Read Khoekhoegowab Josuab 16 Bible Online

Josuab 16 - Khoekhoegowab bible

Josuab 16

¹ǁNās khaoǃgâs ge Joseb ôan di ǂnōgusa ge ǀkhī: Jordanna xu Jerixos tawa, Jerixos di ǁgammi tawa, aiǂoasǀî, Jerixosa xu Bet-Els di ǃhommi ai ra ǃapa ǃgaroǃhūb;

²tsîb ra ǂoa Bet-Elsa xu Lus ǃoa; tsîb ra ǃganu Arkiǁîn di ǀkharib ǃoa Atarots kōse;

³tsîb ra ǁgôa huriǂoasǀî Jafletǁîn di ǀkharib ǃoa ǃnaga ǁgoe Bet-Horons di ǀkharib kōse tsî Gesers kōse; tsî ǀamǂoadi âb ge hurib tawa hâ.

⁴Nēti kha ge Joseb ôakha, Manaseb tsî Efraimmi tsîkha ǀumi-amǃnâs âkha ge hō.

⁵Tsî Efraimmi ôan di ǀkharib ge nēba ǁîn ommi din ī xase; tsîb ge ǀkharib ǁîn amǃnâs diba ge ī aiǂoasǀî Atarot-Adarsa xu ǀgapise ǁgoe Bet-Horons kōse.

⁶Tsî nē ǀkharib ra ǂoa huriǂoasǀî Mixmetats tawa ǀapasa xu, tsî nē ǀkharib ra oa aiǂoasǀî Taanat-Silos ǃoa, tsîb ra īǃganu si aiǂoasa xu Janoaxs ǃoa,

⁷tsîb ra ǁgôa Janoaxsa xu Atarots tsî Naaras ǃoa tsî ra sī Jerixos ǃoa tsî ra ǀamǂoa Jordanǃāb tawa.

⁸Tapuaxsa xub ge nē ǀkhariba huriǂoasǀî ra ǂoa Kanaǃārob ǃoa, tsî ǀamǂoadi âb ge hurib tawa hâ. Nēs ge amǃnâs Efraimmi ôan di ǃhaos dis, ǁîn di ommi din ge ī i xase.

⁹Tsî ǁnā ǃādi, Efraimmi ôana khaibahe hâdi ge Manaseb ôan di ǀumis ǁaegu hâ, ǁnā ǃādi hoade tsî ǃhaidi âde.

¹⁰Tsîn ge Kanaanǁîn, Gesers tawa ǁan hâna doeǁgabē tama ge i; nētimîn ge Kanaanǁîna Efraimǁîn ǁaegu ǁan hâ nētsēs kōse; xawen ge ge ǁgarihe ǃoaban nîga.