Read Khoekhoegowab 1 Tesalonikaǁîn 2 Bible Online

1 Tesalonikaǁîn 2 - Khoekhoegowab bible

1 Tesalonikaǁîn 2

¹Sadu aitsama a ǂan xui-ao, ǃgâsado, sige ǂgâǃkhaisa sadu tawa ǁau tamas ge isa;

²tsî Filipis tawa ge ge aibe tsūǀkhā tsî ge ǃkhāǃkhāhe, ǂan du a khami, xawe ge ge sige Elob ǃnâ ge ǃgâiaǂgao hâ i, Elob di ǃgâiǂhôasa ge nî kai mâǃoahes ǀkha sadu tawa ǃhoasa;

³sige ǁnamas ge ǂgaeǂhapus tsî ǃanuoǃnâsib tsî gāxaǃnâsiba xu hâ tama hâ i xui-ao;

⁴xawe Elob xa ǃâitsâhe hâse ge ge hōhe hâ i khami, ǃgâiǂhôasa ge nî ǂgomǃgâbahesa, ǁnāti ge ge ra ǃhoa, khoena ra ǃgâiǃgâibase tama i, tsî Elob sige ǂgaoba ra ǃâitsâba.

⁵Tātsē ge ge sige hînaxaǃnâ mîde ūǀkhī tama xui-ao, ǂan du a khami; tsî ge ge ǁkhāti ǃgū-aisa xūǃgunuxasib ǀkha sī tama: Elob ge a ti ǀhûǀguitimî-ao;

⁶tsî ge ge ǁkhāti khoen tawa ǃgôasi-e ôabasen tama ge i, sadu tawas karao, naun tawas karao, Xristub di apostelgu ase ge ga koasen ǁkhā xawe;

⁷xawe ge ge sadu ǁaegu khoexaǃnâse ge ī i, ǀgôakōǃgâ-aos ra ǁîs di ôana kōǃgâ khami;

⁸ǁnās ǁkhās xase ge ge kaise ǀnam du hâse ge māsenxa i, Elob di ǃgâiǂhôasa ge nî au dus ǀguisa hî tama i, tsî ge nî ǁkhāti sige ǀomdi ǂûde māsa, ǀnam du ge ge hâ i xui-ao.

⁹ǂÂiǂâisen du kom rao, ǃgâsado, sige sîsenni tsî sige ǀhupuǀhupusens tsîra xa; tsēs tsî tsuxub tsîra ge kom gere sîseno, ǀgui-i xare-i âdo ge ǃgomba tidese, tsî ge ge ǁnāti ǃgâiǂhôas Elob disa sadu ǃnâ gere aoǁnâ.

¹⁰Sadu ge a ǀhûǀguitimî-ao tsî Elob tsîn, matikō ǃanuse tsî ǂhauǃnâse tsî ūose ge ge sadu ǂgom hâdu tawa ī isa;

¹¹ǂan du a khami, mâ-i hoa-i âdo ge ge ǁgûb ra ǀgôan ǀkha dī khami ǁnama tsî ǁkhaeǂgao ǃkhaisa,

¹²tsî ge ge ǀhûǀguitimî ǃkhaisa, Elob, sado ǁîb di gaosib tsî ǂkhaisib ǃoa ra ǂgaiba anuba hâse du nî tanisen ǃkhaisa.

¹³ǁNā-amaga ge ge ǁkhāti ǀûs ose Eloba ra gangan, Elob mîs di aoǁnâsa du ge sige xu ǃkhōǃoa ǃnubai du ge khoen di mîs ase ǃkhōǃoa si tama i tsî (amases ī khami) Elob mîs ase ǃkhōǃoa si ǃkhaisa; ǁîs sadu ǂgom hâdu ǃnâ ǁkhāti ra sîsensa.

¹⁴Elob ǀhaohâgu, Xristub Jesub ǃnâ Judeab ǃnâ hâgu di ǁgaeǁgae-ao kai du ge, ǃgâsado, o du ge ǁkhā xū-e sadu ǀhaoǁgâuǁîgu xa ge tsâ, ǁîn ge Jodeǁîn xa tsâs ǁkhās khami;

¹⁵ǁîn, ǃKhūb Jesuba ǁkhāti ge ǃgamn tsî ǁîn di kēbo-aogu tsîna, tsî sige gere ǃgôaǃgonn, tsî Eloba ǃgâiǃgâi taman, tsî khoen hoan ǃoagu hân;

¹⁶sige ǀūben ǃoa ǃhoasa ra ǃkhâina, ǃgâiǃōn nîse; mâ ǁaeb hoab ain nî ǁoren ân di ǀnōba ǀoaǀoaga; tsî ǀnaib ge ǁaiba ǁîn ǂama ge hā ǀams kōse.

¹⁷Xawe sige, ǃgâsado, ǁaero-i kōse ge ge sado xu ǀgorahe hâ io ais ǃoa, xawe ǂgaob ǃoa tama, o ge ge ǁnās ǃgâ-ai kai turab ǀkha ge ǃhaeǃhaesen, sadu aisa ge nî mûse.

¹⁸ǁNā-amaga ge ge sadu tawa ge sī ǂgao hâ i, tita Pauluta, ǀgui ǃnās tsî nau ǃnāsa; xawe Satanni ge ge ǂhani ge.

¹⁹Mâ-e kha sige ǃâubasen-e, tsî ǃgâiaǂgao-e, tsî sige koasens di kron-e? Sa tamado kha ǁîdo ǃKhūb Jesub Xristub aiǃâ ǁîb di hās ǃnâ?

²⁰Ā, sadu kom a sige ǂkhaisi tsî ǃgâiaǂgao-o.