Read Khoekhoegowab Josuab 2 Bible Online

Josuab 2 - Khoekhoegowab bible

Josuab 2

¹Tsî Josuab, Nunni ôab, ge ǀgam khoekha Sitimsa xu ǂganǃgâsase kha nî ǃkhēga ge sîǂui, mî raǃâ: ǃGû î kho ǃhūba sī kō tsî Jerixos ona. O kha ge ǃgû tsî taras, hîa ǀai-aos, Raxas ti ǀon hâs tawa sī tsî ǁnāpa ge ǁom.

²ǃNubaib ge Jerixos di gao-aoba ge ǂanǂanhe, mî raǃâ: Mû, nē tsuxub ǃnâ kha ge aokha go hā Israeli ôana xu, ǃhūba kha nî ǃkhēga.

³ǁNā-amagab ge Jerixos di gao-aoba Raxas ǃoa sî tsî ge mî: Ūǀkhī ǁnā aokha, sa oms ǃnâ go ǂgâkha, sa ommi tawa go hākha; ǁîkha ge go hā ǃhūb hoaragaba kha nî ǃkhēǃnâǃganuse xuige.

⁴Xawe ǁnā taras ge ǁnā ǀgam khoekha ū tsî ǁîkha go gaugau; tsîs ge nēti ge mî: Ā, khoekha ge go hā, xawe ta ge go ǀū i, mapa xu kha go hā ǃkhaisa.

⁵Tsî i ge ge ī, ǁāban ra ǂganamǁga ǃnubai, ǃkhae i go ǃnubai, o kha ge ǁnā khoekha go ǃgûǂoa, xawe ta ge a ǀū mâǀî kha go ǃgû ǃkhaisa. ǃHaese ǁîkha ǃkhoeǃgon, ǁîkha go nî saoǁae xuige.

⁶Xawes ge ǁîkha ǂamais ai ge ǃapa kai, tsîs ge ǁîkha ǀharuǃgaeǀkhādi, ǁîdes ge ommi ǂamais ǃnâ ǁgui hâ idi ǃnaga ge gaugau.

⁷O gu ge ǁnā aoga ǁîkha Jordanǃāb ǃoa gau daob ai ǃgâu-amdi kōse ge ǃkhoeǃgon; tsîn ge ǁāba ge ǂganam, ǁnāgu, hîa ge ǃkhoeǃgongu ge ǂoao.

⁸Tsî ǁom tama kha hâ hîas ge ǁîkha ǃoa ommi ǂamǃnâb ai ge ǃapa,

⁹tsîs ge ǁnā khoekha ǃoa ge mî: Tita ge a ǂan, ǃKhūb nē ǃhūba sado ge mā ǃkhaisa tsî sadu di ǃhurib ge sida ai go ǁnā ǃkhaisa, tsî nē ǃhūb di ǁanǂgāsaben hoan go sadu di ais aiǃâ go tsuni ǃkhaisa.

¹⁰Sida ge go ǁnâu xui-ao, matib ǃKhūba ǂĀxahurib di ǁgamga ge ǀari kai ǃkhaisa sadu di ais aiǃâ, Egipteba xu du ge ǃgûǂoa ǃnubai, tsî tare xū-e du ǁnā ǀgam gao-aokha Amorǁîn dikha, Sihonni tsî Ogi tsîkha tawa ge dī ǃkhaisa, Jordanǃāb nauǃanib ai hâkha, sado ge ǀâxarekha.

¹¹Sida ge ǁîsa ǁnâuo, ob ge ǂgaob âda ge tsuni, tsî ǃgâi ǂâi-i xare-i ge khoe-i ǃnâ a ǀkhai, sadu hâ amaga; ǃKhūb, sadu Elob ge a Elo, ǀgapise ǀhommi ǃnâs kas, ǃnaga ǃhūbaib ais kas hoasa.

¹²Î kho ǁnâi nēsi nūba te ǃKhūb tawa, tita ǀkhomxaǂgaosiba go dī-ū kho ǃkhais ǃaroma kho ge ǁkhāti ǀkhomxaǂgaosiba nî dī, ti îb di oms tawa, î kho îǂhôasib di sao-e mā te,

¹³î kho ti îb tsî îs tsîra ûi kai, tsî ti ǃgâsagu tsî ti ǃgâsadi ona, ūn hâ xūn hoan ǀkha; î kho sida di ǀomde ore ǁōba xu.

¹⁴ǃNubai kha ge ǁnā khoekha ǁîs ǃoa ge mî: As sikhom di ǀomsa sado ǁōba, sikhom di ǃkhaisa du ga ǂanǂan tama io, o i ge nîra ī, ǃKhūb ga nē ǃhūba sida māo, o da ge sida ǀkhomxaǂgaosib tsî îǂhôasib tsîkha ǀkha nîra sîsenū si.

¹⁵ǁGoasis ge tsurib ǀkha ǁîkha mûǂuidaosa-ū ge ǁgôa kai, ǁîs di oms ge ǃās di ǂnubiǂgoab ai hâ i; tsîs ge ǂnubiǂgoab ai ǁan hâ i xui-ao.

¹⁶Tsîs ge ǁîkha ǃoa ge mî: ǃHommi ai ǃapa, î gu ǃgôaǃgonaoga sakho tā ǃoa, î kho ǁnāpa ǃnona tsēde gaugausen, ǃgôaǃgonaogu nî oas kōse; î kho ǁnās khaoǃgâ sakho daoba ǃgû.

¹⁷Tsî khoekha ge ǁkhāti ǁîs ǃoa ge mî: Sikhom ge nî ǀhapio nē nūs âs, sikhomas go nū kais tawa.

¹⁸Mû, ǃhūb ǃnâ da ga ǂgâo, os ge nē tsurib, îsa ǀapa ǁapab diba ǁnā mûǂuidaos, ǁîsa-ūs ge sikhoma ǁgôa kais ǃnâ nî ǃgae; tsîs ge oms ǃnâ sa tawa nî ǀhaoǀhao sa îb, sa îs, sa ǃgâsan tsî sa îb oms din hoana.

¹⁹O i ge nîra ī, mâ-i hoa-i, sa oms di ǁāga-ū ga ǂoa-i, ǁnā-i di ǀaoba ab ǁî-i di danas ai hâ, î khom sikhoma ǀhapio; xawe mâ-i hoa-i, sa oms ǃnâ sa ǀkha ga hâ-i, ǁnā-i di ǀaoba ab sikhom di danas ai hâ, khoe-i di ǃommi ga ǁî-i ǃoagu hâo.

²⁰Tsî nē ǃkhais âkhomas ga ǂanǂano, o khom ge sikhoma nî ǀhapio sa nūs, sikhomas go nū kais tawa.

²¹Os ge ǁîsa ge mî: Sakho di mîdi ǃoa a-i ī! ǃNubais ge ǁîkha ge xū, tsî kha ge ge ǃgû; tsîs ge ǁîsa îsa ǀapa tsuriba mûǂuidaos ǃnâ ge ǃgae.

²²O kha ge ǃgû tsî ǃhommi ai sī tsî ǁnāpa ge hâ ǃnona tsēde, ǃgôaǃgonaogu ge oas kōse; ǃgôaǃgonaogu ge ǁîkha daob hoaragab ai gere ôa, xawe hō tama i xui-ao.

²³Nēti kha ge ǁnā ǀgam khoekha oa tsî ǃhomma xu ǁgôaxa tsî ǃgâu tsî Josuab, Nunni ôab tawa sī tsî hāǂam kha go xūn hoana ge ǃhoaba bi.

²⁴Tsî kha ge Josuab ǃoa ge mî: ǃKhūb ge ǁnā ǃhūb hoaragaba sada ǃomǁae ge mā; ǃhūb di ǁanǂgāsaben hoan kom sada di ais aiǃâ go tsunio.