Read Khoekhoegowab Josuab 17 Bible Online

Josuab 17 - Khoekhoegowab bible

Josuab 17

¹Tsî ǃhaos Manaseb dis on ge ǀgui ǂnōgusa ge ūhâ i, Joseb di ǂguroǃnaesabeb a amaga, ǁnāb ge Maxiri, Manaseb di ǂguroǃnaesabeb, Gileadi îba; ǁîb a toro-ao amagab ge Gileadi tsî Basanni ǃhūb tsîkha ge ūhâ i.

²ǁKhātin ge ǃgau gen Manaseb ôab dina ǂnōgusa ge ūhâ i, ǁîn ommi din ī xase; ǁnān ge Abieseri ôan, Heleki ôan, Asrieli ôan, Sexemmi ôan, Heferi ôan tsî Semidab ôana. Nē gu ge aore ǀgôagu Manaseb, Joseb ôab diga, ǁîgu ommi din ī khami.

³Tsî Selofhadi, Heferi ôab Gileadi ôab, Maxiri ôab, Manaseb ôab ge ǀgôaga ūhâ tama tsî ǀgôadi ǀguide ge ūhâ i; tsî ǀondi ǁîb ôadi didi ge nēde: Maxlas, Noas, Hoglas, Milkas tsî Tirsas tsîde.

⁴Tsî di ge ǁîde ge ǀkhī Eleasari, pristeri di ais aiǃâ tsî Josuab, Nunni ôab di ais aiǃâ tsî ǂamsagu di ais aiǃâ, mî rase: ǃKhūb ge Moseba ge mîmā, ǀumi-amǃnâ-e se nî māhe ǃkhaisa sise ǃgâsagu ǁaegu. ǁNā-amagab ge ǁîde ǃKhūb di mîmās ǃoa ǀumi-amǃnâ-e ge mā ǁîdi îb di ǃgâsagu ǁaegu.

⁵Tsî Manaseb ge disi amǃnâde ge hō Gileadi tsî Basanni tsîkha di ǃhūb, Jordanǃāb nauǃani ǁgoeb kōse.

⁶Manaseb ôadi ge ǀumi-amǃnâ-e ge ǀumi ǁîb di ôagu ǁaegu; tsî Gileadi ǃhūb ge ge ǃgau gen Manaseb ôan din di ǃhū kai.

⁷Ob ge ǀkharib Manaseb diba ge i Aser ǀkhariba xu Mixmetats, Sexems aiǃâ ǁgoes kōse; tsî nē ǀkharib ge amǀkhāb ǁôabǀî En-Tapuaxs di ǁansaben kōse ra ī.

⁸Tsî Manaseb ge Tapuaxs di ǃhūba ge ūhâ i, xawe Tapuaxs ǂûs, Manaseb di ǀkharib tawa ǁgoesan ge Efraimmi ôana ge ūhâ i.

⁹ǁNāpa xub ge ra ǀkhariba ǁgôa Kanaǃārob ǃoa ǃārob di ǃkhawagasǀî. Nē ǃādi ge ge Efraimmi di kai, Manaseb di ǃādi ǁaegu; tsî ǀkharib Manaseb dib ge ǃārob di ǀapasǀî hâ tsî ǀamǂoadi âb ge hurib tawa hâ.

¹⁰Efraimmi dib ge ǃkhawagasǀî ǁgoe ǃhū ge i tsî ǀapasǀî ǁgoeb ge Manaseb di ge i, hurib ge ǁîb di ǀkhari ge i, tsî ǀapasǀîn ge ǃoagu Aseri tawa tsî aiǂoasǀî Isaskari tawa.

¹¹Manaseb ge Isaskari tsî Aseri tsîkha ǃnâ ge ūhâ i Bet-Seans tsî ǁîs ǃnaga hâ ǃāde tsî Jibleams tsî ǁîs ǃnaga hâ ǃādi tsî ǁansaben Dors din tsî ǁîs ǃnaga hâ ǃādi tsî Endors di ǁansaben tsî ǁîs ǃnaga hâ ǃādi tsî Tanaxs di ǁansaben tsî ǁîs ǃnaga hâ ǃādi tsî Megidos di ǁansaben tsî ǁîs ǃnaga hâ ǃāde: ǃNona ǃhūǃâde.

¹²Tsî Manaseb ôan ge nē ǃādi dina ǃhaexu ǁoa ge i, Kanaanǁîn ge ǁnā ǃhūb ǃnâ ǁan ǂgao hâ i xui-ao.

¹³Tsî i ge ge ī, Israeli ôan ge ǀgaisao, on ge Kanaanǁîna ǁguibasa ge mā kai; xawen ge ǁîna ǃhaexuǃari tama.

¹⁴ǃNubain ge Joseb ôana Josuab ǀkha ǃhoa tsî ge mî: Tare xū-i ǃaromats kha ǁnâi tita ǀumi-amǃnâse ǀgui ǂnōgus ǀguis tsî ǀgui amǃnâs ǀguisa go mā, kai ǁaeta xawe, nēs kōseb ge ǃKhūba ǀkhae te hîa?

¹⁵Ob ge Josuaba ǁîn ǃoa ge mî: Kai ǁae du a, xuige ǃapa ǀgomhaixa ǃkhaisǀî îts ǁnāpa ǁhāǃnâbasen Perisiǁîn tsî Rafaiǁîn di ǃhūb ǃnâ, Efraimmi di ǃhommi a ǂōba du xuige.

¹⁶ǃNubain ge Joseb ôana ge mî: ǁNā ǃhommi ge ǂâuba da tide, tsî di ge ǁkhāti ǂnūǀurikunide hâ Kanaanǁîn ǃgoaǃhūb ǃnâ ǁan hân hoan tawa, ǁnān, Bet-Seans tawa tsî ǁîs ǃnaga hâ ǃādi ǃnâ tsî ǁnān, Jesreels di ǃgoaǃnāb ǃnâ hâna.

¹⁷ǃAruǀîb ge Josuaba Joseb ommi din ǃoa, Efraimmi tsî Manaseb tsîkha ǀkha ǃhoa tsî ge mî: Sadu ge a kai ǁae, tsî du ge kai ǀgaiba ūhâ, sadu ge ǀgui ǂnōgus ǀguisa ūhâ tide;

¹⁸xawe ǀgui ǃhommi ge nî sa; tsî ǀgomhaixa ǃkhaib a xuige ǁhāǃnâ bi, o di ge nî sa ǁîb di ǀamǂoade; sadu ge Kanaanǁîna nîra ǃhaexu, ǂnūǀurikuniden ūhâ xawe, ǀgaisan a xawe.