Read Khoekhoegowab Josuab 22 Bible Online

Josuab 22 - Khoekhoegowab bible

Josuab 22

¹ǃNubaib ge Josuaba Rubenǁîn tsî Gadǁîn tsî ǃkhare ǃhaos Manaseb disa ǂgai

²tsî ǁîn ǃoa ge mî: Sadu ge Moseb, ǃKhūb di ǃgāb ge mîmān hoana ge dī; tsî du ge ti domma ge ǁnâuǀnam, mîmā du ta gen hoan ǃnâ.

³Sadu di ǃgâsaga du ge nē ǂomxa ǁaeba ǁnāxū tama ge i nē tsēs kōse, tsî du ge ge dī dīhe nî xūna, ǃKhūb, sadu Elob di mîmāde.

⁴Tsî nēsi ǃKhūb, sadu Elob ge sadu di ǃgâsaga sâba ge mā, ǁîgab ge mîmâiba khami; xuige ǁnâi oa î du sadu di tentomdi ǃoa ǃgû ǃhūb sadu ǁîsis dib ǃoa, Moseb, ǃKhūb di ǃgāb ge sado māba Jordanǃāb nauǃanib ai.

⁵Nēs ǀguisa ǂan î du ôasase dī ǁnā mîmās tsî ǂhanub, Moseb, ǃKhūb di ǃgāb ge sado mîmāba, î du ǃKhūb, sadu Eloba ǀnam î du ǃgû ǁîb di daogu hoagu ǃnâ î du ǁîb di mîmāde dī î du ǁîb tawa ǂgāmâisen, î du ǁîba ǃoaba sadu di ǂgaob hoab ǀkha tsî sadu di ǀoms hoas ǀkha.

⁶Nētib ge Josuaba ǁîna ge ǀkhae, tsîb ge ǁîna ge ǃgû kai; on ge tentomdi ân ǃoa ge ǃgû.

⁷Moseb ge Manaseb di ǃkhare ǃhaosa ǀumi-amǃnâ-e ge mā Basanni ǃnâ, xawe nau ǃkharebab Josuaba ǁîn di ǃgâsagu tawa ǀumi-amǃnâ-e ge mā Jordanǃāb nēxa ǃanib ai huriǂoasǀî xui-ao. Tsî ǃaruǀîb Josuaba ǁîna tentomdi ân ǃoa ge ǃgû kaio, ob ge ǁîna ge ǀkhae.

⁸Tsîb ge ǁîn ǃoa ge mî: Oa sadu di tentomdi ǃoa kai ǃkhūsib, kaise ǂgui ǀgoan, ǀhaiǀurib, ǃhuniǀurib, ǂaib, ǂnūǀurib tsî kaise ǂgui saran ǀkha; î du ǁkhâuǁnâs sadu khākhoen disa sadu di ǃgâsagu ǀkha ǀgoragu.

⁹Nētin ge Rubenni ôan tsî Gadi ôan tsî ǃkhare ǃhaos Manaseb dis din tsîna oa tsî Israeli ôana xu Silos, Kanaanǃhūb ǃnâ ǁgoesa xu Gileadǃhūb, ǁîn ūhâ ǃhūb ǃoa, ǁîb ǃnân ge ǁîn di ǂhunuma xūna a hōba, ǃKhūb ge mîmā Moseb di ǃoabasa xu khami.

¹⁰Tsî Jordanǃāb ǀkharigu, Kanaanǃhūb ǃnâ hâgu tawan ge sīo, on ge Rubenni ôan tsî Gadi ôan tsî ǃkhare ǃhaos Manaseb dis tsîna ǁnāpa Jordanǃāb tawa altarsa ge ǂnubi, kaise kai altarsa.

¹¹Tsî Israeli ôan ge ge ǁnâu, mîn rasa: Mû, Rubenni ôan, Gadi ôan tsî ǃkhare ǃhaos Manaseb dis din tsîn ge altarsa ge ǂnubi Kanaanǃhūb ǃoagu, Jordanǃāb ǀkharigu tawa, Israeli ôan xōǀkhā.

¹²Tsî Israeli ôan ge ǁnâuo, ob ge Israeli ôan di ǀhaohâb hoaba ge ǀhû Silos tawa, ǁîn ǃoagun nî toroǂnubi-i ǀkha ǃgûǃapase.

¹³Tsî Israeli ôan ge Rubenni ôan, Gadi ôan tsî ǃkhare ǃhaos Manaseb dis din tsîn ǃoa Gileadǃhūb ǃnâ Pinehab, Eleasari ôab, pristera ge sî;

¹⁴tsî disi gaosaga ǁîb ǀkha, mâ ǁgûsi ommi hoab di ǀgui gaosaba Israeli di ǃhaodi hoade xu; tsî mâb hoab âgu ge ǁgûsi ommi di dana ge i Israeli ǃhaodi di ǀoadisin ǃnâ.

¹⁵Tsî Rubenni ôan, Gadi ôan tsî ǃkhare ǃhaos Manaseb dis din tsîn tawa gu ge sī Gileadǃhūb ǃnâ, o gu ge ǁîn ǀkha ǃhoa tsî ge mî:

¹⁶Nētib ge ǀhaohâb ǃKhūb dib hoaba go mî: Mâ ǃûǂam-e kha nē-e, sadu nētsē ǁî-i ǀkha Israeli Elob ǃoagu ra ǃûǂam-e, nētsē du ǃKhūba xu ra ǁnāǁgôa, altarsa du go ǂnubibasens ǀkha, nētsē du nî ǃKhūb ǃoagu khâimase?

¹⁷ǂKharibahe da ǁnâi hâ Peori di ǃûǂams xa, nētsēs kōse da ǁîs xa ǃanuǃanuhe tama hâsa, ǁōb ge ǃKhūb di ǀhaohâb ǃnâ hâ i xawe?

¹⁸Tsî nētsē du ǃKhūba xu ra ǁnāǁgôa amaga i ge nîra ī, ǃKhūb ǃoagu du ga nētsē khâimao, ob ge ǁari kaise Israeli di hoaraga ǀhaohâb ǂama nîra ǁaixa.

¹⁹Tsî amaseb ga ǃhūb sadu diba ǃanuoǃnâo, ǁnâi ǃgâuxa ǃKhūb di ǃhūb ǃnâ, ǃKhūb di tabernakeli ǁîb ǃnâ hâba, î du sida ǁaegu sadu ǂhunuma xūna ūhâbasen; xawe du tā ǃKhūb ǃoagu khâima, î du tā sida ǃoagu khâima, ǃKhūb, sida Elob di altars ose ǀnî altarsa ra ǂnubibasenǃâ.

²⁰Axanni, Serab ôaba, ǃûǂam tamab hâ ǀâxarehe hâ-i ǀkha? Tsî ǁaiba hā tamab hâ Israeli di ǀhaohâb hoab ǂama? Tsî ǁnā khoeba ǀguri ǁō tamab hâ ǂhanuoǃnâsib âb ǃnâ.

²¹ǃNubain ge Rubenni ôan tsî Gadi ôan tsî ǃkhare ǃhaos Manaseb dis din tsîna ǃeream tsî Israeli ǃhaodi danaguǀî ge mî:

²²Elogu di Elob, ǃKhūb, elogu di Elob, ǃKhūb! ǁÎb ge a ǂan, îb Israeli ǂûba ǁkhāti ǂan: Mâǃoasiba xu i ga ī hâ io, ǃûǂams, ǃKhūb ǃoagu da ge ǃûǂamsa xu i ga ī hâ io, ab ǁnâi nētsē tā sâu da!

²³Altarsa da ga ǂnubibaseno, ǃKhūba xu da nî ǁnāǁgôaga, khauǁguibadi tsî ǂûǁguibadi tsîde da nî ǁîb ai ǁguibaga, ganganǁguibade da nî ǁîb ai dīga, ab ǁnâi ǃKhūba ǁîsa ǂgaoǀkhā da.

²⁴Tsî nē ǂhansenǃkhaisa xu da ga ǁîsa dī tama hâ io, mî raǃâ: ǁArin ga ǀnîsi sadu di ôana sida di ôan ǀkha ǃhoa tsî a mî: Tare dīxū-e du ūhâ ǃKhūb, Israeli Elob ǀkha?

²⁵ǃKhūb kom Jordanna ǀkharise ge ǂnûio sida tsî sadu ǁaegu, sadu Rubenni ôadu tsî sadu Gadi ôado, sadu ge amǃnâ-e ūhâ tama hâ ǃKhūb ǃnâ. Nētin ga ǀnîsi sadu ôana sida ôana ūdawa, ǃKhūban ǃao tidese.

²⁶ǁNā-amaga da ge nēti ge mî: A da ǁnâi dī î da altarsa ǂnubibasen, khauǁguibas ǃoa tama i tsî ǁkhāti ǂāǁguibas ǃoa tama,

²⁷îb ǀhûǀguitimîse ī sida ǁaegu tsî sadu ǁaegu tsî sada khaoǃgâ nî hā ǃhaodi ǁaegu, î da ǃKhūb di ǃoabasa ais âb aiǃâ ǃoaba sida khauǁguibadi ǀkha, sida ǂāǁguibadi ǀkha tsî sida ganganǁguibadi ǀkha; în sadu ôana sida ôan ǃoa aetsē tā mî: Sadu ge amǃnâ-e ūhâ tama hâ ǃKhūb ǃnâ, ti.

²⁸ǁNā-amaga da ge sida ge mî: Ī i kao, ǁnātin ra aetsē sida tsî sida ǃhaodi ǃoa mîsa, o da ge sida nî mî: Mû, iseb ǃKhūb di altars, sida îgu ge dīb diba, khauǁguibas ǃoa tama i, tsî ǁkhāti ǂāǁguibas ǃoa tama i, xawe ǀhûǀguitimîxūseb nî īga sida ǁaegu tsî sadu ǁaegu.

²⁹Tātsē a-i tā ība da, sida ǃKhūb ǃoagu da nî khâima ǃkhaisa tsî nētsē da nî ǃKhūba xu ǁnāǁgôa ǃkhaisa, altarsa ra ǂnubibasenǃâ, khauǁguibas ǃoas kas, ǂûǁguibas ǃoas kas tsî ǂāǁguibas ǃoas kas hoasa, ǃKhūb, sida Elob di altars tabernakeli âb aiǃâ hâs ǀguis ose.

³⁰Tsî pristeri Pinehab tsî ǀhaohâb di ǂamsagu tsî Israeli ǀoadisin di danakhoegu, ǁîb ǀkha hâgu ge mîdi, Rubenni ôan, Gadi ôan tsî Manaseb ôan ge ǃhoade ǁnâuo, o di ge ge ǃgâi i ǁîn mûǁae.

³¹Ob ge Pinehab, prister Eleasari di ôaba Rubenni ôan, Gadi ôan tsî Manaseb ôan ǃoa ge mî: Nētsē da ge a ǂan, ǃKhūb sada ǁaegu hâ ǃkhaisa, nē ǃûǂamsa du ǃKhūb ǃoagu dī tama hâ ǃkhais ǃaroma; o du ge Israeli ôana ǃKhūb di ǃomǁaeba xu go ore.

³²ǁGoasib ge Pinehab, prister Eleasari di ôaba Rubenni ôan di ǂamsagu tsî Gadi ôan digu ǀkha ge oa, Gileadǃhūba xu Kanaanǃhūb ǁga Israeli ôan ǃoa, tsî gu ge ǁîna ǃereamsa ge ūhāba.

³³Tsî ǃereams ge ge ǃgâi i Israeli ôan mûǁae, tsî Israeli ôan ge Eloba ge koa, tsîn ge ǃaruǀî mî tama ge i, toroǂnubi-i ǀkhan nî ǁîn ǃoagu ǃapa ǃkhaisa, ǃhūb, Rubenni ôan tsî Gadi ôan, ǁîb ǃnâ ǁan hâban nî hîkākāse.

³⁴Tsî Rubenni ôan tsî Gadi ôan ge ǁnā altarsa, ǀHûǀguitimîxū, ti ge ǂgai, ǃKhūb a Elo ǃkhaisas ra ǀhûǀguitimî xui-ao.