Read Khoekhoegowab Koloseǁîn 3 Bible Online

Koloseǁîn 3 - Khoekhoegowab bible

Koloseǁîn 3

¹O Xristub ǀkha du ga khâi hâo, ǀgapise hâna ôa, ǁnāpab Xristub, Elob di amǀkhāb ǁôab ai ǂnôaba hâpa.

²ǀGapise hân xa ǂâiǂâisen, î du tā ǃhūbaib din xa ǂâiǂâisen;

³ǁō du ge xuige, tsî sadu ûib kom Xristub ǀkha Elob ǃnâ sâusase hâo.

⁴Xawe Xristub sada ûib ga ǂhaiǂhaiseno, o du ge ǁkhāti ǁîb ǀkha ǂkhaisib ǃnâ nîra ǂhai.

⁵ǃGam ǁnâi sadu uniǁaedi, ǃhūbaib ai hâde: ǀAib, ǃanuoǃnâsib, taotaosa hōǃâsendi, ǂkhaba turab tsî xūǃgunuxasib, ǁîb ge a ǁgôatsuiǁgoaǃoaba;

⁶ǁîn ǃaromab Elob ǁaiba ǁnâuǀnamoǃnâsib di ôan ǂama ra hāna;

⁷ǁîn ǃnâ du ǁkhāti sado gere ǃgûna, ǁîn ǃnâ du gere ûi ǃnubai.

⁸Î du nēsi ǁkhāti sado nēn hoana ǁguiǁnâ: ǁAib, ǁaixasib, ǂkhabasib, ǃkhāǃkhāb tsî ǀurixase sadu ams ǀkha ǃhoas tsîna.

⁹Tā ǂhumibagu; î du ǀoro khoeba ǁîb di dīgu ǀkha ǁhûǁnâ;

¹⁰î du ǀasa khoeba ana, ǂans ǃoa ra ǀasa kaiheba, ǁîba ge kurub di īsib ǃoa;

¹¹ǁîb ǃnâ i hâ tama: Grikeǁî-i kas, Jodeǁî-i kas, ǃgaohesab kas, ǃgaohesa tamab kas, ǁkhāǁkhāsa tamab kas, skitǁî-i kas, ǃgā-i kas, ǃnorasa-i kas hoasa; xawe Xristub ge a hoa tsî hoan ǃnâ hâ.

¹²Î du Elob di ǃkhōǂuibasensa tsî ǃanu tsî ǀnamsan ase ana: ǃNāb di ǀkhomxaǂgaosib, khoexasib, ǃgamǃgamsens, tsamtsiǃnâsib tsî ǃnūǃnâxasib tsîna;

¹³î du tanibagu, î du ǀûbagu, nē-i ga nau-i ǃoagu ǀauxū-e ūhâo; Xristub ge sado ǀûbas ǁkhās xase sado ǁkhāti dī.

¹⁴Î du nēn hoan ǂamai ǀnamma ǂgaeǂgā, ǁîb ge a dīǀoaǀoasib di ǃkhōǀhaoxū.

¹⁵Tsî Elob di ǂkhîb, ǁîb ǃoa du ǀgui soros ǃnâ ǂgaihe hâba, ab sadu ǂgaogu ǃnâ gao; î du ganganxa;

¹⁶î du Xristub di mîsa ǃkhū hâse sadu ǃnâ ǁan kai gā-aisib hoab ǃnâ; î du ǁkhāǁkhāgu, î du ǁnamagu psalmdi tsî karetsanadi tsî gagasi ǁnaetsanadi ǀkha, î du ǃKhūba ǀnamǀnamsase sadu ǂgaob ǃnâ ǁnaeba.

¹⁷Tsî mîdi tsî dīgu tsîn ǀkha du ga dīn, ǁîn hoana ǃKhūb Jesub di ǀons ǃnâ dī, î du Elob ǁGûba ǁîba xu gangan.

¹⁸Saso taraso, saso aoga ǃnaga hâba anu i hâ khami ǃKhūb ǃnâ.

¹⁹Sago aogo, sago tarade ǀnam, î go ǁîdi ǃoagu tā au-ausen.

²⁰Sadu ǀgôado, sadu îna ǁnâuǀnam hoa xūn ǃnâ; ǁîs a ǃKhūba ǃgâiba xuige.

²¹Sago ǁgûgo, sago ǀgôana tā ǁaiǁai, în tā ǂkhabuǂâi.

²²Sadu ǃgādo, sadu sorosi ǀhonkhoena ǁnâuǀnam hoa xūn ǃnâ, mûs ǃoabas ǀkha tama, khoena du nî ǃgâiǃgâibase, î du ǁîsa ǂgaob di ǀguiǃnâxasib tsî eloǃaoǃgâsib ǀkha dī;

²³î du dī du ran hoana ǂgaoba xu dī, ǃKhūba dības axase tsî khoena diba axase tama;

²⁴î du ǂan, ǃKhūba xu du nî ǀumisa mādawa-ams ase hō ǃkhaisa; ǃKhūb Xristuba du ra ǃoaba xui-ao.

²⁵Xawe ǂkhababa ga dī-i, ǁnā-i ge ǁî-i ge dī ǂkhabab di amǃnâsa nîra hō; tsî khoe-i ais ǃkhōǃoas ge hâ tama hâ.