Read Khoekhoegowab 1 Tesalonikaǁîn 5 Bible Online

1 Tesalonikaǁîn 5 - Khoekhoegowab bible

1 Tesalonikaǁîn 5

¹Tsî ǁaegu tsî kamagu xa ta nî xoaba dusa ta ǂhâba tama, ǃgâsado;

²aitsama du ǂōrisase a ǂan xui-ao, ǃKhūb di tsēs nî ǃnari-ao-i tsuxub ǃnâ ra hās ǁkhās khami hā ǃkhaisa.

³Mîn karao: ǂKhîb ge hâ tsî tsūǃgâ-i a ǀkhai ǃnubai i ǃhae ǁgaoǁgaosi-e ǁîn ǂama nîra hā xui-ao, ǀgamǀkhā hâ taras ǂaman ra ǁoratsûna hās ǁkhās xase tsîn ge ǁhâxū tide.

⁴Xawe du ge sado ǃkhaenab ǃnâ hâ tama hâ, ǃgâsado, ob ǁnā tsēsa ǃnari-aose ǃkhō du tide.

⁵Sadu hoadu ge a ǃnâb di ôa tsî a tsēs di ôa; sada ge tsuxub di tsî ǃkhaenab di tama hâ.

⁶A da ǁnâi tā ǁom naun khami, î da ǂkhaikari tsî ǀkhaiǃnâse hâ.

⁷ǁOm ran kom tsuxub ǃnâ ra ǁomo, tsî ǀhoro hân kom tsuxub ǃnâ ǀhoro hâo;

⁸xawe a da sada tsēs dida ǀkhaiǃnâse hâ, ǂgoms tsî ǀnammi tsîra di ǁkhaib ǁâsaraba ǂgaeǂgā hâse, tsî toroǀgapas ase ǃgâiǃōb di ǃâubasensa ǀgapa hâse.

⁹Elob sada ǁaib ǃoa mâi tama hâ xui-ao, tsîb ge ge mâi da, ǃgâiǃōsiba da nî ūhâse sada ǃKhūb Jesub Xristuba xu;

¹⁰ǁîb, sada ge ǁōbaba, î da ga ǀhûpe ǁîb ǀkha ûi, ǂkhai da ga hâs, ǁom da ga hâs hoasa.

¹¹ǁNā-amaga ǁnamagu re, î-i nē-e nau-e ǂnubikhâi, ǁkhāti du ra dī khami.

¹²Tsî ge ge ra ǀkhoma du, ǃgâsado, mûǂan re sadu ǃnâ ra sîsenga, tsî ǃKhūb ǃnâ sado ra ai-aibaga, tsî sado ra ǁnamaga;

¹³î du ǁîga ǁîgu sîsenni ǃaroma ǀnammi ǃnâ kaise ǀgapiǃgôa re; î du ǂkhîbagu re.

¹⁴Tsî ge ge ra ǁnama du, ǃgâsado, domoǃnâna ǂgōǀau, ǂkhabuǂâi hâna ǁkhaeǂgao, ǂkhabusana ǂkhâǃnâ î du ǃnūǃnâxa hoan ǃoa.

¹⁵Kō, î-i khoe-i xare-e khoe-e ǂkhaba-i ama ǂkhaba-e tā dīdawa-am; î du hugaǀgui ǃgâiba sauruǃgon sadu ǁaegu tsî hoan ǃoa.

¹⁶Hukaǀgui ǃgâiaǂgao.

¹⁷ǀÛs ose ǀgore.

¹⁸Gangan hoa xūn ǃnâ; nēs a Elob di ǂâi Xristub Jesub ǃnâ sadu ǂama xuige.

¹⁹Gagaba tā ǀari.

²⁰Kēboside tā ǃharaxū.

²¹Xūn hoana ǃâitsâ, î du ǃgâiba ūhâbasen,

²²hoa ǂkhaba īsina xu ūdawasen.

²³Tsî ǂkhîb di Elob ǂûba ab hoaragase ǃanuǃanu du; în sadu hoaraga gagas tsî ǀoms tsî soros tsîna ūose sâuhe sada ǃKhūb Jesub Xristub di hās ǃnâ!

²⁴ǂGomǂgomsab ge a, sado ra ǂgaib, ǁîsa ǁkhāti nîra dība.

²⁵ǃGâsado, ǀgoreba ge.

²⁶ǃGâsan hoana ǃanu ǁoa-i ǀkha ǁoa.

²⁷Nūba du ta ra ǃKhūb tawa, nē sîǂkhanisa du nî hoa ǃgâsana khomai kaisa.

²⁸ǀKhommi sada ǃKhūb Jesub Xristub diba ab sadu ǀkha hâ! Amen.