Read Khoekhoegowab Josuab 21 Bible Online

Josuab 21 - Khoekhoegowab bible

Josuab 21

¹ǃNubai gu ge ǁgûgu Leviǁîn diga ge hāǀgū prister Eleasari tsî Josuab, Nunni ôab tsî Israeli ôan ǃhaodi di ǁgûgu tsîgu tawa;

²tsî gu ge ǁîgu ǀkha ge ǃhoa Silos tawa Kanaanǃhūb ǃnâ, mî raǃâ: ǃKhūb ge ge mîmā Moseb di ǃoabasa xu, ǃādi, ǁanǃnâ da nîde da nî māhe ǃkhaisa, tsî ǁîdi di aiǃāde sida di ǀgoan ǃaroma.

³ǁNā-amagan ge Israeli ôana Leviǁîna ǁîn di ǀumi-amǃnâs xa ge mā, ǃKhūb di mîmās ǃoa nē ǃādi tsî aiǃādi âde.

⁴ǃNubais ge Kehati ommiǁîn di ǂnōgusa ge ǀkhī; tsî Aronni, pristeri di ôan Leviǁîn dina di ge Judab ǃhaos tsî Simeonni ǃhaos xa tsî Benjaminni ǃhaos xa ǂnōgusa xu disiǃnonaǀa ǃāde ge hâba i.

⁵Tsî ǃgau ge ǀgôan Kehati din ge ǂnōgusa xu Efraimmi ǃhaos di ommi din xa tsî Danni ǃhaos din xa tsî ǃkhare ǃhaos Manaseb dis din xa disi ǃāde ge hō.

⁶Tsî Gersonni ôan ge Isaskari ǃhaos di ommi din xa tsî Aseri ǃhaos din xa tsî Naftalib ǃhaos din xa tsî ǃkhare ǃhaos Manaseb dis din xa Basanni ǃnâ ǂnōgusa xu disiǃnonaǀa ǃāde ge hō.

⁷Tsî Merarib ôan ge ommi din ân ī xase Rubenni ǃhaos din xa tsî Gadi ǃhaos din xa tsî Sebulonni ǃhaos din xa disiǀgamǀa ǃāde ge hō.

⁸Nētin ge Israeli ôana Leviǁîna nē ǃādi tsî aiǃādi âde ǂnōgusa xu ge mā, ǃKhūb ge Moseb di ǃoabasa xu mîmā xase.

⁹ǃAruǀîn ge Judab ôan di ǃhaos xa tsî Simeonni ôan di ǃhaos xa nē ǃāde ge mā, ǀons tawan ge ǂgaide,

¹⁰tsî di ge ge Aronni ôan di kai Kehati ommi din xa Levib ôana xu; ǂguro ǂnōgus ge ǁîn di i xui-ao.

¹¹Nētin ge ǁîna Arbab, Anaki îb di ǃās (ǁnās ge Hebronsa) ge mā Judab ǃhommi ai, tsî ǁîs ǂnamipe hâ aiǃāde.

¹² Xawe ǃaub ǃās dib tsî ǁîs di ǃhaiden ge Kaleb, Jefuneb ôaba ǁîsis âb ase ge mā.

¹³Nētin ge prister Aronni ôana ǃnoraǃās ǂnauǃanaob dis, Hebronsa ge mā tsî ǁîs di aiǃādi tsî Libnasa tsî ǁîs di aiǃāde;

¹⁴tsî Jatirs tsî ǁîs di aiǃādi tsî Estemoas tsî ǁîs di aiǃāde;

¹⁵tsî Holons tsî ǁîs di aiǃādi tsî Debirs tsî ǁîs di aiǃāde;

¹⁶tsî Ains tsî ǁîs di aiǃādi tsî Jutas tsî ǁîs di aiǃādi tsî Bet-Semes tsî ǁîs di aiǃādi; khoese ǃāde nē ǀgam ǃhaora xa.

¹⁷Tsî Benjaminni di ǃhaos xa Gibeons tsî ǁîs di aiǃādi, Gebas tsî ǁîs di aiǃāde;

¹⁸tsî Anatots tsî ǁîs di aiǃādi tsî Almons tsî ǁîs di aiǃādi: Haka ǃāde.

¹⁹ǃĀdi Aronni ôan, pristergu didi hoadi ge disiǃnonaǀa ǃā ge i tsî ǁîdi di aiǃāde.

²⁰Tsî Kehati ôan di ommi din, Leviǁîn, Kehati ôan xa ge ǃgaun, ǁîn ge ǂnōgus di ǃāde Efraimmi di ǃhaos xa ge ūhâ i.

²¹Tsîn ge ǁîna Sexems, ǂnauǃanaob di ǃnoraǃāsa ge mā tsî ǁîs di aiǃāde Efraimmi di ǃhommi ai tsî Gesers tsî ǁîs di aiǃāde,

²²tsî Kibsajims tsî ǁîs di aiǃādi tsî Bet-Horonsa tsî ǁîs di aiǃādi: Haka ǃāde.

²³Tsî Danni di ǃhaos xa Eltekes tsî ǁîs di aiǃādi, Gibetons tsî ǁîs di aiǃāde;

²⁴Ajalons tsî ǁîs di aiǃādi, Gat-Rimons tsî ǁîs di aiǃādi: Haka ǃāde.

²⁵Tsî ǃkhare ǃhaos Manaseb dis xa Tanaxs tsî ǁîs di aiǃādi tsî Gat-Rimons tsî ǁîs di aiǃādi: ǀGam ǃāra.

²⁶Nau ǃādi Kehati ôan ommi din didi hoadi ge a disi tsî ǁîdi di aiǃāde.

²⁷Tsî Gersonni ôan, Leviǁîn ommi din ge Manaseb di ǃkhare ǃhaos xa ǂnauǃanaob di ǃnoraǃās Golansa ge māhe tsî ǁîs di aiǃāde Basanni ǃnâ, tsî Be-Esteras tsî ǁîs di aiǃāde: ǀGam ǃāra.

²⁸Tsî Isaskari di ǃhaos xa Kisjons tsî ǁîs di aiǃāra tsî Daberats tsî ǁîs di aiǃāde;

²⁹Jarmutsa tsî ǁîs di aiǃādi, En-Ganims tsî ǁîs di aiǃādi: Haka ǃāde.

³⁰Tsî Aseri di ǃhaos xa Misals tsî ǁîs di aiǃādi, Abdons tsî ǁîs di aiǃāde.

³¹Tsî Helkats tsî ǁîs di aiǃādi tsî Rehobs tsî ǁîs di aiǃādi: Haka ǃāde.

³²Tsî Naftalib di ǃhaos xa ǃās ǂnauǃanaob dis Kedesa Galileab ǃnâ tsî ǁîs di aiǃādi tsî Hamot-Dors tsî ǁîs di aiǃādi tsî Kartans tsî ǁîs di aiǃādi: ǃNona ǃāde.

³³ǃĀdi Gersonǁîn didi hoadi ge ǁîna ommi din ī xase disiǃnonaǀa ǃādi tsî aiǃādi âde.

³⁴Tsî Merarib ôan di ommi din, nau Leviǁîn ge Sebulonni di ǃhaos xa Jokneamsa ge māhe tsî ǁîs di aiǃāde, Kartas tsî ǁîs di aiǃāde;

³⁵Dimnas tsî ǁîs di aiǃādi, Nahalals tsî ǁîs di aiǃādi: Haka ǃāde.

³⁶Tsî Rubenni di ǃhaos xa Besers tsî ǁîs di aiǃādi tsî Jahas tsî ǁîs di aiǃāde.

³⁷Kedemots tsî ǁîs di aiǃādi tsî Mefaats tsî ǁîs di aiǃādi: Haka ǃāde.

³⁸Tsî Gadi di ǃhaos xa ǂnauǃanaob di ǃās Ramotsa Gileadi ǃnâ tsî ǁîs di aiǃādi, Mahanaimsa tsî ǁîs di aiǃāde;

³⁹Hesbons tsî ǁîs di aiǃādi, Jasers tsî ǁîs di aiǃādi: Nē ǃādi hoadi ge a haka.

⁴⁰ǁNā ǃādi Merarib ôan didi hoadi ge ǁîn ommi din ī xase ganupe Levib ommi din xa ge ǃgau Leviǁîn, ǁîn ǂnōgus di ǃādi hoadi ge disiǀgamǀa ge ide.

⁴¹Leviǁîn di ǃādi hoadi, Israeli ôan di ǀumis ǁaegu hâdi ge hakadisiǁkhaisaǀa ǃā ge i tsî ǁîdi di aiǃāde.

⁴²Nē ǃādi xas ge mâs hoasa aiǃāde ǁîs ǂnamipe ge ūhâ i; ǁnāti i ge nē ǃādi hoadi ǀkha ge ī i.

⁴³Nētib ge ǃKhūba Israela ǃhūb hoaragaba ge mā, ǁîn di îgab nî ǁîba mā tib ge nūbaba, tsîn ge ǁîba ǀumi tsî ǁîb ǃnâ ge ǁan.

⁴⁴Tsî ǃKhūb ge ǁîna ǁîn ǂnamipe sâba ge mā, ǁîn di îgab ge nūban hoan ǃoa; tsî ǀgui khoeb, ǁîn khākhoen hoan dib xareb ge ǁîn di ais aiǃâ mâ ǁoa ge i; ǁîn di khākhoen hoanab ge ǃKhūba ǁîn ǃomǁae ge mā.

⁴⁵ǁNā ǃgâi mîdi, ǃKhūb ge Israeli ommi ǃoa gere ǃhoadi hoadi xas ge ǀgui mîs xaresa ǁnāǂoa tama. Hoadi ge ge hā.