Read Khoekhoegowab Josuab 1 Bible Online

Josuab 1 - Khoekhoegowab bible

Josuab 1

¹Tsî i ge ge ī, Moseb, ǃKhūb di ǃgāb di ǁōb khaoǃgâ, ob ge ǃKhūba Josuab Nunni ôab, Moseb di ǃgāba ǃoa ge mî:

²Ti ǃgāb Moseb ge go ǁō, xuige khâi îts satsa Jordanna-ū doeǃgâu, sats tsî nē ǁaes hoas tsîdo, ǁnā ǃhūb Israeli ôana ta tita ra māb ǃoa.

³Mâ ǃkhais, sadu di ǂaiǃnāb ga ǁîs ai dās hoasa ta ge sado ge mā, Moseb ǃoa ta ge ǃhoas xase.

⁴ǃGaroǃhūb tsî nē Libanonna xu ǁnā ǃāb, Eufrat kōseb ge Hetiǁîn di ǃhūb hoaba tsî Kaihurib, sores ra ǂgâǀî ǁgoeb kōse nî sadu di ǀkhari.

⁵Khoe-i xare-i ge sa ais aiǃâ mâ ǁkhā tide, sa ûib di tsēdi hoadi kōse; Moseb ǀkha ta ge hâ is ǁkhās xase ta ge sa ǀkha nîra hâ; tita ge ǁnā tsi tide tsî ǁnāxū tsi tide.

⁶ǀGaisa îts ǃgâiǂâixa! Sats ge nē ǁaesa ǁnā ǃhūb, ǁîn di îga ta ge mā nî ta nî ti nūbaba nîra ǀumi kai.

⁷ǁNâi ǀgaisas ǀguisa hî, îts îbe ǃgâiǂâixa î ǂan, îts dī ǁnā ǂhanub, Moseb, ti ǃgāb ge mîmā tsib ǃoa, îts ǁîba xu tā ǂgō amǀkhāb ais kao, ǁareǀkhāb ais kao, ǁnâuǃāxasets nî dīse sa sîsenga mâ ǃkhai-i, ǁî-i ǃoats ga ǃgû-i hoa-i tawa.

⁸ǂKhanis nē ǂhanub disa as tā sa amsa xu bē, îts ǁîs xa ǂâiǂâisen tsēa tsî tsuxuba, ǂan tsîts nî dīse ǁîs ǃnâ xoahe hân hoan ǃoa; ǁnāǃnubaits ge sa daoga nî ǃgâiǃgâ kai, tsîts ge ǁnâuǃāxase nî sîsen xuige.

⁹Tita mîmā tsi tama ta hâ ǁîsa? ǁNâi ǀgaisa îts ǃgâiǂâixa, îts tā ǃhuri îts tā burugâ; ǃKhūb, sa Elob ge sa ǀkha hâ, mapats ga ǃgûs hoasa.

¹⁰ǃNubaib ge Josuaba ǃoabasabegu ǁaes diga mîmā tsî ge mî:

¹¹ǁGoeǃkhaisa ǃgûǃganu î go ǁaesa mîmā: Daob di ǂûna ǂhomibasen, ǀnî ǃnona tsēdi khaoǃgâ du ge nē Jordanna nî ǃgâu xuige, ǂgâ tsî du nî ǀumise ǁnā ǃhūb, ǃKhūb, sadu Elob nî mā dub ǃnâ, ǀumi bi du nîga.

¹²Tsî Josuab ge Rubenǁîn tsî Gadǁîn tsî ǃkhare ǃhaos Manaseb dis ǃoa ǃhoa tsî ge mî:

¹³ǂÂi, ǁnā mîs Moseb, ǃKhūb di ǃgāb ge mîmā dus xa, mî rase: ǃKhūb, sadu Elob ge sâba ra mā du, tsîb ge nē ǃhūba ra mā du.

¹⁴An sago di taradi tsî sadu di ǀgôaron tsî sadu di ǀgoan tsîna hâ, nē ǃhūb Moseb ge Jordanǃāb nē ǃanib ai mā dub ǃnâ; xawe sago ge ǁâtanisen hâse sago ǃgâsagu di ais aiǃâ nî ǃgâu, sago ǃkham ǁkhā ǁē-aogo hoago, ǁîga go nî huise;

¹⁵ǃKhūb nî sago di ǃgâsaga sâba mās kōse sago khami, ǁîgu on nî ǁnā ǃhūb, ǃKhūb, sago Elob nî ǁîga māba ǀumise ūhâs kōse; ǃnubai go ge ǁkhawa nî oa ǃhūb, sago ǀumis dib ǃoa, tsî go ge ǁnāb, Moseb, ǃKhūb di ǃgāb ge mā goba ǀumise nî ūhâ, Jordanǃāb nē ǃanib ai, sores ra ǁhai ǀkhāb ai.

¹⁶ǁGoasi gu ge Josuaba ǃeream tsî ge mî: Sats go mîmā gen hoana ge nî dī tsî sîǀî gets ka ǃkhai-i hoa-i ǃoa ge nî ǃgû.

¹⁷Hoan ǃnâ ge ge Moseba ǁnâuǀnam is ǁkhās xase ge ge satsa nî ǁnâuǀnam, nēs ǀguis: Ab ǃKhūb, sada Eloba sa ǀkha hâ, Moseb ǀkhab ge hâ i khami.

¹⁸Mâ khoeb hoab, sa mîmāsa ga mâǃoab tsî sa mîde ga ǁnâu tama ib, ǁîbats ga mîmān hoan ǃnâ, ǁîb ge nî ǃgamhe; xuige ǀgaisa îts ǃgâiǂâixa.