Read Khoekhoegowab 1 Tesalonikaǁîn 1 Bible Online

1 Tesalonikaǁîn 1 - Khoekhoegowab bible

1 Tesalonikaǁîn 1

¹Pauluta tsî Silvanub tsî Timoteub tsîge. Tesalonikaǁîn ǀhaohâb, Elob ǁgûb tsî ǃKhūb Jesub Xristub ǃnâ hâba ǃoa: ǀKhomma ab hâǀkhā du, tsî ǂkhîba Elob sada Îb tsî ǃKhūb Jesub Xristuba xu!

²Sige ge mâ ǁaeb hoab ai Eloba sadu ǃaroma ra gangan, tsî ge ge ǀûs ose sadu xa ra ǂâi sige ǀgoredi ǃnâ;

³tsî ge ge ra ǂâi sadu ǂgoms di sîsenni xa, tsî sadu ǀnammi di xūreb xa, tsî sadu ǃâubasens di sâsasib xa, ǃKhūb Jesub Xristub ai du ūhâsa, sada Elob tsî ǁgûb aiǃâ;

⁴ǂan ge a xui-ao, Elob xa ǀnamhe hâ ǃgâsado, Elob xa du ǃkhōǂuibasenhe hâsa,

⁵os ge sige ǃgâiǂhôasa sadu tawa mîs ǀguis ǃnâ ī tama ge hâ i, xawes ge ǁkhāti ǀgaib tsî ǃAnu Gagab tsî ǀoasa ǂanǁaposis ǃnâ ge hâ i; sadu aitsama a ǂan khami, mati īgu ase ge sadu ǃaroma sadu ǃnâ ge hâ isa;

⁶tsî du ge sige tsî ǃKhūb di ǁgaeǁgae-ao kai, tsî du ge mîsa ǂgui ǁgâiǀāgu ǃnâ ǃgâiaǂgaob ǀkha ge ǃkhōǃoa ǃAnu Gagab ǃnâ;

⁷o du ge ǁnāti Masedoniab tsî Axajab tsîkha ǃnâ hâ ǂgom hân hoan di aiǁgau kai.

⁸Sado xus ge ǃKhūb mîsa ǂoa xui-ao, Masedoniab tsî Axajab tsîkha ǀguikha ǃnâ tama i tsî hoa ǃkhaidi tawas ge sadu ǂgoms Elob ai du ūhâsa ge ǂansa, xū-e ge nî ǁîs xa mîs ǂhâbasa tama hâs kōse.

⁹ǁÎ-aitsaman kom sadu xa ra ǂhôao mati ī ǂgâǃkhai-e ge ge sadu tawa ūhâ isa, tsî mati du ge ǁgôatsuiǁgoaga xu Elob ǃoa ǃhobasensa, ûitsama tsî ama-ai Eloba du nî ǃoabase,

¹⁰tsî du nî ǁîb di Ôaba ǀhomma xu ǃâuse, ǁō hâna xub ge ǂkhaiǂkhaib, Jesub, ǃgoaxa ǁaiba xu ra ore daba.