Read Khoekhoegowab Josuab 14 Bible Online

Josuab 14 - Khoekhoegowab bible

Josuab 14

¹Nēn ge ǁîn, Israeli ôan Kanaanǃhūb ǃnâ ge ǀumin, prister Eleasari tsî Josuab, Nunni ôab, tsî Israeli ǃhaodi di danagu tsîgu ge ǁîna ǀumi kaina;

²ǀumis ân di ǂnōgusa xu, ǃKhūb ge Moseb di ǃoabasa xu mîmā xase khoese ǃhaodi tsî ǃkhare ǃhaos tsîdi xa.

³ǀGam ǃhaora tsî ǃkhare ǃhaos onab ge Moseba ǀumi-amǃnâ-e ge mā Jordanǃāb di nauǃanib ai xui-ao; xawe Leviǁînab ge ǁîn ǁaegu ǀumi-amǃnâ-i xare-e mā tama.

⁴Joseb di ôan ge ǀgam ǃhao ge i xui-ao: Manaseb tsî Efraimmi tsîkha; tsîn ge Leviǁîna ǃhūb ǃnâ amǃnâ-e mā tama tsî ǃāde ge mā, ǁanǃnân nîga, tsî aiǃāde, ǀgoan tsî ūn hâ xūn ǂama.

⁵ǃKhūb ge Moseba mîmās ǁkhās xasen ge Israeli ôana dī tsî ǃhūba ge ǀgora.

⁶ǃNubain ge Judab ôana Josuab ǃoa ge hā Gilgals tawa, tsî Kaleb, Jefuneb ôab, Kenisiǁîb, ge ǁîb ǃoa ge mî: Sats ge a ǂan ǁnā mîs, ǃKhūb Moseb, Elob aob ǃoa Kades-Barneas tawa ge mîsa, sats tsî tita tsîkhom di ǃkhai-i xa.

⁷Tita ge hakadisi kurixa ge i, Moseb, ǃKhūb di ǃgāb ge tita Kades-Barneasa xu sîǂui ǃnubai, ǃhūba ta nî ǃkhēga, tsî ǂgaob ǃnâ ta ūhâ khami ta ge ǂhôasa ūhāba bi ǃnubai.

⁸Xawe ti ǃgâsagu, tita ǀkha ge ǃapagu ge ǁaes di ǂgaoba ge tsunitsuni; xawe ta ge tita ǃKhūb, ti Eloba ge saohâhâ.

⁹ǃNubaib ge Moseba ǁnā tsēs ǁkhās ai nū tsî ge mî: Amaseb ge ǁnā ǃhūb, ǂais âts ge dā-aiba sats tsî sa ôana ǀumi-amǃnâse nîra hâba ǀamosib kōse, ǃKhūb, sa Elobats ge saohâhâ xui-ao.

¹⁰Tsî nēsi mû, ǃKhūb ge tita ûib ǃnâ ge sâu, ǁîb ge mî xase: Hakadisikoroǀa kurigu ge ǃKhūb ge nē mîsa Moseb ǀkha ǃhoasa xu, Israeli ge ǃgaroǃhūb ǃnâ ǃgûo; tsî mû nēsi, tita ge nētsē a ǁkhaisadisikoroǀa kurixa.

¹¹Tita ge nētsē ǁnās ǁkhās xase a ǀgaisa, Moseb ge sîǂui te tsēs ai ta ge ī i khami; ǁnāǃnubaib ge ti ǀgaiba ī is ǁkhās khamib ge ti ǀgaiba nēsis tsîna ī, torob ǁga, tsî ǂoa tsî ta nî ǂgâse.

¹²Îts ǁnâi nē ǃhomma mā te, ǃKhūb ge ǁnātsē ǁîb xa ǃhoaba; sats ge ǁnātsē ge ǁnâu, Anakǁîn ǁnāpa ǁan hâsa tsî ǁaposa ǃādi hâsa xuige; ǀnîsib ge ǃKhūba tita ǀkha nî hâ, ǁîna ta nî doeǁgaǂuiga, ǃKhūb ge ǃhoa xase.

¹³ǃNubaib ge Josuaba ǁîba ge ǀkhae, tsîb ge Kaleb Jefuneb ôaba Hebronsa ǀumi-amǃnâse ge mā.

¹⁴ǁNā-amagas ge Hebronsa Kaleb, Jefuneb ôab, Kenisiǁîb di ǀumi-amǃnâ kai nētsēs kōse, ǃKhūb, Israeli di Elobab ge saohâhâ xui-ao.

¹⁵Tsî ǀons Hebrons dis ge aiga Kirjat-Arba ge i, Anakǁîn ǁaegu hoan xa gaxu khoe ge ib ǃoa. Tsî ǃhūb ge toroba xu ge sâ.