Read Khoekhoegowab Josuab 5 Bible Online

Josuab 5 - Khoekhoegowab bible

Josuab 5

¹Tsî i ge ge ī, Amorǁîn di gao-aogu, Jordanǃāb nē ǃanib ai huriǂoasǀî hâgu hoagu, tsî Kanaanǁî gao-aogu, hurib amǃgâ hâgu hoagu ge ǁnâuo, ǃKhūb ge Jordanǃāb di ǁgamga ǂnâ kai ǃkhaisa Israeli ôan di ais aiǃâ, ǃgâu bi da ges kōse, ob ge ǂgaob âna ge tsuni tsî ǂgaoxa-i xare-i ge ǁîn ǃnâ hâ tama ge i, Israeli ôan di ais aiǃâ.

²ǁNā ǁaeb ǁkhāb aib ge ǃKhūba Josuab ǃoa ge mî: ǀUigôade dībasen îts Israeli ôana ǁkhawa ǀgamǁî ǃnāsa ǃgao.

³ǃNubaib ge Josuaba ǀuigôade dībasen tsî Israeli ôana ge ǃgao aikhōgu di ǃnoms ai.

⁴Tsî nēs ge ǃkhais, ǁîs ǃaromab Josuaba ǁîna gere ǃgaosa: ǁNā ǁaes, Egipteba xu ge doeǂoas hoas, aoregu hoagu, toro-aogu hoagu ge ǃgaroǃhūb ǃnâ daob ai ge ǁō, Egipteba xun ge doeǂoao.

⁵ǁNā ǁaes, doeǂoa ges hoaragas ge ǃgaohe hâ i xui-ao, xawe ǁnā ǁaes, ǃgaroǃhūb ǃnâ daob ai ge ǃnaes hoas ge doeǂoan ges khaoǃgâ ǃgaohe tama ge hâ i.

⁶Israeli ôan ge hakadisi kuriga ǃgaroǃhūb ǃnâ gere ge doema, toro-aon di ǁaes hoas, Egipteba xu ge ǃgûǂoas, ǃKhūb di domma ǁnâuǀnam tama ge is ge kās kōse, ǁnān, ǃKhūb, ǁîn îgu Elob sadab nî ǁîba mā ti ge nūbab, ǃhūb, daib tsî danib tsîkha ra dâuǃnâba xui-ao.

⁷Xawe ǁîn di ôagab ge ǁîgu di ǃkhais ai ge ǂnûi, ǁîgab ge Josuaba gere ǃgao, aikhōba gu ūhâ amaga, daob ai gu ǃgaohe tama hâ i xui-ao.

⁸Tsî i ge ge ī, hoaraga ǁaes ge ǃgaotoaheo, o gu ge ǁîgu di ǃkhais ai ge hâ, ǁgoeǃkhais ǃnâ, ǂuru gu ges kōse.

⁹Ob ge ǃKhūba Josuab ǃoa ge mî: Nētsē ta ge tita taosib Egipteb diba sado xu go ǁkhaebē. ǁNā-amagas ge ǁnā ǃāsa Gilgal ti ra ǂgaihe, nētsēs kōse.

¹⁰Israeli ôan ge Gilgals tawan ǁgoe hîa Pasxaba ge dī disihakaǀaǁî tsēs ǁnā ǁkhâb dis ai ǃuia, Jerixos di ǂgādi ai.

¹¹Tsîn ge ǃhūb di ǃhorob nau kurib dib xa sao ra tsēs Pasxab dis khaoǃgâ ǀkhuruoǃnâ peregu tsî amǀkhāhe hâ ǃnurugu tsîga gere ǂû, ǁnā tsēs ǁkhās ai.

¹²Tsî manab ge sao ra tsēs ai ge toa, ǃhūb di ǃhorob nau kurib dib xan ge ǂûo; on ge Israeli ôana ǃaruǀî mana-e ūhâ tama ge hâ i, tsîn ge ǁnā kurib ǁkhāb ǃnâ Kanaanǃhūb di ūǀkhīb xa ge ǂû.

¹³ǃAruǀî i ge ge ī, Josuab Jerixos tawa hâ hîab ge ǃgapakhâi tsî ge kō, tsî mû, khoeb ge ǁîb ǃoa-ai ge mâ i, ǂgaeǂuihesa gôaba ǃomǁae ūhâba. Ob ge Josuaba ǁîb ǃoa ǃgû tsî ge dî: Sida dits a tamas ka i o sida khākhoen dits a?

¹⁴Ob ge: Hî-î, ti ge mî, xawe ta ge tita ǂnubis ǃKhūb dis di gaosa, ǀase ta ge go hā. ǁGoasib ge Josuaba ais âb ai ǃhūb ai ǀgoreǀî tsî ǁîb ǃoa ge mî: Tare xū-ets ra ti ǀhonkhoetsa ǃhoa sa ǃgāta ǃoa?

¹⁵Ob ge ǂnubis ǃKhūb dis di gaosaba Josuab ǃoa ge mî: Sa ǁharora ǂgaeǂui ǂaira âtsa xu, ǁnā ǃkhais, ǁîs aits mâs a ǃanu xuige. Ob ge Josuaba ǁnāti ge dī.