Read Khoekhoegowab 2 Tesalonikaǁîn 1 Bible Online

2 Tesalonikaǁîn 1 - Khoekhoegowab bible

2 Tesalonikaǁîn 1

¹Pauluta tsî Silvanub tsî Timoteub tsîge. Tesalonikaǁîn ǀhaohâb, Elob sada ǁGûb tsî ǃKhūb Jesub Xristub ǃnâ hâba ǃoa:

²ǀKhomma ab hâǀkhā du, tsî ǂkhîba Elob sada ǁGûb tsî ǃKhūb Jesub Xristuba xu!

³Sige ge Eloba hugaǀgui sadu ǂama nî gangan, ǃgâsado, anu i a khami; sadu ǂgoms ra kaise ǀom, tsî mâ-i hoa-i di ǀnammi, sadu hoadu ǁaegu du ūhâbagub ra ǃnā xui-ao;

⁴o ge sige Elob di ǀhaohâgu ǃnâ sadu xa ra koasen sadu sâsasib tsî ǂgoms ǃaroma sadu ǃgôaǃgondi tsî ǁgâiǀāgu tsîn, sadu ra tanin hoan ǃnâ.

⁵ǁÎn ge ǂhanu-ai ǀgoraǃgâs Elob dis di ǁgauǂui, sadu nî Elob gaosib, ǁîb ǃaroma du ǁkhāti ra tsūǀkhāba anu-anubahega;

⁶Elob tawa i a ǂhanu amaga, sado ra ǁgâiǀānab nî ǁgâiǀā-e mādawa-amsa;

⁷xawe sadu ǁgâiǀāhe radob nî ǀhâi-e mādawa-amsa sige ǀkha, sada ǃKhūb Jesub ga ǀhomma xu ǂhaiǂhaiseno ǁîb ǀgaib di ǀhomǃgāgu ǀkha,

⁸ǁhabu ra ǀaedi ǀkha, Eloba ǂan tamanab nî ǀkhaose, tsî sada ǃKhūb Jesub Xristub di ǃgâiǂhôasa ǁnâuǀnam taman.

⁹ǁKharab ase ǀamo kāǁōsiba nîra tsâna ǃKhūb di aisa xu tsî ǁîb ǀgaib di ǂkhaisiba xu;

¹⁰hāb kao, ǁîb di ǃanun ǃnâb nî ǂkhaiǂkhaihese, tsî ǂgom hân hoan ǃnâb nî buruburuxa kaise (sige ǀhûǀguitimîs ge sadu ǃnâ ǂgomhe amaga) ǁnā tsēs ai.

¹¹ǁNā-amaga ge ge ǁkhāti mâ ǁaeb hoab ai ra ǀgoreba du, sada Elob nî ǂgaisa anu-anuba du ǃkhaisa, tsîb nî ǃgâiǃgâibasens ǃgâisib dis hoasa ǀoaǀoaba dusa, tsî ǂgoms di sîsenna ǀgaib ǃnâ;

¹²sada ǃKhūb Jesub Xristub di ǀons nî sadu ǃnâ ǂkhaiǂkhaihese, tsî sado ǁîs ǃnâ, sada Elob di ǀkhommi ǃoa tsî ǃKhūb Jesub Xristub dib ǃoa.