Read Khoekhoegowab Josuab 3 Bible Online

Josuab 3 - Khoekhoegowab bible

Josuab 3

¹Ob ge Josuaba ǃnauǁgoaga ge khâi tsîn ge Sitimsa xu doe tsî Jordanǃāb tawa ge sī, ǁîb tsî Israeli ôan hoan; tsîn ge ǁnāpa ge hâǁgoa, ǃgâun ges aiǃâ.

²Tsî i ge ge ī, ǃoabasabegu ǃnona tsēdi di ǀunis ai ǁgoeǃkhaisa ge ǃgûǃganu ǃkhaisa;

³tsî gu ge ǁaesa mîmā tsî ge mî: ǃKhūb, sadu Elob di ǃgaeǀhaos di ǂgaesa du ga mûo tsî Leviǁî pristergu ǁîsa ra taniga, o du ge ǁkhāti sadu di ǃkhaisa xu dāǁnâ tsî nî ǁîsa sao.

⁴Xawe a-i soa-e hâ sadu ǁaegu tsî ǁîs ǁaegu ǀgamǀoadisi nî ī ǂhâgu kōse ǀguiros ǃnâ; î du ǁîsa tā ǀgū, ǂan du nîga ǁnā daob, ǁîb ai du nî ǃgûba; sadu ge ǁnā daoba ǃgû tama hâ i ǁari tsî aetsē xui-ao.

⁵Tsî Josuab ge ǁkhāti ǁaes ǃoa ge mî: Khaisen du re, ǁarib ge ǃKhūba sadu ǁaegu buruxa dīna nîra dī xuige.

⁶ǁNās ǁkhās xaseb ge Josuaba pristergu ǃoa ǃhoa tsî ge mî: ǃGaeǀhaos di ǂgaesa ūkhâi î go nē ǁaes di ais aiǃâ ǃgû. O gu ge ǃgaeǀhaos di ǂgaesa ūkhâi tsî ǁaes aiǃâ ge ǃgû.

⁷ǃKhūb ge Josuab ǃoa mî xui-ao: Nē tsēs ai ta ge tita satsa nî kaikaitsoatsoa Israeli hoab di mûdi aiǃâ, ǂann nîga, tita sa ǀkha nîra hâ ǃkhaisa, Moseb ǀkha ta ge hâ i khami.

⁸Ots ge satsa pristergu, ǃgaeǀhaos di ǂgaesa ra taniga mîmā tsî nî mî: Jordanǃāb ǁgammi di ǀkhâuǀams tawa go ga sīo, o go ge Jordanǃāb ǃnâ nî mâǀgara.

⁹ǃNubaib ge Josuaba Israeli ôan ǃoa ge mî: ǃGû, î du ǃKhūb, sadu Elob di mîde ǃgâ.

¹⁰ǃAruǀîb ge Josuaba ge mî: Nēs tawa du ge nî mûǂan, ûitsama Elob sadu ǁaegu hâ ǃkhaisa tsî sadu di ais aiǃâba xub ge Kanaanǁîn, Hetiǁîn, Hiviǁîn, Perisiǁîn, Girgasiǁîn, Amorǁîn tsî Jebusǁîn tsîna nî doeǁgaǂui ǃkhaisa.

¹¹Mû, ǃgaeǀhaos di ǂgaes ǃhūbaib hoab di ǃKhūb dis ge sadu aiǃâ Jordanǃāb ǃnâ nî ǃgâu.

¹²Î du ǁnâi ūbasen disiǀgamǀa khoegu Israeli ǃhaodi diga, mâ ǃhaos hoasa xu ǀgui khoeba.

¹³Tsî i ge nîra ī, pristergu ǃKhūb di ǂgaes, ǃhūbaib hoab di ǃKhūb disa ra tanigu di ǂaiǃnāgu ga Jordanǃāb di ǁgammi ǃnâ sī sâ ǃnubai gu ge Jordanǃāb di ǁgamga nîra ǃgaoǁnâhe, ǁnā ǁgamgu, ǀgapiseba xu ra dâuǁgôaga, tsî gu ge ǀhû hâ ǁgammi ase nîra mâ.

¹⁴Tsî i ge ge ī, ǁaes ge tentomdi âna xu dāǁnâo, Jordannan nî ǃgâuse, o gu ge pristerga ǃgaeǀhaos di ǂgaesa ǁaes di ais aiǃâ ge tani.

¹⁵Tsî ǁnāgu, ǂgaesa ra tanigu ge Jordanǃāb kōse sī tsî pristergu, ǂgaesa ra tanigu di ǂaidi ge ǁgam-i ǃnâ ǂgâo (tsî Jordanǃāb ge ǃgaoǁaeb di tsēdi hoade amǃgâkha âb hoakha kōse ge ǀoa hâ i),

¹⁶o gu ge ǀgapiseba xu ra ǁgôaxa ǁgamga ge mâ, ǂhanuse gu ge ǃapa, ǀhû hâ ǁgammi ase, ǃnūse Adams, Saretans xōǀkhā ǁgoesa xu; tsî ǁnāgu ǂGās di Hurib, ǂŌxahuribǀî ra dâuǁgôagu ge ge ǃgaoǁnâhe. ǃNubais ge ǁaesa ge ǃgâu, Jerixos ǃoa-ai.

¹⁷O gu ge pristergu, ǃgaeǀhaos ǃKhūb dis di ǂgaesa ra taniga ge mâǁapo ǂnâsa ǃhūb ai Jordanǃāb ǁaegu. Ob ge Israeli hoaba ǂnâsa ǃhūb ai ge ǃgâu, hoaraga ǁaes ge Jordanna doeǃgâutoas kōse.