Read Khoekhoegowab Josuab 13 Bible Online

Josuab 13 - Khoekhoegowab bible

Josuab 13

¹Tsî Josuab ge kaise ge kaira tsî ǃKhūb ge ǁîb ǃoa ge mî: Sats ge kaira hâ, tsî kaise kai ǃâs ge ǃgau hâ ǃhūba ūs xa.

²Nēb ge ǃhūb hîa go ǃgauba: Filisteǁîn di ǀkharigu hoagu tsî hoaraga Gesuri,

³Sihori, Egipteb aiǃâ ra dâuba xu Ekrons di ǀkharib kōse, ǀapasǀîb ge Kanaanǁîna nî ǃgôabahe; koro gaosagu Filisteǁîn digu: Gasaǁîb, Asdodǁîb, Askelonǁîb, Gatǁîb, Ekronǁîb tsî Aviǁîn tsîna.

⁴ǃKhawagasa xu: Kanaanǁîn di hoaraga ǃhūb tsî Mearas, Sidonǁîn dis Afeks kōse, Amorǁîn di ǀkharib kōse.

⁵ǁNās xōǀkhā Gibalǁîn di ǃhūb tsî Libanonni hoaragab, sores ra ǁhaiǀî Baal-Gadsa xu Hermonǃhommi tawa, Hamatsats ra ǂgâs kōse;

⁶ǃhommi ai ǁan hân hoan Libanonna xu Misrefot-Majims kōse, Sidonǁîn hoan; tita ge ǁîna nîra doeǁgaǂui Israeli ôan di ais aiǃâba xu; nēs ǀguisa dī, îb Israela ǁîba ǀumi-amǃnâse hō, tita ge mîmā tsi xase.

⁷Îts ǁnâi nē ǃhūba ǀumi-amǃnâse ǀgora khoese ǃhaodi ǃnâ tsî ǃkhare ǃhaos Manaseb dis ǃnâ.

⁸ǁÎs ǀkhan ge Rubenǁîn tsî Gadǁîn tsîna ǁîn di ǀumisa ge hō, Moseb ge ǁîna Jordanǃāb nauǃanib ai aiǂoasǀî mās, Moseb, ǃKhūb di ǃgāb ge ǁîna mās ǁkhās xase:

⁹Aroers, ǃārob Arnonni amǃgâ ǁgoesa xu tsî ǃās, ǃārob ǁaegu hâs tsî ǂgāb hoaba, Medebasa xu Dibons kōse;

¹⁰tsî ǃādi Sihonni, Amorǁîn di gao-aob, Hesbons tawa ge gaob didi hoade, Amonni ôan di ǀkharib kōse;

¹¹tsî Gileadi, Gesurǁîn di ǀkharib, Maaxatǁîn dib, Hermonǃhommi hoab tsî Basanni hoaba Salxas kōse;

¹²gaosis Ogi, Basanni gao-aob, Astarots tawa tsî Edreis tawa ge gaob dis hoasa; nēb ge ǁîb, ǃgau ge Refaimǁîn dib, Moseb ge ǂnau tsî doeǁgaǂuin xa.

¹³Xawe Israeli ôan ge Gesurǁîn tsî Maaxatǁîn tsîna doeǁgaǂui tama; tsî Gesuri tsî Maaxati tsîkha ge Israeli ǁaegu ge ǁan nētsēs kōse.

¹⁴Levib di ǃhaos ǀguisab ge ǀumi-i xare-e mā tama; ǀaeǁguibadi ǃKhūb, Israeli di Elob didi ge a ǁîb di ǀumi Elob ge ǁîb ǃoa mî xase.

¹⁵Nētib ge Moseba Rubenni di ǃhaosa ǁîn ommi din ī xase ge mā,

¹⁶ob ge ǀkharib âna Aroersa xu ǃārob Arnonni di amǃgâb kōse tsî ǃās, ǃārob ǁaegu hâs tsî hoaraga ǂgāba Medebas kōse ge i;

¹⁷Hesbons tsî ǁîs di ǃādi hoadi, ǂgāb ai hâde, Dibons, Bamot-Baals, Bet-Baal-Meons.

¹⁸Jahas, Kedemots, Mefaats,

¹⁹Kirjataims, Sibmas, Seret-Sahars, ǃgoaǃnāb di ǃhommi ai ǁgoes,

²⁰Bet-Peors, Asdot-Pisgas tsî Bet-Jesimots tsîde,

²¹tsî ǂgāb di ǃādi hoadi tsî Sihonni, Amorǁîn di gao-aob, Hesbons tawa gere gaob di gaosis hoasa, ǁnāb, Moseb xa ge ǂnauheb, Midianni di gaosagu ǀkha: Evib, Rekemmi, Suri, Huri tsî Rebab tsîgu, Sihonni di ǃgari-aogu, ǃhūb ǃnâ a ǁanaoga.

²²ǁNās tawan ge Israeli ôana Bileammi Beori ôab, aimûǀgaru-aoba gôab ǀkha ge ǃgam, ǁîn xa ge ǃgamhen hoan ǀkha.

²³Ob ge Jordanna Rubenni ôan di ǀkhari ge i ǀkharib ân ǀkha. Nēs ge ǀumi-amǃnâs Rubenni ôan disa, ǁîn ommi din ī xase, ǃādi tsî ǁîdi di ǃhaidi tsîn.

²⁴Tsî Gadi di ǃhaos: Gadi di ôanab ge Moseba ǁîn ommi din ī khami ge mā,

²⁵ob ge ǀkharib âna Jasers tsî Gileadi ǃāde ge i tsî Amonni ôan di ǃkhare ǃhūb, Aroers, Rabas tawa ǁgoes kōse;

²⁶tsî Hesbonsa xu Ramat-Mispes tsî Betonims kōse; tsî Mahanaimsa xu Debirs di ǀkharib kōse;

²⁷tsî ǃgoaǃnāb ǃnâ: Bet-Harams, Bet-Nimras, Sukots tsî Safons, Sihonni, Hesbonni gao-aob di gaosis xa ge ǃgaus, Jordanǃāb tsî ǀkharib âb, Kinereti hurib di ǀkhâuǀams kōse, aiǂoasǀî.

²⁸Nēs ge ǀumi-amǃnâs Gadi ôan disa, ǁîn ommi din ī xase, ǃādi tsî ǁîdi di ǃhaidi tsîde.

²⁹ǃAruǀîb ge Moseba ǃkhare ǃhaos Manaseb disa ǀumi-e ge mā, Manaseb ôan di ǃkhare ǃhaosa ge hâba-e, ǁîn ommi din ī xase.

³⁰Ob ge ǀkharib âna ge i Mahanaimsa xu Basanni hoab, Ogi, Basanni gao-aob di gaosis hoas kōse, tsî Jairi di ǃhaidi, Basanni ǃnâ ǁgoedi, ǃnanidisi ǃāde.

³¹Tsî Gileadi ǃkhareb tsî Astarots tsî Edreis tsîra, Ogi, Basanni gao-aob di gaosis di ǃāra ge Maxiri, Manaseb ôab di ôan di ge i, Maxiri ôan di ǃkhareb ti, ǁîn ommi din ī khami.

³²Nēs ge ǁnās, Moseb ge ǀumise ǀgorasa Moab di ǂgādi ai Jordanǃāb nauǃanib ai Jerixosa xu aiǂoasǀî.

³³Xawe Levib di ǃhaosab ge Moseba ǀumi-amǃnâ-e mā tama; ǃKhūb, Israeli di Elob ge a ǁîn di ǀumi-amǃnâ xui-ao, ǁîb ge ǁîna ǃoa mî khami.