Read Khoekhoegowab Josuab 11 Bible Online

Josuab 11 - Khoekhoegowab bible

Josuab 11

¹ǁNās khaoǃgâ i ge ge ī, Jabinni, Hasors di gao-aob ge ǁnâuo, ob ge Jobab, Madons di gao-aob ǃoa ge sî tsî Simrons di gao-aob ǃoa tsî Axsafs di gao-aob ǃoa.

²Tsî ǁnā gao-aogu ǀapasǀî ǃhommi ai tsî Kineretsa xu ǃkhawagasǀî tsî ǃgoaǃnāb ǃnâ tsî Nafot-Dors ǃnâ hurib amǃgâ hâgu ǃoa;

³tsî Kanaanǁîn ǃoa aiǂoasǀî tsî huriǂoasǀî hân tsî Amorǁîn, Hetiǁîn, Perisiǁîn, Jebusǁîn, ǃhommi ai hân, tsî Hiviǁîn, Hermonni ǃgao hân, Mispaǃhūb ǃnâ.

⁴Tsîn ge nēna ge ǂoa tsî ǂnubidi ân hoadi ǁîn ǀkha, kai ǁaes, ǀgopab, hurib amǃgâ ǁgoeb a ǂgui khami; tsî kaise ǂgui hān tsî kunidi tsîn ǀkha.

⁵Nē gao-aogu hoagu ge ǀhû tsî hā tsî Meroms ǁgamgu tawa ge ǁgoe, Israelan nî ǃkhamūse.

⁶Ob ge ǃKhūba Josuab ǃoa ge mî: Tā ǃao aidi ân aiǃâ, ǁari, nē ǁaeb ǁkhāb ai ta ge tita ǁîna hoatsama ǃgamhe hâse nîra mā Israeli di ais aiǃâ. ǁÎn di hāgats ge nî ǃhomǃhom tsî ǁîn di kunide ǀaes ǀkha nî khauǃkhū.

⁷Ob ge Josuab tsî toroǁaes hoas ǁîb ǀkha hâsa ǃnapetamase Meroms ǁgamgu tawa ǁîna hāǃgâ tsî ge ǁnāǂam.

⁸Tsî ǃKhūb ge ǁîna Israeli ǃomǁae ge mā, tsîn ge ǁîna ge ǂnau, tsîn ge ǁîna ge sauruǃgon Sidons kais kōse tsî Misrefot-Majims kōse tsî ǃgoaǃnāb Mispeb kōse aiǂoasǀî, tsîn ge ǁîna ge ǂnau khoe-i xare-i ǁîna xu ǃgau tama ge is kōse.

⁹Ob ge Josuaba ǁîna ge dī-ū, ǃKhūb ge ǁîba mîba khami: Hān âbab ge ge ǃhomǃhom, tsî kunidi ânab ge ǀaes ǀkha ge khauǃkhū.

¹⁰Tsî Josuab ge ǁkhā ǁaeb ai oa tsî Hasorsa ge ū; tsî gao-aob âbab ge gôab ǀkha ge ǂnau, Hasors ge aibe nē gaosidi hoadi di dana i xui-ao.

¹¹Tsîn ge mâ ǀoms ǁîs ǃnâ hâs hoasa gôab di ǀāb ǀkha ge ǂnau, ǁîsa ra ǀâxareǃâ; xū-i, ǀomsa ūhâ-i xare-i ge ǃgau tama; tsî Hasorsab ge ǀaes ǀkha ge khauǃkhū.

¹²Tsî Josuab ge nē gao-aogu di ǃādi hoade ge ū tsî ǁîdi di gao-aoga, tsîb ge ǁîna gôab di ǀāb ǀkha ge ǂnau, ǁîna ra ǀâxareǃâ, Moseb, ǃKhūb di ǃgāb ge mîmā xase.

¹³ǁNā ǃādi, ǁîdi di ǃnomdi ai mâdi ǀguiden ge Israelǁîna khauǃkhū tama, Hasors ǀguis, ǁîsab ge Josuaba ge khauǃkhū.

¹⁴Tsî nē ǃādi di ǁkhâuǁnâs hoas tsî ǀgoan tsînan ge Israelǁîna ge ǀâbasen; khoen ǀguinan ge gôab di ǀāb ǀkha ge ǂnau, ǁînan ge hîkākās kōse; xū-i, ǀomsa ūhâ-i xare-i ge ǃgau tama.

¹⁵ǃKhūb ge Moseb, ǃgāb âba mîmās ǁkhās xaseb ge Moseba Josuaba ge mîmā; tsî ǁnātib ge Josuaba ge dī. ǁÎb ge ǀgui mî-i xare-e ǁnāxūǂui tama, ǃKhūb ge Moseba mîmān hoan xa.

¹⁶Nētib ge Josuaba ǁnā ǃhūb hoaba ge ū, ǃhommi tsî hoaraga ǃkhawagas tsî hoaraga Gosenǃhūb tsî ǃgoaǃnāb tsî ǂgās tsî Israeli ǃhommi tsî ǃgam ǃkhaidi âb tsîna.

¹⁷ǃGoraǃhommi Seiri ǃoa ǃapagauba xu Baal-Gads kōse Libanonni di ǃgoaǃnāb kōse Hermonǃhommi ǃgao, ǁîn di gao-aogu hoagu ona ū tsîb ge ǁîga ǂnau tsî ge ǃgam gu.

¹⁸ǂGui tsēdeb ge Josuaba nē gao-aogu hoagu ǀkha toroba gere dī.

¹⁹ǀNî ǃās xares ge hâ tama ge hâ i, Israeli ôan ǀkha ǂkhîba ge dīsa, Hiviǁîn Gibeons tawa ǁan hân ǀguin osen ge hoade torob ǀkha ge ū.

²⁰ǃKhūba xus ge ǁîsa ge ī, ǂgaob ân ge karokarohe ǃkhaisa, Israeli ôanan ge torob ǀkha ǃgûǃoa ǃkhaisa, ǁînab nî ǀâxarega, ǀkhomman hō tide tsî ǁînab nî hîkākāse, ǃKhūb ge Moseba mîmā khami.

²¹Tsî ǁnā ǁaeb ǁkhāb aib ge Josuaba hā tsî Anakǁîna ǃhomma xu ge ǃhomǂui tsî Hebronsa xu tsî Debirsa xu tsî Anabsa xu tsî Judab di ǃhommi hoaragaba xu tsî Israeli di ǃhommi hoaragaba xu: Josuab ge ǁîna ǃādi ân ǀkha ge ǀâxare.

²²Anakǁîn xa i ge khoe-i xare-e ǃgau tama Israeli ôan di ǃhūb ǃnâ; Gasas tsî Gats tsî Asdods ǀguis tawan ge ge ǃgau.

²³Nētib ge Josuaba ǃhūb hoaragaba ge ū, ǃKhūb ge Moseb ǀkha ǃhoa khami; tsî Josuab ge ǁîba Israela ǀumise ge mā ǁîn di ǃâdi ǃoa, ǁîn di ǃhaodi ǃoa. Ob ge ǃhūba toroba xu ge sâ.