Read Khoekhoegowab 1 Timoteub 1 Bible Online

1 Timoteub 1 - Khoekhoegowab bible

1 Timoteub 1

¹Pauluta Xristub Jesub di apostelta, Elob sada ǃGâiǃōdī-aob di mîmās, tsî Xristub Jesub sada ǃâubasenni dis ǃoa.

²Timoteub, ǂgoms ǃnâ ti ǂhauǃnâ ǀgôab ǃoa: ǀKhommi, ǀkhomxaǂgaosib tsî ǂkhîba ab hâǀkhā tsi Elob sada ǁGûb tsî ǃKhūb, Xristub Jesuba xu!

³ǁNama tsi ta ge khami, Efesus tawats nî hâsa, Masedoniab ǃoa ta ge ǃgû ǃnubai, ǁkhās khami ta nēsi ra ǁnama tsi, ǀnînats nî mîmā ǃkhaisa, ǀkharasen ǁkhāǁkhā tide ǃkhaisa,

⁴tsîn ǁkhāti ǁau ǃhoan tsî ǀam-e ūhâ tama ǃhaoǃgôakhâin ǃnâ sī tide ǃkhaisa, elosi ǂnubikhâis, ǂgoms ǃnâ hâs di amǃnâs ǃnâ ǂnoagu-aidi ǀguide ra ūǀkhīna.

⁵Xawe mîmās di ǃkhōǀhaos ge ǀnamsa ǃanu ǂgaoba xu, tsî ǃgâi ǂâisa xu, tsî ǃūmû ǂgomsa xu;

⁶ǁîna xun ge ǀnîna ǂgō, tsî ǁau ǃhoan ǃnâ ge ǁnā;

⁷ǁîn ǂhanub ǁkhāǁkhā-aose ī ǂgao hân tsî a ǀūn tare-en ra mî tsî ǁkhāǁkhā ǃkhaisa.

⁸Xawe ge ge a ǂan, ǂhanub a ǃgâi ǃkhaisa, khoe-i ga ǁîba ǂhanuse sîsenūo,

⁹tsî i ga ǂan, ǂhanu-ai-i ǂhanu-i xare-e māhe tama ǃkhaisa, xawe ǂhanuoǃnân tsî ǂnîxaǃnân, eloxoresan tsî ǁore-aon, ǃanuoǃnân tsî gagaoǃnân, ǁgûba ra ǃgamn tsî ǁgûsa ra ǃgamn, ǂnauǃanaon,

¹⁰ǀai-aon, aoregu ǀkha ra ǁgoen, khoena ra ǃnarin, ǂhumi-aon, ǂkhabase ra nūn, tsî ǀnî xū-i ga hâo, ǂuru ǁkhāǁkhās ǃoagu hâ-e,

¹¹ǂkhaitsi ǃgâiǂhôas ǃgâiǃō hâ Elob dis, tita, ǂgomǃgâbahe hâsa ǃoa.

¹²Tsî ta ra gangan ǁîb tita ge ǀgaiǀgaib Xristub Jesub sada ǃKhūba, ǂgomǂgomsaseb ge tita ǃgôa, tsî ǃoabas ǃnâ ǂnûiǂgā te ǃkhaisa;

¹³tita aibe ǃkhāǃkhā-ao tsî ǃgôaǃgonao tsî ǁgâiǀā-ao ge i ta; xawe ta ge ǀkhomxaǂgaosi-e ge hō, ǀūǂamse ta ǁîna ti ǂgomoǃnâsib ǃnâ gere dī amaga.

¹⁴Tsî sada ǃKhūb di ǀkhommi ge ǂgoms tsî ǀnammi tsîra Xristub Jesub ǃnâ hâra ǀkha kaise ǃnāsa ge i.

¹⁵ǂGomǂgomsa mîs ge nēsa, tsîs ge a ǃkhōǃoasa anu, Xristub Jesub ge ǃhūbaib ǃoa a hā ǃkhaisa, ǁore-aonab nî ǃgâiǃō kaise, ǁîn ǃnâ ta tita a ǂguro;

¹⁶xawe ǁnās ǃoa ta ge ǀkhomxaǂgaosi-e ge hō, tita ǂgurota ǃnâb nî Jesub Xristuba ǃnūǃnâxasib âb hoaba ǁgauga, ǃgoaxa ǁaeb ai ǁîb ǃnâ nî ǀamo ûib ǃoa ǂgomn di aiǁgause.

¹⁷Tsî ǀamosigu di gao-aob, ǁgaoǁoasab, mûheǁoasab, ǀguri gā-ai Eloba ab ǃgôab tsî ǂkhaisib tsîkha ūhâ ǀamosib hoab kōse! Amen.

¹⁸Nē mîmāsa ta ra mā tsi, ti ôa Timoteutse, sats ǂama ge aibe hā kēbosidi ǃoats nî ǁîn ǃnâ ǃgâi ǃkhamma ǃkhamsa;

¹⁹î ǂgoms tsî ǃgâi ǂâisa ūhâ, ǁîsa gu ge ǀnîga ǂhāxu, tsî ǂgomsa ge kā kai;

²⁰ǁîn ǃnâ kha Himeneub tsî Aleksanderi tsîkha hâ, Satanna ta ge māǁnâkha, ǃkhāǃkhā kha tidesa kha nî ǁkhāǁkhāsenga.