Read Khoekhoegowab Josuab 9 Bible Online

Josuab 9 - Khoekhoegowab bible

Josuab 9

¹Tsî i ge ge ī, gao-aogu, Jordanǃāb nē ǃanib ai ǃhommi tsî ǃgoaǃnāb ǃnâ tsî Kaihurib di ǂnûidomdi hoadi tawa Libanonni ǃoa-ai hâgu ge ǁnâuo, Hetiǁîn, Amorǁîn, Kanaanǁîn, Perisiǁîn, Hiviǁîn tsî Jebusǁîn tsîna,

²o gu ge hoatsama ge ǀhao, Josuab tsî Israeli ǀkha gu ǃkhamga nî ǀguiǂâixase.

³Tsî Gibeons di ǁansaben ge ǁnâuo Josuab ge Jerixos tsî Ais tsîra ǀkha mati dī ǃkhaisa,

⁴on ge ǁkhāti gāxaǃnâsise sîsen tsî sîsabese ge ǁgoasen, tsîn ge ǀoro ǁhōga ge ū ǁîn di eseln ai tsî ǀorotoa tsî ǂomhe hâ ǂauxûiǁhōga,

⁵tsî ǀoro tsî ǃnabahe hâ ǁharona ǂaidi ân tawa tsî ǀoro sarana sorodi ân tawa; tsî pereb, daob ain ūhâb hoab ge karo tsî ge ǀhōpere hâ i.

⁶Tsîn ge Josuab ǃoa ge ǃgû ǁgoeǃkhais ǃnâ Gilgals tawa, tsîn ge ǁîb ǃoa tsî Israels di aogu ǃoa ge mî: Sige ge ǃnū ǃhūba xu go hā, xuige ǃgaeǀhao-e dī-ū ge re.

⁷ǃNubai gu ge Israeli di aoga Hiviǁîn ǃoa ge mî: ǀNîsi du ge sida ǁaegu ǁan hâ, mati da ǁnâi ǃgaeǀhao-e sadu ǀkha nî dī?

⁸O gu ge Josuab ǃoa: Sa ǃgāda ge sida, ti ge mî. ǁGoasib ge Josuaba ǁîga: Tarigo sago, tsî mapa xu go go hā? ti ge dî.

⁹O gu ge ǁîb ǃoa ge mî: Sa ǃgāda ge kaise ǃnū ǃhūba xu go hāda ǃKhūb, sa Elob di ǀons ǃaroma, gommi âb tsî Egipteb ǃnâb ge gere dī xūn hoana da ge ǁnâu amaga;

¹⁰tsî ǁnā ǀgam gao-aokha Amorǁîn dikha, Jordanǃāb nauǃanib ai ge hâ ikha, Sihonni, Hesbons di gao-aob, tsî Ogi, Basanni di gao-aob, Astarots tawa ge ǁan ib tawab gere dī xūn hoana.

¹¹ǁNā-amagan ge sida di kaigu tsî ǃhūb di ǁansaben hoana sige ǃoa ǃhoa tsî ge mî: Daob ǂûna sago ǃomǁae ū î go ǁîna ǃgûǃoa î go ǁîna ǃoa mî: Sadu di ǃgāda ge sida, xuige ǁnâi ǃgaeǀhao-e dī sida ǀkha.

¹²Nē pereb âge ge ge ǀgamsab a hîa daob ǂûse sige omma xu ge ū, ǃgûǂoa ge ge tsēs ai, sadu ǃoa ge nî ǃgûse; xawe mû, nēsib ge karo tsî ǀhōpere hâ.

¹³Tsî nē ǂauxûiǁhōgu, sige ge ǀoaǀoagu ge ge ǀasa i, xawe mû, ǁîgu ge go toa; tsî nē saran âge tsî ǁharodi âge ge go ǀoro kaise gaxus daob dis xa.

¹⁴ǃNubai gu ge aoga daob ǂûn xa ge ū, xawe gu ge ǃKhūb di ǂâisa dî tama i.

¹⁵Tsî Josuab ge ǂkhîba ge dī ǁîgu ǀkha, tsîb ge ǃgaeǀhao-e ǁîgu ǀkha ge dī, ǁînab nî ûi kai ti; tsî ǂamsagu ǀhaohâb digu ge ǁîga gere nūba.

¹⁶Tsî i ge ǃnona tsēdi di ǀunis ai ge ī, ǃgaeǀhaosan ge ǁîgu ǀkha dīs khaoǃgâ, on ge ge ǁnâu, ǁîn di ǀgūkhoen a ǃkhaisa, tsî ǁîn ǁaegun ǁan hâ ǃkhaisa.

¹⁷Israeli ôan ge aiǃâb ǃoa doeo, on ge ǃnonaǁî tsēs ai ǁîn di ǃādi tawa ge sī. Tsî ǁîn di ǃādi ge Gibeons, Kefiras, Beerots tsî Kirjat-Jearims tsîde.

¹⁸Tsî Israeli ôan ge ǁîna ǂnau tama, ǀhaohâb di ǂgaeǂgui-aogu ge ǁîna ǃKhūb, Israeli Elob tawa nūba amaga. ǁNā-amagab ge hoaraga ǀhaohâba ǂgaeǂgui-aogu ai ge ǀara.

¹⁹ǃNubai gu ge ǂamsagu hoaga hoaraga ǀhaohâb ǃoa ge mî: Sige ge ǁîna ǃKhūb, Israeli di Elob tawa ge nūba, o ge ge ǁîna tsâǀkhā ǁoa.

²⁰Nēsa ge ge nî dī, ûib ǃnâ ge ǁîna nî sâusa, ǁaib sige ai hâ tidese ǁnā nūs, ǁîna ge ge nūbas ǃaroma.

²¹ǃAruǀî gu ge ǂgaeǂgui-aoga ǁîn ǃoa ge mî: An ûi în hoaraga ǀhaohâb di ǀaeǁhā-ao tsî ǁgamxuri-ao kai, ǂgaeǂgui-aogu ǁîna ǃoa ge mî xase.

²²Ob ge Josuaba ǁîna ǂgai tsî ǁîn ǃoa ge ǃhoa, mî raǃâ: Tarexa du sida gā tsî go mî: Sida ge ǃnūse sado xu hâ, sida ǁaegu du ǁan hâ hîa?

²³Tsî nēsi du ge ǀâxarexuhe hâse hâ, sadu ǃnân ge toa tide ǁîn hîa ǃgān tsî ǀaeǁhā-aon tsî ǁgamxuri-aona ti Elob di ommi tawa.

²⁴On ge Josuaba ǃeream tsî ge mî: ǂAnǂansase da ge sida, sa ǃgāda, ge ǂanǂanhe, ǃKhūb, sa Elob ge ǃgāb âb Moseba mîmāsa, ǁîb nî sado nē ǃhūb hoaba mā, tsî nē ǃhūb di ǁansabenab nî sadu aiǃâ hîkākā ǃkhaisa, o da ge sadu di aidi aiǃâ ge ǃao sida di ûib ǃaroma; ǁnā-amaga da ge nē ǃkhaisa go dī.

²⁵Tsî nēsi mû, sida ge sa ǃomǁae hâ; dī, sa mûǁae i a ǃgâi tsî ǂhanu khami sida ǀkha.

²⁶Ob ge ǁnāti ǁîna dī tsî ǁîna ge ore Israeli ôan di ǃomma xu, on ge ǁîna ǃgam tama ge i.

²⁷Nētib ge Josuaba ǁîna ǁnā tsēs ǁkhās ai ǀhaohâb di ǀaeǁhā-aose tsî ǁgamxuri-aose ge dī tsî ǃKhūb di altars tsîn di nētsēs kōse, ǁnā ǃkhais, ǁîs nî ūǂuibasens tawa.