Read Khoekhoegowab Josuab 4 Bible Online

Josuab 4 - Khoekhoegowab bible

Josuab 4

¹Tsî i ge ge ī, ǁaes ge Jordanna doeǃgâutoao, ob ge ǃKhūba Josuab ǀkha ǃhoa tsî ge mî:

²Disiǀgamǀa khoega ūbasen du ǁaesa xu, mâ ǃhaos hoasa xu ǀgui khoeba.

³Î du ǁîga mîmā, mî rase: Ūkhâibasen go nēpa Jordanǃāb ǁaeguba xu, pristergu di ǂaidi go ǁîs ai mâǁapo hâ i ǃkhaisa xu disiǀgamǀa ǀuidi, ǁāǁāhe hâde, î go ǁîde sago ǀkha ūǃgâu, î go ǁîde ǂnûi ǁgoeǃkhais, ǁîs ai go nē tsuxub ǃnâ nî hâǁgoas ǃnâ.

⁴Ob ge Josuaba ǁnā disiǀgamǀa khoega ge ǂgai, Israeli ôana xub ge ǂnûiǂgāga, mâ ǃhaos hoasa xu ǀgui aoba.

⁵Tsî Josuab ge ǁîgu ǃoa ge mî: Aiǃgû go ǃKhūb, sago Elob di ǂgaes aiǃâ, Jordanǃāb ǁaegub kōse, î go mâb hoab âgo ǀgui ǀuisa ǁîb di ǃhōs ai ūkhâi, ǃhaodi Israeli ôan didi di ǀgaus ǃoa;

⁶îs nēsa saose ī sadu ǁaegu; sadu di ôan ga ǁari dîo: Mâ ǀuiǃnôade kha nēde? ti,

⁷o du ge ǁîn ǃoa nî mî: ǁGamgu Jordanǃāb digu ge ǃgaeǀhaos di ǂgaes ǃKhūb dis aiǃâ ge ǃgaoǁnâhe hâ i amaga; Jordannas ge ǃgâuo, o gu ge Jordanǃāb di ǁgamga ge ǃgaoǁnâhe; o di ge nē ǀuide Israeli ôana ǂâiǂâixūse nî ība ǀamosib kōse.

⁸On ge Israeli ôana ǁnāti ge dī, Josuab ge mîmās xase; tsîn ge disiǀgamǀa ǀuide ge ūkhâi Jordanǃāb ǁaeguba xu, ǃKhūb ge Josuab ǃoa ǃhoa khami, Israeli ôan di ǃhaodi di ǀgaus ǃoa; tsîn ge ǁîde ge ūsīǀhao tsuxuǁgoeǃkhais tawa, tsîn ge ǁîde ǁnāpa ge ǂnûi.

⁹Tsî Josuab ge ǁkhāti disiǀgamǀa ǀuide ge ǂnûikhâi Jordanǃāb ǁaegu ǁnā ǃkhais, pristergu, ǃgaeǀhaos di ǂgaesa ge tanigu di ǂaidi ǁîs ai ge mâ is ai; tsî di ge ǁnāpa hâ nētsēs kōse.

¹⁰Tsî pristergu, ǂgaesa ge tanigu ge Jordanǃāb ǁaegu ge mâ, ǁnā xūn, ǃKhūb ge Josuaba mîmān ǁaesab nî mîban hoan ge dītoahes kōse, Moseb ge Josuaba mîmān hoan ǃoa. Os ge ǁaesa ǃhae tsî ge doeǃgâu.

¹¹Tsî i ge ge ī, ǁaes ge ǃgâutoao, os ge ǃKhūb di ǂgaesa ge ǃgâu tsî pristergu ona ǁaes di ais aiǃâ.

¹²Tsî Rubenni ôan, Gadi ôan tsî ǃkhare ǃhaos Manaseb dis tsîn ge ǁâtanisen hâse Israeli ôan di ais aiǃâ ge ǃgâu, Moseb ge ǁîna ǃoa ǃhoas xase.

¹³Hakadisiǀoadisi nî ī ǂhomisen hâ toro-aogu ge ǃKhūb di ais aiǃâ ge ǃgâu, ǃkhammi ǁga ǂgādi Jerixos dide ǃoa.

¹⁴ǁNā tsēs ǁkhās aib ge ǃKhūba Josuaba ge kaikai Israels aiǃâ, on ge ǁîba ge ǃao, Moseban ge ǃao khami ǁîb di ûitsēdi hoadi kōse.

¹⁵Tsî ǃKhūb ge Josuab ǁga ge mî:

¹⁶Mîmā pristergu, ǃgaeǀhaos di ǂgaesa ra taniga, î gu Jordanna xu ǃapaǂoaxa ti.

¹⁷ǃNubaib ge Josuaba pristerga mîmā tsî ge mî: ǃApaǂoaxa go Jordanna xu.

¹⁸Tsî i ge ge ī, pristergu, ǃKhūb di ǃgaeǀhaos di ǂgaesa ra tanigu ge Jordanǃāb ǁaeguba xu ǃapa tsî pristergu di ǂaiǃnāgu ge ǂnâsa ǃhūb kōse ǂgaekhâiheo, o gu ge Jordanǃāb di ǁgamga ǁkhawa ǁîgu di ǃkhais ai oahā tsî ge dâu, ǁaris tsî aetsēs khami, ǁîgu di amǃgâkha hoakha ai.

¹⁹Tsî ǁaes ge disiǁî tsēs ǁkhâb dis ai Jordanna xu ge ǃapaǂoaxa; tsîn ge Gilgals tawa sī ge ǁgoe, Jerixosa xu aiǂoasǀî.

²⁰Tsî Josuab ge ǁnā disiǀgamǀa ǀuidi, Jordanna xun ge ūde Gilgals tawa ge ǂnûikhâi.

²¹Tsîb ge Israeli di ôan ǃoa ǃhoa tsî ge mî: Sadu di ôan ga ǁari ǁîn di îga dî tsî: Mâ ǀuide kha nēde? ti mîo,

²²o du ge sadu di ôana hōhōǃnâ tsî: ǂNâsa ǃhūb ain Israeli ôana nē Jordanna ge ǃgâu amaga, ti nî mî.

²³ǃKhūb, sadu Elob ge Jordanǃāb di ǁgamga sadu ǂaidi aiǃâ ge ǂnâsa kai, ǃgâu du ges kōse; ǃKhūb, sadu Elob ge ǂĀxahurib tawa dī khami, sada di ais aiǃâb ge ǂnâ kai bi, ǃgâu da ges kōse,

²⁴ǁaedi, ǃhūbaib didi hoadi ǃKhūb di ǃommi a ǀgaisa ǃkhaisa nî ǂanga; ǃKhūb, sadu Eloba du nî ǃaose, mâ ǁaeb hoab ai.