Read Khoekhoegowab 2 Tesalonikaǁîn 3 Bible Online

2 Tesalonikaǁîn 3 - Khoekhoegowab bible

2 Tesalonikaǁîn 3

¹ǃAruǀî, ǃgâsado, sige ǀgoreba, îs ǃKhūb mîsa ǃgûba ūhâ, îs ǂkhaiǂkhaihe, sadu tawa i ǁkhāti ī khami;

²î ge sige orehe gonxa tsî ǂkhaba khoena xu; ǂgoms mâ-i hoa-i di xū tama amaga.

³Xawe ǃKhūb a ǂgomǂgomsa, sado ǀgaiǀgai tsî ǂkhababa xu nîra sâuba.

⁴Tsî ge ge ǃKhūb ǃnâ sadu ai mûmâinǃgâ hâ, sige ra mîba du-e du ra dī tsî nîra dī ǃkhaisa.

⁵Îb ǃKhūba sadu ǂgaoga Elob di ǀnammi tsî Xristub di sâsasib ǃoa unu.

⁶Tsî ge ge ra mîmā du, ǃgâsado, sada ǃKhūb Jesub Xristub di ǀons ǃnâ, mâ ǃgâsa-i hoa-i domoǃnâse ra tanisen-i tsî sige xa du ge hō ǂnûiǂgās ǃoa tanisen tama-e xu du nî ǂgaedawasen ti:

⁷Aitsama du ǂan hâ amaga, mati du nî sige ǁgaeǁgae ǃkhaisa; domoǃnâse ge kom sige sadu ǃnâ ge tanisen tama hâ io;

⁸tsî ge kom ǁkhāti khoe-i tawa ǁause ge ǂû tama hâ io, xawe ge ge ǃoab tsî ǀhupuǀhupusens tsîra ǀkha tsēs tsî tsuxub tsîra gere sîsen, sadu ǃnâ ge khoe-i xare-e ǃgomma mā tidega.

⁹ǀGaiba ge ǁîs ǃoa ūhâ tamas xase tama, xawe aiǁgause ge nî sige sado māse, ǁgaeǁgae ge du nîse.

¹⁰Tsî sadu tawa ge ge hâ i ǃnubai ge ge mîmā du, sîsen ǂgao tama khoe-i ǁkhāti ǂû tide ǃkhaisa.

¹¹ǁNâu ge kom rao, ǀnîn âdu domoǃnâse ra tanisen, tsî xū-e sîsen tama, tsî ǁau xūna ra dī ǃkhaisa.

¹²Nēti īna ge ge ra mîmā tsî ǁnama sada ǃKhūb Jesub Xristuba xu, ǃnōsasib ǀkha sîsen tsîn nî ǁîn di pereb ǂûba ǂû ǃkhaisa.

¹³Tsî sado, ǃgâsado, ǃgâidīsa tā ǁgarasa.

¹⁴Tsî khoe-i ga sige mîs, nē ǂkhanis ǃnâ xoahe hâsa ǁnâuǀnam tama io, ǁî-e sao, î du ǁî-i ǀkha tā ǁaeǁaesen, î-i tao;

¹⁵î du ǁî-e tā khākhoese ūhâ, î du ǁî-e ǃgâsa-i ase ǁnama.

¹⁶Tsî ǃKhūb ǂkhîb dib ǂûba ab mâ ǁaeb hoab ai tsî mâ dommi hoab ai ǂkhîba mā du. Ab ǃKhūba sadu hoadu ǀkha hâ!

¹⁷Tawedes tita Pauluta ǃommi ǀkha. Nēs ge saosa sîǂkhanidi hoadi ǃnâ; nēti ta ra xoa.

¹⁸ǀKhommi sada ǃKhūb Jesub Xristub diba ab sadu hoadu ǀkha hâ! Amen.