Read Khoekhoegowab Josuab 18 Bible Online

Josuab 18 - Khoekhoegowab bible

Josuab 18

¹Tsî ǀhaohâb Israeli ôan dib hoaragab ge Silos tawa ge ǀhao, tsîn ge ǁnāpa tentoms ǀhûs disa ge ǂnubikhâi, ǃhūb ge ǁîn ǃnaga ǃgamǃgamhes khaoǃgâ.

²Tsî di ge Israeli ôan ǃnâ hû ǃhaode ge ǃgau, ǀumi-amǃnâs âde ǀgoraǂuibahe tama ge hâ ide.

³Ob ge Josuaba Israeli ôan ǃoa ge mî: Matikōse du kha ǁnâi nî ǀopesaba, ǃgû tsî sī ǀumisa, ǁnā ǃhūb, ǃKhūb sadu îgu di Elob ge mā duba?

⁴Sadu amǃnâs ai ǃnona khoega mā mâ ǃhaos hoasa xu, î ta ǁîga sî, î gu khâi î gu ǃhūba ǃgûǃnâǃganu, î gu ǁîba xoamâi ǁîn di ǀumi-amǃnâdi ī xase, î gu tita ǃoa ǁkhawa hā.

⁵O gu ge ǁîba hû ǃâdi ǃnâ nî ǀgora: Judab ge nî hâ ǀkharib âb ai ǃkhawagasǀî, tsî Joseb ommi ge nî hâ ǀkharib âb ai ǀapasǀî.

⁶Tsî du ge ǃhūba nî xoamâi hû ǃâdi ǃnâ, tsî du ge ǁîsa tita tawa nî ūhā, î ta tita ǃKhūb, sadu Elob di ais aiǃâ ǂnōgusa aoba du.

⁷Leviǁîgu sadu ǃnâ amǃnâ-i xare-e ūhâ tama hâ xui-ao; pristersis ǃKhūb dis a ǁîgu di ǀumi-amǃnâ xui-ao. Tsî Gadi tsî Rubenni tsî ǃkhare ǃhaos Manaseb dis tsîn ge ǁîn di ǀumi-amǃnâsa ge ū Jordanǃāb di nauǃanib ai aiǂoasǀî, Moseb, ǃKhūb di ǃgāb ge ǁîna māsa.

⁸ǃNubai gu ge khoega khâi tsî ge ǃgû. Tsî Josuab ge ǁnāgu, hîa ǃhūba gu nî xoamâise ge ǃgûga mîmā tsî ge mî: ǃGû î go ǃhūba ǃgûǃnâǃganu î go ǁîba xoamâi, ǁnās khaoǃgâ ǁkhawa hā tita ǁga, o ta ge tita nēpa ǂnōgusa nî aoba du ǃKhūb di ais aiǃâ Silos tawa.

⁹O gu ge aoga ǃgû tsî ǃhūba ǃgûǃnâǃganu tsî ge xoamâi bi ǁîb di ǃādi ī xase, hû ǃâdi ǃnâ ǂkhanis ǃnâ; tsî gu ge ǁkhawa Josuab ǃoa ǁgoeǃkhais ǃnâ Silos tawa ge hā.

¹⁰ǁGoasib ge Josuaba ǂnōgusa ǁîna ge aoba Silos tawa ǃKhūb di ais aiǃâ. Tsî Josuab ge ǁnāpa Israeli ôana ǃhūba ge ǀgoraba, ǁîn di ǀgoradi ī khami.

¹¹Tsî ǂnōgus Benjaminni ôan dis ge ǀkhī, ǁîn ommi din ī xase; tsî ǀkharib ǁîn ǂnōgus dib ge ge ǂoa Judab ôan ǁaegu tsî Joseb ôan ǁaegu.

¹²Tsî ǀkharib ân ge ge ī ǀapasǀî hâ ǁhôas ǃoa Jordanna xu; tsî nē ǀkharib ra ǃapa ǀapas ǀkhāb ǁhôas Jerixos dis kōse tsî ǃhomma ra ǃganu huriǂoasǀî, tsî ǃgûǂoadi âb ge Bet-Avens di ǃgaroǃhūb tawa hâ.

¹³Tsî ǁnāpa xub ra ǀkhariba ǃganu Lus ǁga, Lus (ǁnās ge Bet-Elsa) xōǀkhā ǃkhawagasǀî; tsî nē ǀkharib ra ǁgôa Atarot-Adars ǃoa, ǁnā ǃhommi ǃnaga ǁgoe Bet-Horons di ǃkhawagasǀî hâb tawa.

¹⁴Tsî ǁnā ǀkharib ra sī tsî ra oa huriǂoas di ǁhôas ǃkhawagasǀî, ǁnā ǃhommi, Bet-Horons ǃoa-ai ǃkhawagasǀî hâb dis ǃoa, tsî ǀamǂoadi âb ge Kirjat-Baals (ǁnās ge Kirjat-Jearimsa) Judab ôan di ǃās tawa hâ. Nēs ge ǁhôas huriǂoas disa.

¹⁵Tsî ǁhôas ǃkhawagas ǀkhāb dis ge ǀkhâuǀams Kirjat-Jearims dis tawa hâ; tsî nē ǀkharib ra ǂoa huriǂoasǀî, tsîb ra sī ǂoa Neftoaxs ǁgamgu di ǀaudi tawa.

¹⁶Tsî nē ǀkharib ra ǁgôa ǁnā ǃhommi, Hinommi ôab di ǃgoaǃnāb ǃoa-ai, Rafaimǁîn di ǃgoaǃnāb ǃnâ hâb di ǀkhâuǀams kōse ǀapasǀî; tsîb ra ǁgôa tsî Hinommi di ǃgoaǃnāba ǃganu Jebusǁîn di ǀkhāb ai ǃkhawagasǀî tsî ra ǁgôa ǀaus Rogels dis ǃoa;

¹⁷tsîb ra ǀapasǀî ī tsî ra ǂoa En-Semes tawa; ǁnāpa xub ra ǂoa Gelilots ǃoa, Adumims ǃoats ra ǃapa ǃkhais ǃoagu hâsa, tsîb ra ǁgôa Bohanni, Rubenni ôab di ǀuib ǃoa.

¹⁸Tsîb ra ǃgâu Bet-Arabas di ǀkhāb ǃoagu ǀapasǀî, tsîb ra ǁgôa Bet-Arabas ǁga.

¹⁹ǃAruǀîb ra nē ǀkhariba ǃganu Bet-Hoglas xōǀkhā ǀapasǀî, tsî ǃgûǂoadi nē ǀkharib didi ge ǂŌxahurib di nammi tawa hâ ǀapasǀî, Jordanǃāb di ǀkhâuǀams tawa ǃkhawagasǀî. Nēb ge ǀkharib ǃkhawagas diba.

²⁰Tsî Jordanǃāb ge ǁîba ra xōxō aiǂoasǀî hâ ǁhôas tawa. Nēs ge ǀumi-amǃnâs Benjaminni ôan dis, ǁîn di ǀkharigu ra īǂnamipen khami, ǁîn ommi din ī xase.

²¹Tsî ǃādi Benjaminni ǃhaos di ôan didi ge nēde, ommi din ân ī xase: Jerixos, Bet-Hoglas, Emek-Kesis,

²²Bet-Arabas, Semarajims, Bet-Els,

²³Avims, Paras, Ofras,

²⁴Kefar-Amonis, Ofnis tsî Gebas tsîde, disiǀgamǀa ǃādi tsî ǃhaidi âde.

²⁵Gibeons, Ramas, Beerots,

²⁶Mispes, Kefiras, Mosas,

²⁷Rekems, Jirpeels, Tarealas,

²⁸Selas, Elefs, Jebus (ǁnās ge Jerusalemsa), Gibeas tsî Kirjats: Disihakaǀa ǃādi ǃhaidi âdi ǀkha. Nēs ge ǀumi-amǃnâs Benjaminni ôan disa, ǁîn ommi din ī xase.