Read Khoekhoegowab Josuab 7 Bible Online

Josuab 7 - Khoekhoegowab bible

Josuab 7

¹Xawe Israeli ôan ge ǃûǂamsa ge dī ǀâxarehe hâ xūn tawa: Axanni, Karmib ôab, Sabdib di ôab, Serab ôab, Judab di ǃhaos dib ge ǀâxarehe hân xa ge ū. ǃNubaib ge ǃKhūb di ǁaiba ge khâi Israeli ôanǀî.

²Tsî Josuab ge Jerixosa xu Ais, Bet-Avens tawa ǁgoes, Bet-Elsa xu aiǂoasǀî hâs ǃoa khoega sîo, ob ge ǁîgu ǃoa ǃhoa tsî: ǃGûǃapa î go ǃhūba ǃkhē! ti ge mî. O gu ge ǁnā khoega ǃgûǃapa tsî Aisa ge ǃkhē.

³ǁÎs khaoǃgâ gu ge Josuab ǃoa oa tsî ǁîb ǃoa ge mî: As tā ǁaes hoasa ǃapa, a gu ǀgamǀoadisi aogu kas, ǃnonaǀoadisi aogu kas hoasa ǃapa, Aisa gu nî ǂnause, tā ǁaes hoasa ǁnāǀî ǀhupuǀhupu, ǀoro khoeron komo.

⁴Nēti gu ge ǁaes di ǃnonaǀoadisi nî ī khoega ǁnāǀî ge ǃapa; ǁîgu ge ge ǁhâ Ais khoegu di ais aiǃâ.

⁵Tsî Ais di khoegu ge ǁîgu xa ǃnonadisiǃnaniǀa khoega ǂnau tsî ǁîga ge ǃgôaǃgon ǁāb aiǃâba xu Sebarims kōse, tsî ǁnō-i tawa ge ǂnau gu. ǃNubaib ge ǁaes di ǂgaoba tsuni tsî ge ǁgam kai.

⁶ǃNubaib ge Josuaba saran âba ǀkhau tsî ais âb ai ge ǁnā ǃhūb ai ǃKhūb di ǂgaes aiǃâ ǃuis kōse, ǁîb tsî Israeli di kaigu on, tsî gu ge tsara-e ge tsoro ǁîgu di danadi ai.

⁷Ob ge Josuaba ge mî: Okha, ǃKhūtse, ǃKhūtse, tare xū-i ǃaromats ǁnâi nē ǁaesa Jordanna ge ǃgâu kai, Amorǁîn di ǃomǁaets nî mā dase, hîǀhuru dats nîse? Î da ga ǂkhî tsî Jordanǃāb nauǃanib ai hâ hâ i!

⁸Ti ǃKhūtse, tare-e ta kha ǁnâi nî mî, Israeli khākhoen âb aiǃâ ǃaoba go unus khaoǃgâ?

⁹Kanaanǁîn tsî ǃhūb di ǁansaben hoan ga ǁnâuo, on ge nî xāǂgā da tsî ǀons âda ǃhūbaiba xu nî ǀari. Tsî tare-ets ǁnâi sa kai ǀonsa nî dī-ū?

¹⁰ǁGoasib ge ǃKhūba Josuab ǃoa ge mî: Khâi, tare xū-i ǃaromats kha ǁnâi ais âts ai ǁgoe?

¹¹Israeli ge go ǁore; tsîn ge ǁkhāti ti ǃgaeǀhaos, ǁîna ta ge mîmāsa go ǃûǂam, tsîn ge ǁkhāti ǀâxarehe hân xa go ū tsî ǁkhāti go ǀâ tsî ǁkhāti go ǂhomi tsî sîsenūdan ân ǃnaga ǁîna go ǁgui.

¹²ǁNā-amagan ge Israeli ôana nî mâ ǁoa ǁîn di khākhoen aiǃâ, ǃaoban ge khākhoen ân di ais aiǃâ nî unu, ǀâxarexū kain go amaga. Tita ge ǃaruǀî sadu ǀkha hâ tide, ǀâxareba du ga sadu ǁaeguba xu hîkākā tama io.

¹³Khâi îts ǁaesa khai îts mî: ǁArisa khaisenba, nētib ra ǃKhūb, Israeli Eloba mî xuige: ǀÂxareb ge sa ǁaegu hâ, Israeltse, ots ge sa khākhoen di ais aiǃâ nî mâ ǁoa, ǀâxarebats nî sa ǁaeguba xu dībēs kōse.

¹⁴O du ge ǁgoaǁaeb ai nî ǀgū, sadu di ǃhaodi ī xase; o i ge nîra ī, ǁnā ǃhaos, ǃKhūb xa ga hōhes, ǁîs ge nî ǀgū hā, ǃhaoǃnādi ī xase, tsî ǃKhūb xa ga hōhe ǃhaoǃnās, ǁîs ge nî ǀgū ommi din ī xase, tsî ǃKhūb xa ga hōhe ommi din, ǁîn ge nî ǀgū ao-aobese.

¹⁵O i ge nîra ī, ǀâxareb ǀkha ga hōheb nî ǀaes ǀkha khauǃkhūhe ǃkhaisa, ǁîb tsî ūb hân hoan tsîna, ǃKhūb di ǃgaeǀhaosab ge ǃûǂam amaga, tsî gâresi-eb ge Israeli ǃnâ dī amaga.

¹⁶ǃNubaib ge Josuaba ǃnauǁgoaga khâi tsî Israela ge ǀgū kai, ǁîb di ǃhaodi ī khami, os ge Judab di ǃhaosa ge hōhe.

¹⁷Tsî Judab di ǃhaosab ge ǀgū kaio, os ge ǃhaoǃnās Serab disa ge hōhe. Tsî Serab di ǃhaoǃnāsab ge ǀgū kaio ao-aobese, ob ge Sabdiba ge hōhe.

¹⁸Tsî ommi din âbab ge ǀgū kaio ao-aobese, ob ge Axanna ge hōhe, Karmib ôab, Sabdib ôab, Serab ôab, Judab ǃhaos diba.

¹⁹ǁGoasib ge Josuaba Axanni ǃoa ge mî: Ti ôa, ǃKhūb, Israeli Eloba ǃgôa îts ǁîba ǁguiǁnâba; îts tita ǂanǂan re, tare xū-ets go dī ǃkhaisa; tā xū-e tita xu gaugau.

²⁰Ob ge Axanna Josuaba ǃeream tsî ge mî: Amase ta ge ǃKhūb, Israeli Elob ǃoagu ǁore tsî nēti tsî nauti goro dī.

²¹Tita ge ǁkhâuǁnâxūn ǃnâ ǃgomǀgausa tsî ǂkhaisa Babilonǁî ǂamsaraba go mû xui-ao tsî ǀgamkaidisi sekeldi ǀhaiǀurib xa tsî ǃhuniǀurinammi, korodisi sekeldi kōse ǃgomma, o ta ge tura tsî ǁîna ge ū; tsî mû, ǁîn ge ǃhūb ǃnâ gaugauhe hâ ti tentoms ǁaegu, tsî ǀhaiǀuriba ǁîn ǃnaga.

²²ǃNubaib ge Josuaba sîsabega ge sî, tentoms ǃoa ge ǃkhoega; tsî mû, ǁîn ge tentoms ǃnâ gaugauhe ge hâ i, tsî ǀhaiǀuriba ǁîn ǃnaga.

²³O gu ge ǁî xūna tentoms ǁaeguba xu ū tsî Josuab tawa tsî Israeli ôan hoan tawa ge ūsī; tsî gu ge ǁîna ǃKhūb di ais aiǃâ ge tsoroǁgui.

²⁴On ge Josuab tsî Israeli hoab ǁîb ǀkha Axanna, Seraxi ôab, ǀhaiǀurib, ǂkhaisa ǂamsarab, ǃhuniǀurinammi, ǁîb di ôagu, ǁîb di ôadi, ǁîb di goman, ǁîb di eseln, ǁîb di ǀgoan, ǁîb di tentoms tsî ūb hân hoana ge ū, tsîn ge ǁîna ǃgoaǃnāb Axori ǃoa ge ūǃgû.

²⁵Ob ge Josuaba ge mî: Matikōsets go gongonǃnâ da! Ob ge ǃKhūba satsa nî gongonǃnâ nētsēs ǁkhās ai. Ob ge hoaraga Israela ǁîba ge ǀuiǁhom, tsîn ge ǁîna ǀaes ǀkha ge khauǃkhū; tsîn ge ǀuide ǁîn ai ge ao.

²⁶Tsîn ge kai ǀuiǁkhopo-e ǁîb ai ge ǂnûikhâi, nētsēs kōse hâ-e. Nētib ge ǃKhūba ǀaexasib ǁîb di ǁaib diba xu ge oa. ǁNā-amagas ge ǀons ǁnā ǃkhais disa ǃGoaǃnāb Axori dib, ti ge ǂgaihe nētsēs kōse.