Read Khoekhoegowab Josuab 6 Bible Online

Josuab 6 - Khoekhoegowab bible

Josuab 6

¹Tsî Jerixos ge ǁāga ǂganam, tsî ge ǂganamsen hâ i Israeli ôan di ais aiǃâ; khoe-i xare-i ge ǂoa tama tsî khoe-i xare-i ge ǂgâ tama ge hâ i.

²ǃNubaib ge ǃKhūba Josuab ǃoa ge mî: Mû, tita ge Jerixosa ǁîs di gao-aob tsî ǁîs di ǃkham ǁkhā ǁē-aogu ǀkha sa ǃomǁae go mā.

³O go ge sago toro-aogo hoago ǃāsa nî ǃgûǂnamipe, ǃāsa ǀgui ǃnās ai ra hâǂgāǃâ; nēti go ge ǃnani tsēdi kōse nî dī.

⁴Tsî hû pristergu ge hû bairaxâiǁnâga nî tani ǂgaes aiǃâ; o du ge hûǁî tsēs ai ǃāsa hû ǃnādi kōse nî ǃgûǂnamipe; o gu ge pristerga xâiǁnâga nî xâi.

⁵O i ge nîra ī, xâiǁnâb ra ǂause xâihe ǃnubai, xâiǁnâb di ǀōba du ga ǁnâuo, os ge ǁaes hoasa kaise nî dâ; ob ge ǃās di ǂnubiǂgoaba nîra ǁnāǁgoe, tsîs ge ǁaesa ǁîba-ū nîra ǃapaǂgâ mâ-i hoa-e ǁî-i ǃoa-ai.

⁶ǃNubaib ge Josuab, Nunni ôaba pristerga ǂgai tsî ǁîgu ǃoa ge mî: ǃGaeǀhaos di ǂgaesa tani, î gu hû pristerga hû bairaxâiǁnâga tani, ǃKhūb di ǂgaes aiǃâ.

⁷Tsî ǁaes ǃoab ge ge mî: ǃGûsī î du ǃāsa ǃgûǂnamipe, tsî ǁāǁāǁâtanisen hâna an ǃgû ǃKhūb di ǂgaes aiǃâ.

⁸Tsî i ge ge ī, Josuab ge ǁaes ǃoa ǃhoas xase gu ge hû pristerga ge ǃgû, hû bairaxâiǁnâga ra taniǃâ ǃKhūb di ais aiǃâ; ǃgûgauǃâ gu ge bairaxâiǁnâga gere xâi; tsî ǃgaeǀhaos di ǂgaes ge ǁîga ge sao.

⁹Tsî ǁâtanisen hâb hoab ge pristergu, xâiǁnâga ra xâigu di ais aiǃâ ge ǃgû; tsî nau ǁaes, khaosǀkhāb ai hâs ge ǂgaesa ge sao, ǃgû gu gau tsî xâiǁnâga gu ra xâi hîa.

¹⁰Tsî Josuab ge ǁaesa mîmā tsî ge mî: Sadu ge dâ tide, ā, dommi âdu ge ǁnâuhe tide, tsî mî-i xare-i ge sadu di amsa xu ǂoa tide, ǁnā tsēs ai ta nî: Dâ! ti mîs kōse; ǃnubai du ge nî dâ.

¹¹Tsîb ge ǃKhūb di ǂgaesa ǃāsa ge ǃgûǂnamipe kai, ǀgui ǃnās ai ǁîsa ra hâǂgāǃâ; ǃnubain ge ǁkhawa ǁgoeǃkhais ǃnâ hā tsî ǁgoeǃkhais ǃnâ ge hâǁgoa.

¹²ǁNās khaoǃgâb ge Josuaba ǃnauǁgoaga ge khâi, tsî pristergu ge ǃKhūb di ǂgaesa ge tani.

¹³Tsî hû pristergu ge hû bairaxâiǁnâga ǂgaes ǃKhūb dis aiǃâ ra taniǃâ ge ǃgûgau i tsî xâiǁnâga gere xâi; tsî ǁâtanisen hân ge ǁîgu aiǃâ ge ǃgû, tsî nau ǁaes, khaosǀkhāb ǃgâ hâs ge ǃKhūb di ǂgaesa ge sao, ǃgû gu gau tsî xâiǁnâga gu ra xâi hîa.

¹⁴Nētin ge ǃāsa ǀgui ǃnās ai ge ǃgûǂnamipe ǀgamǁî tsēs ai; tsîn ge ǁkhawa ǁgoeǃkhais ǃoa ge oa. Nētin ge ǃnani tsēdi kōse gere dī.

¹⁵Tsî i ge ge ī, hûǁî tsēs ai, on ge ǃnauǁgoaga ge khâi, ǁgoas ra ǁgoa hîa tsîn ge ǃāsa gere ǃgûǂnami ǁkhā dommi ai hû ǃnādi kōse; ǁnā tsēs ǀguis ain ge ǃāsa hû ǃnādi kōse ge ǃgûǂnami.

¹⁶O i ge hûǁî ǃnās ai ge ī, pristergu xâiǁnâga ra xâi hîa, ob ge Josuaba ǁaes ǃoa ge ǃhoa: Dâ re! ǃKhūb ge ǃāsa sado go mā xuige.

¹⁷Xawe ǃās ge ǃKhūba nî ǀâxarexūse ība, ǁîs tsî ǁîs ǃnâ hân hoana; ǀai-aos Raxas ǀguis ge nî ûi ǁîs tsî ǁîs ǀkha ommi ǃnâ hân hoan, ǁîs ǁnā sîsabekha, sada ge sîǂuikha ge gaugau amaga.

¹⁸ǀÂxarehe hâ xūn ǀguina xu ǃûisen, î du ǀnîsi tā ǀâxarexūsen, ǀâxarehe hân xa ūs ǀkha, î du Israeli di ǁgoeǃkhaisa tā ǀâxarexūse dī, î du ǁîsa ǁkhāti tā ǁgonǁgonǂgao.

¹⁹Tsî ǀhaiǀurib, ǃhuniǀurib, ǂaib tsî ǂnūǀurixapan ge ǃKhūba nî ǃanuba; ǃKhūb di ǁuib ǃnân ge nî sī.

²⁰Os ge ǁaesa ge dâ, xâiǁnâga gu ra xâi hîa. Tsî i ge ge ī, ǁaes ge xâiǁnâb di ǀōba ǁnâuo, os ge ǁaesa ama kai dâba ge dâ; ob ge ǂnubiǂgoaba ge ǁnāǁgoe, tsî ǁaes ge ǃās ǃnâ ge ǃapa, mâ-i hoa-e ǁî-i ǃoa-ai, tsîn ge ǃāsa ge ū.

²¹Tsîn ge ǃās ǃnâ hân hoana ge ǀâxare, aoba xu taras kōse, ǀgôaba xu kairab kōse tsî gomab kōse tsî gūb kōse tsî eseli kōse gôab di ǀāb ǀkha.

²²Tsî Josuab ge ǁnā ǀgam khoekha, ǃhūba ge ǃkhēkha ǃoa ge mî: ǃGûǂgâ taras hîa ǀai-aos di ommi ǃnâ, î kho ǁnā tarasa ǁnāpa xu ūǂoaxa, ūs hân hoan ǀkha, sakho ge ǁîsa nūbas xase.

²³ǃNubai kha ge ǂkham khoekha, ǃkhē-aokha ǂgâ tsî Raxasa ge ūǂui tsî ǁîs di îb, ǁîs di îs, ǁîs di ǃgâsagu tsî ūs hân hoana; ǁîs di ommi din ona kha ge ūǂui tsî ǁîna Israeli di ǁgoeǃkhais ǃauga ge xū.

²⁴On ge ǃāsa ǀaes ǀkha ge khauǃkhū tsî ǁîs ǃnâ hân hoana; ǀhaiǀurib tsî ǃhuniǀurib ǀguiban ge ǂaib tsî ǂnūǀurisoan ǀkha ǃKhūb ommi di ǁhōb ǃnâ ge mā.

²⁵Xawe ǀai-aos Raxasab ge Josuaba ge ûi kai ǁîs di îb di ommi din tsî ūs hân hoan tsîna; os ge Israeli ǁaegu ge ǁan nētsēs kōse, ǁnā sîsabekha, Josuab ge Jerixosa kha nî ǃkhēse sîkhas ge gaugau amaga.

²⁶ǁNā ǁaeb ǁkhāb aib ge Josuaba ǁîna nūba tsî ge mî: ǀÂxarexūhesab ge ǁnā khoeb, ǃKhūb di ais aiǃâ khâi tsî ga Jerixosa ǂnubiba; ab ǁîsa ǃgaoǃgao ǁîb di ǂguroǃnaesabeb ai, îb ǁîs di ǁāga ǂnûi ǁîb di ǃgaoǃgaob ai!

²⁷Nētib ge ǃKhūba Josuab ǀkha ge hâ i, tsî gommi âb ge ǃhūb hoaragaba ge ǃgûǃganu.