Read Khoekhoegowab Josuab 23 Bible Online

Josuab 23 - Khoekhoegowab bible

Josuab 23

¹Tsî i ge ǂgui tsēdi khaoǃgâ ge ī, ǃKhūb ge Israela ǁîb ǂnamipe hâ khākhoen hoana xu sâba mā tsî Josuab ge kaira tsî tsēxa is khaoǃgâ;

²ob ge Josuaba Israeli hoaba ge ǂgai, ǁîn di kaigu, ǁîn di danakhoegu, ǁîn di ǂhanuǂhanu-aogu tsî ǁîn di ǃoabasabega, tsîb ge ǁîn ǃoa ge mî: Tita ge go kaira tsî tsēxa;

³tsî sadu ge ge mû, ǃKhūb, sadu Elob ge nē ǁaedi hoadi tawa sadu ais aiǃâ dīna: ǃKhūb sadu Elob ǂûb ge ǁnāb, sado ge ǃkhambaba.

⁴Mû, tita ge nē ǃgau ge ǁaede ǂnōgus ǀkha sadu di kai, sadu ǃhaodi di ǀumise Jordanna xu ǁaedi hoadi, ǃhūǃnoma ta ge di ǀkha, tsî Kaihurib kōse, sores ra ǂgâ ǀkhāb ai.

⁵Tsî ǃKhūb, sadu Elob ǂûb ge ǁîna nîra ǂhāǂui sadu di ais aiǃâ, tsîb ge ǁîba ǁîna nîra ǃhaexū sadu di ais aiǃâ, tsî du ge ǁîn di ǃhūba ǀumise nîra ūhâ, ǃKhūb, sadu i Elob ge sadu ǃoa ǃhoa xase.

⁶ǁNâi kaise ǀgaisa î du sâu, î du dī, ǂhanub di ǂkhanis Moseb dis ǃnâ xoahe hân hoana; î du ǁîna xu tā ǂgō amǀkhāb ais kas, ǁareǀkhāb ais kas hoasa.

⁷Î du nē ǁaedi ǃnâ tā sī ǂgâ nēdi, sadu tawa ge ǃgaudi ǃnâ, î du ǁkhāti tā ǂâi ǀons, ǁîn elogu dis xa, î du ǁîs tawa tā nū, î du ǁîga tā ǃoaba î du ǁîgu aiǃâ tā ǃhon.

⁸Î du ǃKhūb, sadu Eloba ǂgāmâisenai, nētsēs kōse du ge dīs ǁkhās xase.

⁹ǃKhūb ge sadu di ais aiǃâba xu kai tsî ǀgaisa ǁaede ge doeǁgabē xui-ao. Tsî sadu xasa: Khoe-i xare-i ge sadu di ais aiǃâ mâ ǁoa ge i nētsēs kōse.

¹⁰ǀGui aob ǀguib sadu dib ge ǀoadisiga nîra sauru; ǃKhūb, sadu Elob ǂûb ge ǁnāb, sado ra ǃkhambaba, ǁîb ge mîba du xase.

¹¹ǁNā-amaga ôasase sâu sadu di ǀomde, î du ǃKhūb, sadu Eloba ǀnam.

¹²ǂKharirose ǁnāǁgôa tsî du ga ǃgau ge ǁaede ǂgāmâisenai, nēn, sadu tawa ge ǃgaun xa, tsî du ga ǁîn ǀkha ǀuigu, tsî du ga ǁîn tawa sī tsî ǁîna sadu tawa,

¹³o du ge nî ǂan, ǃKhūb, sadu Elob ge ǃaruǀî nē ǁaedi hoade sadu ais aiǃâba xu doeǁgaxū tide ǃkhaisa, tsîn ge sado ǁnoase nî ība tsî ǂhamse tsî ǂnau-ūxūse sadu di ǀkhāgu ai tsî ǁkhūse sadu di mûdi ǃnâ, kā du nîs kōse, nē ǃgâi ǃhūb ǃKhūb, sadu Elob ge mā duba xu.

¹⁴Tsî mû, tita ge nētsē ǃhūbaib hoab di daoba ra ǃgû, tsî du ge a ǂan sadu di ǂgaob hoab ǃnâ tsî sadu di ǀoms hoas ǃnâ, ǀgui mîros xares ǁnā tama ǃkhaisa ǁnā ǃgâi mîdi, ǃKhūb, sadu Elob ge sadu ǂama ǃhoadi hoadi xa; ǁîdi hoadi ge sadu ai ge hā, ǁîdi xas ge ǀgui mîs xaresa ǁnā tama hâ.

¹⁵Tsî i ge nîra ī, ǁnā ǃgâi xūn hoan ge sadu ai hā khami, ǁnān, ǃKhūb, sadu di Elob ge ǃhoaǀî duna, ǁnās ǁkhās xaseb ge ǃKhūba sadu ǂama nîra hā kai ǁnā ǂkhaba xūn hoana, ǁîb nî hîkākā dus kōse nē ǃgâi ǃhūb, ǃKhūb sadu Elob ge mā duba xu.

¹⁶ǃGaeǀhaos ǃKhūb, sadu Elob dis hîab ge mîmā dusa ǃûǂam tsî du ga ǀkhara eloga sī ǃoabao tsî ǁîgu aiǃâ ǃhono, ob ge ǃKhūb di ǁaiba saduǀî nîra ǂhubi, tsî du ge ǃhaese nîra kā ǁnā ǃgâi ǃhūb, sadob ge māba xu.