Read Khoekhoegowab Josuab 10 Bible Online

Josuab 10 - Khoekhoegowab bible

Josuab 10

¹Tsî i ge ge ī, Adoni-Sedeki Jerusalems di gao-aob ge ǁnâuo, Josuab ge Aisa ū tsî ǀâxare si ǃkhaisa, tsî Ais tsî gao-aob âs ǀkhab ge Jerixos tsî gao-aob âs ǀkhab ge dīs ǁkhās xase ge dī ǃkhaisa, tsî Gibeons di ǁansaben Israeli ǀkha ǂkhîba ge dī tsîn ǁîn ǁaegu hâ ǃkhaisa,

²on ge kaise ge ǃao, Gibeons ge kai ǃā i xui-ao, gao-aosi ǃādi di ǀguis khami; ā, Ais ǃgâ-ais ge ǁîsa ge kai i, tsî ǁîs di khoegu ge ge ǀgaisa i.

³ǁNā-amagab ge Adoni-Sedeki, Jerusalems di gao-aoba ge sî Hohammi, Hebrons di gao-aob ǃoa tsî Pirammi, Jarmuts di gao-aob ǃoa tsî Jafiab, Laxis di gao-aob ǃoa tsî Debiri, Eglons di gao-aob ǃoa mî raǃâ:

⁴ǃApahā tita ǁga î go hui te, î ge Gibeonsa ǂnau, Josuab tsî Israeli ôan ǀkhas go ǂkhîba dī amaga.

⁵ǃNubai gu ge ǀhao tsî ge ǃapa koro gao-aogu Amorǁîn diga: Jerusalems di gao-aob tsî Hebrons di gao-aob tsî Jarmuts di gao-aob tsî Laxis di gao-aob tsî Eglons di gao-aob tsîga, ǁîgu tsî ǁîgu di toroǂnubidi hoade; tsîn ge Gibeonsa xāǂgā tsî ǁîsa ge ǃkhamū.

⁶O gu ge Gibeons di aoga sîsabega ge sî Josuab ǁga ǁgoeǃkhais ǃnâ Gilgals tawa, mî raǃâ: Sa ǃomkha tā ǂgaedawa sa ǃgāda xu, ǃhaese ǃapahā sida ǁga îts ore da, îts hui da, Amorǁîn di gao-aogu, ǃhommi ai ǁan hâgu hoagu ge sida ǃoagu go ǀhao xuige.

⁷ǃNubaib ge Josuaba Gilgalsa xu ge ǃapa, ǁîb tsî toroǁaes hoas ǁîb ǀkha tsî ǃkham ǁkhā ǁē-aogu hoaga.

⁸ǃKhūb ge Josuab ǃoa mî xui-ao: ǁÎna tā ǃao, sa ǃomǁae ta ge ǁîna go mā xuige; khoe-i xare-i ân ge sa ais aiǃâ mâ ǁkhā tide.

⁹Nētib ge Josuaba ǃhaese ǁîn ai ge hā; tsuxub hoabab ge Gilgalsa xu gere hāǃapa.

¹⁰Tsî ǃKhūb ge ǁîna Israeli di ais aiǃâ ge ǃhuriǃhuri; ob ge Gibeons tawa ǁîna kai ǂnaus ǀkha ge ǂnau, tsîb ge ǁîna Bet-Horons ǃoa gau daob ai ge ǃgôaǃgon, tsîb ge ǁîna ge ǂnau Asekas kōse tsî Makedas kōse.

¹¹Tsî i ge ge ī, Israeli di ais aiǃân ge ǁhâo, ǁgôaǃkhais Bet-Horons dis ai hâǃâ, ob ge ǃKhūba kai ǀuide ǀhomma xu ǁîn ai ge aoǁnâ Asekas kōse, on ge ge ǁō; ǁîn ǃnareǀuidi xa ge ǁōn ge ǁnān, Israeli ôan xa gôab ǀkha ge ǃgamhen ǃgâ-ai ge ǂgui i.

¹²ǃNubaib ge Josuaba ǃKhūb ǀkha ge ǃhoa, ǃKhūb ge Amorǁîna Israeli ôan di ais aiǃâ māǁnâ tsēs ai, tsîb ge Israeli di mûdi aiǃâ ge mî: Sorese, ǂkhîse mâ Gibeons tawa, tsî sats ǁkhâtse, ǃgoaǃnāb Ajalons dib ǃnâ!

¹³Os ge soresa ǃnōsase ge mâ tsî ǁkhâb ge ge mâhâhâ, ǁaes ge khākhoen âs tawa ǀkhaobasens kōse. Nēsa xoahe tamas hâ ǂhanu-aib di ǂkhanis ǃnâ? Tsîs ge soresa ǀhommi ǁaegu ge mâ i, tsîs ge ǂgâsa ǃhaeba tama ge i, ǁaupe ǀoasa tsēs kōse.

¹⁴Tsî ǀnî tsēs xares ge nē tsēs khami ī tama ge hâ i ǁîs aiǃâ tsî ǁîs khaoǃgâ, ǃKhūb ge khoeb di domma ǁnâu-am hâ isa; ǃKhūb ge Israela ǃkhamba xui-ao.

¹⁵ǁGoasib ge Josuaba ge oa tsî hoaraga Israeli ǁîb ǀkha, ǁgoeǃkhais Gilgals tawa.

¹⁶Tsî ǁnā koro gao-aogu ge ǃhū tsî ge gaugausen Makedas tawa hâ ǁhoab ǃnâ.

¹⁷Ob ge Josuaba ge ǂhôahe, ǁnā koro gao-aogu ge Makedas tawa hâ ǁhoab ǃnâ hōhe ti.

¹⁸Ob ge Josuaba ge mî: Kai ǀuide gaba ǁhoab di ams aiǃâ, î du khoega mâi ǁîb aiǃâ, ǁîga gu nî ǃûise.

¹⁹Xawe sado tā mâ, î du sadu di khākhoena sauruǃgon, î du ǁîn di ǂareba ǂnau; tān ǁîn di ǃādi ǃnā hā, ǃKhūb sadu Elob ǁîna sadu ǃomǁae ge mā xuige.

²⁰Tsî i ge ge ī, Josuab tsî Israeli ôan tsîn ge ǁîna ǂnauǂkhôatoao, hîǀhuruhen ges kōse, tsî ǁîn xa ge ǃgaun ge ǁaposa ǃādi ǃnâ sīo,

²¹os ge hoaraga ǁaesa Josuab ǃoa ge oa ǁgoeǃkhais ǃnâ Makedas tawa ǂkhîb ǃnâ; khoe-i xare-i ge ǁî-i di namsa gongon tama ge i Israeliǀî.

²²ǁNās khaoǃgâb ge Josuaba ge mî: ǁHoaba ǁkhowa-am î du ǁnā koro gao-aoga tita ǃoa ūǂoaxa ǁnā ǁhoaba xu.

²³On ge ǁnāti dī tsî ǁîb ǃoa ǁnā koro gao-aoga ge ūǂoaxa ǁhoaba xu: Jerusalems di gao-aob tsî Hebrons di gao-aob tsî Jarmuts di gao-aob tsî Laxis di gao-aob tsî Eglons di gao-aob tsîga.

²⁴Tsî i ge ge ī, ǁnā gao-aogan ge Josuab ǃoa ūǂoaxao, ob ge Josuaba Israeli di aogu hoaga ǂgai tsî toroǁaes di ǂamsagu, ǁîb ǀkha ge ǃgû hâ igu ǃoa ge mî: Dāǀgū î go sago di ǂaide ǂnûi nē gao-aogu di ǃaogu ai. O gu ge dāǀgū tsî ǂaidi âga ǁîgu di ǃaogu ai ge ǂnûi.

²⁵ǃNubaib ge Josuaba ǁîgu ǃoa ge mî: Tā ǃao î go tā ǃhuri, ǀgaisa î go ǃgâiǂâixa; nētib ge ǃKhūba sago khākhoen, ǁîna go ra ǃkhamūn hoan ǀkha nîra dī xuige.

²⁶Tsî Josuab ge ǁnās khaoǃgâ ǁîga ǂnau, tsî ge ǃgam gu, tsîb ge ǁîga koro haigu ai ge ǂgāmâi; tsî gu ge haigu ai ǃuis kōse ge ǂgāmâihe hâse mâ.

²⁷Tsî i ge sores ra ǂgâ ǁaeb ai ge ī, ob ge Josuaba ge mîmā, haiga xu gu nî ūǁnâhesa, tsîn ge ǁîga ǁîb ǃnâ gu go gaugausen hâ i ǁhoab ǃnâ ge aoǂgā, tsîn ge kai ǀuide ǁhoab di ams ai ge ǂnûi, nētsēs kōse hâde.

²⁸ǁNā tsēs ǁkhās aib ge Josuaba ǁkhāti Makedasa ū tsî ge ǂnau si gôab di ǀāb ǀkha; ǁnās tawab ge gao-aob âsa ge ǀâxare tsî ǁîs ǂûs tsî mâ ǀoms, ǁîs ǃnâ hâs hoasa, khoe-i xare-eb ge ǃgau tama is kōse, tsîb ge Makedas di gao-aoba ge dī-ū, Jerixos di gao-aobab ge dī-ū xase.

²⁹ǃNubaib ge Josuab tsî hoaraga Israeli, ǁîb ǀkha hâba ge doeǃganu Makedasa xu Libnas kōse; tsîb ge Libnas ǃoagu ge ǃkham.

³⁰Tsî ǃKhūb ge ǁîs ona Israeli ǃomǁae ge mā gao-aob âs ǀkha; tsîb ge ǁîsa gôab di ǀāb ǀkha ge ǂnau tsî mâ ǀoms hoas, ǁîs ǃnâ hâsa; tsîb ge ǁîs ǃnâ khoe-i xare-e ǃgau tama; tsîb ge ǁîs di gao-aoba ge dī-ū, Jerixos di gao-aobab ge dī-ū xase.

³¹ǃNubaib ge Josuaba aiǃâb ǃoa ge doe tsî Israeli hoaba ǁîb ǀkha Libnasa xu Laxis kōse; tsîb ge ǁîsa xāǂgā tsî ǁîs ǃoagu ge ǃkham.

³²Tsî ǃKhūb ge Laxisa Israeli ǃomǁae ge mā; tsîb ge ǁîsa ge ū ǀgamǁî tsēs ai, tsîb ge ǁîsa ge ǂnau gôab di ǀāb ǀkha tsî mâ ǀoms hoas ǁîs ǃnâ hâsa, Libnasab ge dī-ūn hoan ǃoa.

³³ǃNubaib ge Horammi, Gesers di gao-aoba ge ǂnauǂui, Laxisab nî huiga; xawe Josuab ge ǁîb tsî ǁîb di ǁaesa ge ǂnau, khoe-i xare-eb ge ǃgau tama is kōse.

³⁴Tsî Josuab ge aiǃâb ǃoa Laxisa xu Eglons kōse ge doe tsî Israeli hoaba ǁîb ǀkha; tsîb ge ǁîsa xāǂgā tsî ge ǃkhamū si.

³⁵Tsîn ge ǁnā tsēs ǁkhās ai ǁîsa ū tsî ge ǂnau si gôab di ǀāb ǀkha, tsî mâ ǀoms hoas, ǁîs ǃnâ hâsab ge ǁnā tsēs ǁkhās ai ge ǀâxare, Laxisab ge dī-ūs ǁkhās xase.

³⁶ǁNās khaoǃgâb ge Josuaba ge doeǃapa tsî hoaraga Israela ǁîb ǀkha Eglonsa xu Hebrons ǁga, tsîn ge ǁîsa ge ǃkhamū.

³⁷Tsîn ge ǁîsa ū tsî ge ǂnau si gôab di ǀāb ǀkha tsî ǁîs di gao-aob tsî ǁîs di ǃādi hoadi tsî mâ ǀoms hoas, ǁîdi ǃnâ hâsa; khoe-i xare-eb ge ǃgau tama, Eglonsab ge dī-ūs ǁkhās xase; tsîb ge ǁîsa ge ǀâxare tsî mâ ǀoms hoas ǁîs ǃnâ hâsa.

³⁸ǃNubaib ge Josuaba ge dabasen Debirs ǃoa tsî hoaraga Israela ǁîb ǀkha, tsîb ge ǁîsa ge ǃkhamū.

³⁹Tsîb ge ǁîsa ge ū, gao-aob âs ǀkha tsî ǁîs di ǃādi hoadi ǀkha, tsîn ge ǁîsa gôab di ǀāb ǀkha ǂnau tsî mâ ǀoms hoas ǁîs ǃnâ hâsa ge ǀâxare; tsîb ge khoe-i xare-e ǃgau tama ge i, Hebronsab ge dī-ūs ǁkhās xaseb ge ǁkhāti Debirs tsî ǁîs di gao-aoba ge dī-ū, tsî Libnas tsî ǁîs di gao-aobab ge dī-ūs ǁkhās khami.

⁴⁰Nētib ge Josuaba hoaraga ǃhūba ge ǂnau: ǃHommi tsî ǃkhawagas tsî ǃgoaǃkhaidi tsî ǁgamdâuǃkhaidi tsî ǁîn di gao-aogu hoaga, tsîb ge khoe-i xare-e ǃgau tama hâ; ǀomsa ūhân hoanab ge ge ǀâxare, ǃKhūb, Israeli di Elob ge mîmā khami.

⁴¹Tsî Josuab ge ǁîna Kades-Barneasa xu Gasas kōse ge ǂnau; tsî hoaraga Gosenǃhūb ona Gibeons kōse.

⁴²Tsî Josuab ge nē gao-aogu hoagu tsî ǁîgu di ǃhūba ǀgui ǃnās ai ge ū; ǃKhūb, Israeli di Elob ge Israela ǃkhamba xui-ao.

⁴³ǃNubaib ge Josuaba ǁkhawa ge oa tsî hoaraga Israela ǁîb ǀkha ǁgoeǃkhais ǃoa Gilgals tawa.