Read Khoekhoegowab Josuab 8 Bible Online

Josuab 8 - Khoekhoegowab bible

Josuab 8

¹ǃNubaib ge ǃKhūba Josuab ǃoa ge mî: Tā ǃao îts tā ǂkhabuǂâi. Toroǁaes hoasa sa ǀkha ū îts khâi îts ǃapa Ais ǁga; mû, tita ge Ais di gao-aob, ǁîb di ǁaes, ǁîb di ǃās tsî ǁîb di ǃhūb tsîna sa ǃomǁae go mā.

²Ots ge Ais tsî gao-aob âsa nî dī-ū, Jerixos tsî gao-aob âsats ge dī-ūs ǁkhās xase; ǁîs di ǁkhâuǁnâs tsî ǁîs di ǀgoan ǀguina du ge sado nî ǀâbasen. ǃHabi-aoga ǂnûibasen ǃās ǃoagu ǁîs ǃgâbǀî.

³Ob ge Josuaba khâi tsî toroǁaes hoasa, Ais ǃoan nî ǃapase. Tsî Josuab ge ǃnonaǀoadisi khoega ge ǃkhōǂuibasen, ǃkham ǁkhā ǁē-aoga, tsîb ge ǁîga tsuxuba ge sîǂui,

⁴tsîb ge mîmā gu tsî ge mî: Mûbasen î go ǃāsa ǃgâǃhabi-aose ǁgoeba ǁîs ǃgâba xu; xawe î go tā ǃnūse bē ǃāsa xu, î go hoatsama ǂhomisen hâ.

⁵O ta ge tita hâǀkhā te hâ ǁaes hoas ǀkha ǃāsa nî ǀgū. Tsî ī-i kao, ǂoaxa tsî gu ga ǃoa geo, ǂguro ǃnās ais khami, o ge ge nî ǃhū ǁîn di ais aiǃâ.

⁶A gu ǁnâi ǂoaxa sige khaoǃgâ, hoaragase ge ǁîga ǃāsa xu nî ǂgaebēs kōse; on kom nî mîo: ǁÎgu kom ra ǃhūo, ǂguro ǃnās ai khami. O ge ge ǁîgu di aidi aiǃâ nî ǁhâ.

⁷ǃNubai go ge ǁgoeǃgâǃkhaisa xu khâi tsî ǃāsa nî ū; ǃKhūb, sago Elob ǁîsa sago ǃomǁae nîra mā xui-ao.

⁸Tsî i ge nîra ī, ǃāsa go ga ūo, o go ge ǃāsa ǀaes ǀkha nî ǂhubi; ǃKhūb di mîs ǃoa go ge nî dī; mû, tita ge ǁîsa ge mîmā go.

⁹Nētib ge Josuaba ǁîga ge sî, tsî gu ge ǁgoeǃgâǃkhais ǃoa ge ǃgû, tsî gu ge Bet-Els tsî Ais tsîra ǁaegu ge hâ huriǂoasǀî, xawe Josuab ge ǁnā tsuxub ǃnâ ǁaes di ǁaegub ǃnâ ge hâǁgoa.

¹⁰Tsî Josuab ge ǃnauǁgoaga khâi tsî ǁaesa ge kō; tsîb ge ge ǃapa, ǁîb tsî Israeli di kaiga ǁaes di ais aiǃâ Ais ǃoa.

¹¹Tsî toroǁaes, ǁîs ǀkha hâs hoas on ge ge ǃapa; o gu ge ǀgū tsî ǃās ǃoa-ai ge sī, tsî gu ge Ais di ǀapasǀî ge ǁgoe; tsî ǃgoaǃnāb ge ǁîb tsî Ais ǁaegu ge hâ i.

¹²Tsîb ge ǁkhāti koroǀoadisi nî ī khoega ū tsî ǁîga ǃgâǃhabi-aose ge ǁgui Bet-Els tsî Ais tsîra ǁaegu, ǃās di huriǂoasǀî.

¹³Tsîn ge ǁaes, ǁgoeǃkhais hoas, ǃās di ǀapasǀî ǁgoesa ge mâi, tsî ǁgoeǃkhais âs ge ǃās di huriǂoasǀî ge hâ i. Tsî Josuab ge ǁnā tsuxub ǁkhāb ǃnâ ǃgoaǃnāb di ǁaegub ǃnâ ge ǃgûǂgâ.

¹⁴Tsî i ge ge ī, Ais di gao-aob ge mûo, on ge ǃhae tsî ǃnauǁgoaga ge khâi, tsî ǃās di khoegu ge ge ǂoa, Israela gu nî ǃoaga ǃkhams ǁga, ǁîb tsî ǁîb di ǁaes hoas, mîmâisa ǁaeb ai, ǂgāb aiǃâ, ǀūb a amaga, khoe-i ǁîba ǃgâǃhabi-aoga ǁguiba hâ ǃkhaisa, ǃās ǃgâb ai.

¹⁵Ob ge Josuab tsî hoaraga Israela ge ǂnauhe ǁîgu di aidi aiǃâ; tsîn ge ǃgaroǃhūb di daobǀî ge ǁhai.

¹⁶ǁNā-amagas ge ǃās ǃnâ hâ hoaraga ǁaesa ge ǂgaiǀhûhe, ǁîgan nî sauruǃgonse, on ge Josuaba sauruǃgon tsî ǃāsa xu ge ǂgaeǂuihe.

¹⁷Tsî ǀgui aob xareb ge ǃgau tama Ais tsî Bet-Els tsîra ǃnâ, hîa ǂoa tamaba Israeli khaoǃgâ; tsîn ge ǃāsa ǁkhowa-amsase ǁnāxū tsî Israela ge sauruǃgon.

¹⁸ǃNubaib ge ǃKhūba Josuab ǃoa ge ǃhoa: Gôab, sa ǃomǁae hâba ǀhōǂui Aisǀî, tita ge ǁîna sa ǃomǁae nîra mā xuige. Tsîb ge Josuaba gôab, ǁîb ǃomǁae hâba ǃāsǀî ge ǀhōǂui.

¹⁹O gu ge ǃgâǃhabi-aoga ǃhaese ǃkhais âga xu khâi tsî, ǃommi âbab ra ǀhōǂui hîa ǃkhoe tsî ǃās tawa sī tsî ge ū si, tsî gu ge ǃhae tsî ǃāsa ǀaes ǀkha ge ǂhubi.

²⁰Tsî Ais di khoegu ge ǂnan tsî kō-o, mû, ob ge ǀanni ǃās diba ǀhommiǀî ra ǃapa, tsî gu ge nē ǀkhāb tamas ka io nau ǀkhāb ai gu nî ǁhâ soa-e ge ūhâ tama hâ i, ǁaes, ǃgaroǃhūb ǃoa ra ǁhâs ge sauruǃgon ra gu ǃoa oa xui-ao.

²¹Tsî Josuab tsî Israeli hoab ge ǃgâǃhabi-aogu ge ǃāsa ū tsî ǃās di ǀanni ra ǃapa ǃkhaisa mûo, on ge oa tsî Ais di khoega ge ǂnau.

²²ǁKhātin ge nauna ǃāsa xu ǁîna ge ǃoa, on ge ǁîna Israelǁîn ǁaegu ge hâ, nēna nē ǀkhāba xu tsî nauna nau ǀkhāba xu; tsîn ge ǁîna ge ǂnau, khoe-i ǁîn ǃnâ ǃgau tama tsî ûi tama ge is kōse.

²³Tsî gao-aob Ais diban ge ûitsamase ǃkhō tsî Josuab tawa ge ūsī bi.

²⁴Tsî i ge ge ī, Israeli ge Ais di ǁansabena ǃgamtoao ǃaub ai, ǃgaroǃhūb, ǁîb ǃoan ge ǁîna sauruǃgon hâ ib ǃnâ, tsî ǁîn hoan ge gôab di ǀāb xa ǁnāo, ǁîn hoan ge hîǀhuruhe hâ is kōse, ob ge Israeli hoaba Ais ǃoa oa tsî ǁîna gôab di ǀāb ǀkha ge ǂnau.

²⁵Tsî ǁnātsē ge ǁnān hoan, aogu tsî taradi tsîn ge disiǀgamǀaǀoadisi ge i, hoatsama Ais di khoen ǀguina.

²⁶Tsî Josuab ge ǁkhāti ǃommi âb, gôab ǀkhab ge ǀhōǂuiba ǂgaedawa tama ge i, Ais di ǁansaben hoanab ge ǀâxares kōse.

²⁷Israelǁîn ge ǀgoan tsî ǁkhâuǁnâxūn nē ǃās din ǀguina ge ǀâbasen, ǃKhūb di mîs, Josuabab ge mîmāsa ǃoa.

²⁸Tsî Josuab ge Aisa ge khauǃkhū, tsîb ge ǁîsa ǀamo ǀuiǁkhopose ge ǂnûi, hîǀhuruse nētsēs kōse.

²⁹Tsî Ais di gao-aobab ge haib ai ge ǂgā ǃuis kōse; tsî sores ra ǂgâ hîab ge Josuaba ge mîmā ǁō hâ soros âb nî haiba xu ūǁnâhe ǃkhaisa; on ge ǁîsa ǃās ǁāb di ams tawa aoǁgui tsî kai ǀuiǁkhoposa ǁîs ai ge ǂnûikhâi, nētsēs kōse hâsa.

³⁰ǃNubaib ge Josuaba ǃKhūb, Israeli di Eloba altarsa ge ǂnubiba Ebalǃhommi ai,

³¹Moseb, ǃKhūb di ǃgāb ge Israeli ôana mîmā xase, ǂhanub di ǂkhanis Moseb dis ǃnâ xoahe hâs ǁkhās khami, altars ǁhauhe tama ǀuidi, ǁîdi ai i ǂnūǀuri-i xare-e gongonhe tama hâ idi xa. ǁÎs ain ge ǃKhūba khauǁguibade gere ǁguiba, ǁkhātin ge ganganǁguibade gere ǁguiba.

³²Tsîb ge ǁnāpa ǁkhāti ǀuidi ai ge xoa xoaǁnâs Moseb di ǂhanub dis, hîab ge xoasa Israeli ôan di ais aiǃâ.

³³Tsî hoaraga Israeli ge ǁîb di kaigu tsî ǃoabasabegu tsî ǁîb di ǂhanuǂhanu-aogu ǀkha ge mâ i ǂgaes di nē ǀkhāb ai tsî nau ǀkhāb ai, Leviǁî pristergu, ǃgaeǀhaos di ǂgaesa ra tanigu aiǃâ, ǃhaokhoen kas, ǃhūb ǃnaesaben kas hoasa, ǀgui ǃkhareb âna Gerisimǃhommi ǃoagu tsî nau ǃkhareb âna Ebalǃhommi ǃoagu, Moseb, ǃKhūb di ǃgāb ge mîmā xase, Israeli ǁaesan nî ǂgurose ǀkhaega.

³⁴Tsî ǁnās khaoǃgâb ge ǂhanub di mîdi hoade gere khomai, ǀkhaeb tsî ǀâxareb tsîkha, ǂhanub di ǂkhanis ǃnâ xoahe hân hoan ǃoa.

³⁵ǀGui mî-i, Moseb ge mîmādi hoadi di-i ge hâ tama hâ i, Josuab xa Israeli di ǀhaohâb hoab tsî taradi tsî ǀgôaron tsî ǃhaokhoen, ǁîn ǁaegu ra ǃgûn tsîna ǃgarise khomaibahe tama ge hâ i-e.