Read Khoekhoegowab 1 Tesalonikaǁîn 4 Bible Online

1 Tesalonikaǁîn 4 - Khoekhoegowab bible

1 Tesalonikaǁîn 4

¹ǃAruǀî, ǃgâsado, sige ge ǀkhoma tsî ǃKhūb Jesub ǃnâ ra ǁnama du, sige xu du ge, mati du nî tanisen tsî Eloba ǂkhîǂkhîs ǁkhās khami du ǃaruǀîǀgui nî ǃnā ti;

²ǂan du a xui-ao, mâ mîmāde ge ǃKhūb Jesuba xu gere mā du ǃkhaisa.

³Nēs ge a Elob ǂâi xui-ao, sadu ǃanuǃanusib, ǀaiba xu du nî ūdawasen ǃkhaisa,

⁴tsî mâ-i hoa-i nî ǂan ǃkhaisa, mati i nî ǁî-i soasa ǃanusib tsî ǃgôasib ǃnâ ūhâsa;

⁵ǂkhaba turab di gongonǃnâdi ǃnâ tama ǀūben khami, Eloba ǂan tamana;

⁶a-i khoe-e ǁî-i ǃgâsa-e tā dāǃgâ, î-i tā ǂharugub ǃnâ gāxaǃnâsise sîsenū i; ǃKhūb nē xūn hoan ǂama a ǀkhao-ao xuige, aibe ge ge ǁkhāti sado mîba tsî ǀhûǀguitimîba khami.

⁷Elob ǃanuoǃnâsib ǃoa ǂgai da tama xui-ao, tsîb ge ǃanuǃanusis ǃoa ge ǂgai da.

⁸ǁNā-amaga nē-e ra ǃharaxū-i ge khoe-e ǃharaxū tama, tsî i ge Elob, ǁkhāti ǁîb di ǃAnu Gagaba sadu ǃnâ ge māba ra ǃharaxū.

⁹Tsî ǃgâsaǀnamgub xa ta nî xoaba dusa ta ǂhâba tama; aitsama du Elob xa ǁkhāǁkhāhe hâ xui-ao, ǀnamgu du nîsa;

¹⁰tsî du ge ǁîsa ǁkhāti ra dī Masedoniab ǃnâ hâ ǃgâsan hoan tawa; xawe ge ge ra ǁnama du, ǃgâsado, ǃaruǀîǀgui du nî ǁîs ǃnâ ǃnā ǃkhaisa;

¹¹î du ǃnoeǃnoesen, î du ǃnōsase hâ, î du sadu dina dī, î du sadu ǃomgu ǂhanigu ǀkha sîsen, sado ge gere mîmā khami;

¹²îǂhôase du nî tanisense ǃauga hân tawa, tsî xū-i xare-e du ǂhâ tidese.

¹³Tsî ǂgao tama ta hâ, ǃgâsado, ǀūǂamse du nî hâsa kā gen xa, naun ǃâubasen-i xare-e ūhâ tama hân khami du ǃoa tidega.

¹⁴ǂGom da karao, Jesub ge ǁō tsî khâi ǃkhaisa, ob kom Eloba ǁnās ǁkhās khami ǁkhāti Jesub ǃnâ ge kāna ǁîb ǀkha nîra ūhāo.

¹⁵Nēsa ge ge ǃKhūb mî-i ase ra mîba du, sada, ǃKhūb di hās ǃnâ ûitsamase ǃgau hâda ge kā gena aiǃâ hâba tide ǃkhaisa.

¹⁶ǃKhūb ǂûb ge ǃgari ǂgais tsî ǂamǀhomǃgāb di dommi tsî Elob di ǀgapadas ǀkha ǀhomma xu nîra ǁgôaxa xui-ao; on ge Xristub ǃnâ ge ǁōna aibe nîra khâi;

¹⁷ǁnās khaoǃgâ da sada ûitsamase ǃgau hâda ǁkhā ǁaeb ǃnâ ǁîn ǀkha nîra ǂgaeǃapahe ǀnanudi ǃnâ, ǃKhūba da nî ǃoase ǂoab ǃnâ; o da nîra ǁnāti hugaǀgui ǃKhūb ǀkha hâ.

¹⁸ǁNā-amaga nē mîdi ǀkha ǁkhaeǂgaogu re.