Read Khoekhoegowab Josuab 24 Bible Online

Josuab 24 - Khoekhoegowab bible

Josuab 24

¹ǁNās khaoǃgâb ge Josuaba Israeli di ǃhaodi hoade ge ǀhaoǀhao Sexems tawa, tsîb ge Israeli di kaiga ge ǂgai tsî ǁîb di danakhoegu tsî ǁîb di ǂhanuǂhanu-aogu tsî ǁîb di ǃoabasabega; o gu ge Elob ais aiǃâ sī ge mâ.

²ǃNubaib ge Josuaba ǁaes hoaragas ǃoa ge mî: Nētib ra mî ǃKhūb, Israeli Eloba: ǃĀb nauǃanib ai gu ge sadu di îga hugasa xu ge ǁan hâ i, Teraxi, Abrahammi îb tsî Nahori îb tsîgu ge ǀkhara eloga ge ǃoaba.

³ǃNubai ta ge tita abob Abrahamma ǃāb nauǃaniba xu ū tsî Kanaanǃhūb hoaragaba ge ǃgûǃnâǃganu kai. Tita ge surib âba ǂguiǂgui tsî Isaka ge mā bi.

⁴Tsî Isaka ta ge tita Jakob tsî Esaub tsîkha ge mā; tsî ta ge tita Esauba ǃhommi Seira ge mā, ǀumiseb nî ǁîba ūhâga; xawe Jakob tsî ǀgôagu âb ge Egipteb ǃoa ge doeǁgôa.

⁵ǁGoasi ta ge tita Moseb tsî Aronni tsîkha ge sî, tsî tita ge Egipteba ge ǁnora, ǁîn ǁaegu ta gere dī xase; tsî ǁnās khaoǃgâ ta ge tita sado ǁîba xu ge ǂgaeǂguiǂui.

⁶Sadu di îga ta ge Egipteba xu ǂgaeǂguiǂuio, o du ge hurib tawa ge sī, tsî Egipteǁîgu ge sadu di îga ge sauruǃgon, kunidi ǀkha tsî ǃgapi-aogu ǀkha, ǂĀxahurib kōse.

⁷O gu ge ǁîga ǃKhūb ǃoa ge ǂgai, ob ge ǁîba ǃkhaenasa ge ǂnûi sadu tsî Egipteǁîn tsîdu ǁaegu, tsîb ge huriba ǁîn ai ūhā tsî ǁîna ge ǃgū-ai; tsî sadu di mûdi ge Egipteb ǃnâ ta gere dī xūna ge mû. ǁNās khaoǃgâ du ge ǂgui tsēde ǃgaroǃhūb ǃnâ ge ǁan.

⁸ǃNubai ta ge tita Amorǁîn Jordanǃāb nauǃani ǁan hân di ǃhūb ǃnâ ge ūsī du; ǁîn ge sado ge ǃkhamū; xawe tita ge ǁîna sadu ǃomǁae ge mā, tsî du ge ǃhūb âna ǀumise ge ū, tsî tita ge ǁîna sadu di ais aiǃâ ge hîkākā.

⁹ǁKhātib ge Balaki, Sipori ôab, Moabǁîn di gao-aoba khâi tsî Israela ge ǃkhamū; ob ge sî tsî Bileammi, Beori ôaba ge ǂgai kai, ǀâxarexū dub nîse.

¹⁰Xawe tita ge Bileamma ǁnâu ǂgao tama ge i; xui-aob ge ge ǀkhaehâhâ du, tsî tita ge sado ǁîb ǃomǁaeba xu ge ore.

¹¹Tsî Jordanna ǃgâu tsî du ge Jerixos tawa sīo, o gu ge Jerixos di ǁgâuǁîga sadu ǃoagu toroba ge dī, Amorǁîn, Perisiǁîn, Kanaanǁîn, Hetiǁîn, Girgasiǁîn, Hiviǁîn tsî Jebusǁîn tsîna; xawe tita ge ǁîna sadu ǃomǁae ge mā.

¹²Tsî tita ge kai ǀgeruga sadu aiǃâ ge sî; ǁîgu ge ǁîna ge ǃhaebē sadu di ais aiǃâba xu ǁnā ǀgam gao-aokha Amorǁîn dikha khami, sadu di gôab ǀkha tama tsî ǁkhāti sadu di khās ǀkha tama.

¹³Tsî ta ge ǃhū-i, ǁî-i ǂama du sîsen tama-e ge mā du, tsî ǃādi hîa du ǂnubi tamade, tsî du ge ǁîdi ǃnâ ǁan hâ, tsî du ge ra ǂû ǂauxûiǂûǃhanagu tsî ǀkheraǃhanagu, ǂgā tama du hâgu xa.

¹⁴ǁNâi ǃao ǃKhūba, î du ǁîba ǃoaba ǂhauǃnâsib tsî amab tsîkha ǃnâ, î du dībē ǁnā elogu, sadu di îgu ge ǃāb nauǃani tsî Egipteb ǃnâ ǃoabaga, î du ǃKhūba ǃoaba.

¹⁵Tsî sadu mûǁae i ga ǂkhaba, ǃKhūba ǃoabasa, ǁnâi nētsē ǁhûiǂuibasen, tari-e du nî ǃoaba ǃkhaisa, ǁnā elogu, sadu di îgu hîa ǃāb nauǃani ge hâ igu gere ǃoabagu kas, Amorǁîn, ǃhūb âna du ǁanǃnâ hân di elogu kas hoasa; xawe tita tsî ti ommi dida xasa, sida ge ǃKhūba nî ǃoaba.

¹⁶Os ge ǁaes hoasa ǃeream tsî ge mî: Tātsē a-i tā ī, ǃKhūba da nî ǁnāxū ǃkhaisa, ǀkhara eloga da nî ǃoabase.

¹⁷ǃKhūb ge a sida di Elo; ǁîb ge ǁNāb sida tsî sida di îga Egipteǃhūba xu khobosis omma xu ge ūǃapab tsî nē kai saode sida di mûdi aiǃâ ge dīb tsî ǁnā daob ǁîba-ū da ge doeb ai tsî ǁnā ǁaedi, ǁîdi ǁaegu da ge doedi ǃnâ ge sâu daba.

¹⁸Tsî ǃKhūb ge sida ais aiǃâba xu ge ǂhāǂui ǁnā ǁaedi hoadi tsî Amorǁîn ǃhūb di ǁansaben tsîna. Sida on ge ǃKhūba nî ǃoaba, ǁîb a sida Elo xui-ao.

¹⁹ǃNubaib ge Josuaba ǁaes ǃoa ge mî: Sadu ge ǃKhūba a ǃoaba ǁoa, ǁîb a ǃanu Elo amaga, tauxa Elob ge a ǁî; ǁîb ge sadu di ǃûǂamdi tsî ǁoren tsîna ǀûba tide.

²⁰ǃKhūba ǁnāxū tsî du ga ǃhao eloga ǃoabao, ob ge ǁkhawa tsūdī du tsî nî hîǀhuru du, ǃgâidī dub ges khaoǃgâ.

²¹ǁGoasis ge ǁaesa Josuab ǃoa ge mî: Tātsē, xawe da ge ǃKhūba nî ǃoaba.

²²Ob ge Josuaba ǁaes ǃoa ge mî: ǀHûǀguitimî-aodu ge sado, sadu ǂûdu xa, ǃKhūba du ge go ǁhûiǂuibasen ǃkhaisa, ǁîba du nî ǃoabase. On ge: ǀHûǀguitimî-aoda, ti ge mî.

²³Î du ǁnâi ǃhao eloga dībē, sadu ǁaegu hâga, î du sadu di ǂgaoga ǂō ǃKhūb Israeli Elobǀî.

²⁴Os ge ǁaesa Josuab ǃoa ge mî: Sida ge ǃKhūb, sida Eloba nî ǃoaba, tsî da ge dommi âba nî ǁnâuǀnam.

²⁵Nētib ge Josuaba ǁnā tsēs ǁkhās ai ǃgaeǀhao-e ge dī ǁaes ǀkha; tsîb ge ǁî-e ǁîna ǂnûiǂgāse tsî ǂhanuse ge ǂnûiba Sexems tawa.

²⁶Tsî Josuab ge nē mîde ǂhanub ǂkhanis Elob dis ǃnâ ge xoaǂgā; tsîb ge kai ǀuisa ū tsî ǁîsa ǁnāpa ge ǂnûikhâi ǁnā terpentinhais, ǃKhūb di ǃanusib tawa hâs ǃgao.

²⁷Tsî Josuab ge ǁaes hoas ǃoa ge mî: Mû, nē ǀuis ge ǀhûǀguitimîxūse nî ība da, ǁnā mîdi ǃKhūb didi, hîab ge sada ǃoa ǃhoades go ǁnâu amaga; ā, ǀhûǀguitimîxūses ge nî ī sadu ǃoagu, sadu Eloba du ǂhumiba tidega.

²⁸ǃNubaib ge Josuaba ǁaesa ge sîbē, mâ-i hoa-e ǁî-i di ǀumi-amǃnâsa ǃoa.

²⁹Tsî i ge ge ī, ǁnā tsēdi khaoǃgâ, Josuab Nunni ôab, ǃKhūb di ǃgāb ge ǁō ǃkhaisa, ǀguikaidisi tsî disi kurigu â-ise.

³⁰Tsîn ge ǁîba ǀumi-amǃnâs âb di ǀkharib ǃnâ Timnat-Seraxs tawa ge ǁkhō ǃhommi Efraimmi ai ǁgoes, ǃhommi Gaasa xu ǀapasǀî.

³¹Tsî Israeli ge ǃKhūba gere ǃoaba Josuab di tsēdi hoadi kōse tsî ǁnā kaigu, ǂomxase Josuab khaoǃgâ ge ûigu, tsî ǃKhūb di sîsenni, Israelab ge dī-ūb hoaba a ǂangu di tsēdi hoadi kōse.

³²Tsîn ge ǁkhāti ǂkhōgu Joseb digu, Israeli ôan ge Egipteba xu ūǃapaga ge ǁkhō Sexems tawa, ǁnā ǃhanab ǃâb hîab ge Jakoba Hamori, Sexemmi îb tawa ǀguikaidisi marin ama ǁamab ǃnâ, ǁîb ge Joseb ôan di ǀumi kai xui-ao.

³³ǁKhātib ge Eleasari, Aronni ôaba ge ǁō, tsîn ge ǁîba ǃnoms Pinehab, ǁîb di ôab dis, Efraimmi ǃhommi aib ge māhes ǃnâ ge ǁkhō.