, ǁîsa ǃgâuhaib ai ǃgâumâis ǀkha,

¹⁵tsîb ge ǂamsagu tsî ǀgaigu tsîna dantoa hâǃâ ǁîga ǂhaisase ge ǁgauǂui, tsîb ge ǁîb ǃnâ ǁîga ge dan.

¹⁶Î du khoe-i xare-i xa tā ǀgoraǃgâkaisen, ǂû-i ǃaromas kas, āxū-i ǃaromas kas, ǁâutsē-i ǃaromas kas, ǂkham ǁkhâgu ǃaromas kas, sâtsēgu ǃaromas kas hoasa;

¹⁷ǁîn ge a ǃgoaxa xūn di som; xawe soros ge a Xristub di.

¹⁸Khoe-i xare-e a-i tā gaoba du, ǁî-i di ǂâisa ǃoa ǃgamǃgamsens tsî ǀhomǃgāǃoabas ǃnâ, tātsē i mû tama xūn ǃnâ ra ǂgâ-i, tsî ǁause ǁgans di ǂâis xa ra khūkhūsen-i,

¹⁹tsî Danasa ǃkhōǀgaipe tama hâ-e, ǁîba xus soros hoasa, uniǁaedi tsî ǃgaeǁaedi âsa huihe tsî ǃkhōǀhaohe hâse ra ǀomkhâiba Eloba xu.

²⁰ǁNā-amaga, Xristub ǀkha du ga ǃhūbaib di tsoatsoade ǁōǁnâ hâo, tarexa du kha ǂnûiǂgādi ǀkha ra ǃgomǃgomhe, ǃhūbaib ǃnâ du ra gorose ûis ǁkhās xase?

²¹Nēti īdi: Tā tsâǀkhā, Tā tsâtsâ, Tā tsânana,

²²ǁîn hoan ge sîsenūs ǃnâ ra kāna, tsîn ge a khoen di mîmā tsî ǁkhāǁkhā;

²³tsîn ge gā-ai īsi-e ūhâ khami ra mûsen ǁî-eloǃoabas tsî ǃgamǃgamsens ǃnâ tsî soros ǁkhōsib ǃoagu hâb ǃnâ, xawen ge a harebeoǃnâ, tsîn ra ǁgansa ǁâǁâs ǀguisa hî.