Read Khoekhoegowab 1 Tesalonikaǁîn 3 Bible Online

1 Tesalonikaǁîn 3 - Khoekhoegowab bible

1 Tesalonikaǁîn 3

¹ǁNā-amaga ge ge ǃaruǀî ge tani ǁoa i tsî ge ǂkhî, Atenes tawa ge nî ǀguri hâ kaihesa,

²tsî ge ge Timoteuba ge sî, sige ǃgâsab tsî Elob ǃgāb tsî sige ǀhaoǃoabasabeba Xristub di ǃgâiǂhôas ǃnâ, sadob nî ǀgaiǀgaise, tsî sadu ǂgoms xab nî ǁnama duse,

³khoe-i xare-i nē ǁgâiǀāgu ǃnâ ǁnopeǁnopehe tidega; ǁî-aitsama du a ǂan xui-ao, ǁîs ǃoa da mâihe hâ ǃkhaisa.

⁴Tsî sadu tawa ge ge hâo, o ge ge aimîba du, ǁgâiǀāhe da nîsa, ǁkhāti ī ge i khami, tsî du a ǂan khami.

⁵ǁNā-amaga ta ge ǁkhāti ǃaruǀî tani ǁoa i, tsî ge sî bi, sadu ǂgomsa ta nî ǁnâuǃāse, îb ga ǃâitsâ-aoba tā ǀnîsi ǃâitsâ du hâ, îb ga sige sîsenna tā ǀnîsi ǁau ti.

⁶Xawe nēsi, Timoteub ge sado xu sige ǃoa hā tsî sige ǂhôao sadu ǂgoms tsî ǀnammi tsîkha xa, tsî mati du hugaǀgui sige xa ǃgâise ra ǂâiǂâisen ǃkhaisa, tsî mati du ra tura ǃkhaisa, sige du nî mûse, sige ǁkhāti sado mû ǂgao hâ khami;

⁷o ge ge sadu ǃaroma ge ǁkhaeǂgaohe, ǃgâsado, sige ǁgâiǀāb tsî tsūǀkhāb hoab ǃnâ sadu di ǂgomsa xu.

⁸Nēsi ge sige a ûitsama, sadu ǃKhūb ǃnâ mâ amaga.

⁹Mâ gangan-e ge kha Eloba a mādawa-am ǁkhā sadu ǃaroma, ǁnā ǃgâiaǂgaob hoab, ǁîb ǀkha ge Elob aiǃâ sadu ǃaroma ra ǃgâiaǂgaoba?

¹⁰Tsēs tsî tsuxub tsîra ge kaise ra ǀgore, sadu aisa ge nî mûse, tsî ge nî sadu ǂgoms tawa tôasi hâna ǀarose.

¹¹Tsî sada Elob tsî ǁgûb ǁkhāb tsî sada ǃKhūb Jesub Xristuba, ab sige daoba sadu ǃoa unu!

¹²Îb ǃKhūba sado ǀaroǃnâ, îb ǀnamgub ǃnâ ǃnā kai du sadu ǁaegu tsî hoan ǃoa, sige ǁkhāti sadu ǃoa ī khami;

¹³sadu ǂgaogu nî ǀgaiǀgaihe tsî ūose īse ǃanusib ǃnâ, Elob tsî sada ǁGûb aiǃâ, sada ǃKhūb Jesub Xristub di hās ǃnâ ǁîb di ǃanun hoan ǀkha.