Read Khoekhoegowab 1 Timoteub 2 Bible Online

1 Timoteub 2 - Khoekhoegowab bible

1 Timoteub 2

¹Tsî ta ra ǁnama, hoan ǂamai khoen hoan nî dībahesa ǀkhomadi, tsî ǀgoredi, tsî ǀgorebadi tsî gangandi tsîna;

²gao-aogu tsî ǀgapise mâgu hoagu ǃaroma, sâsa tsî ǃnōsa ûiba da nî ûise, eloǃaoǃgâsib tsî ǂhauǃnâsib hoab ǃnâ.

³ǁÎs a ǃgâi xui-ao, tsîs ge Elob sada ǃGâiǃōdī-aob aiǃâ a ǃgâiǃgâisa,

⁴ǁîb ǂgao hâba, khoen hoan nî ǃgâiǃō, tsîn nî amab di ǂans tawa sīsa.

⁵ǀGui Elob ǀguib hâ xui-ao; tsî ǁkhāti ǀgui mâba-aob ǀguiba Elob tsî khoen tsîn ǁaegu, ǁnāb ge khoeb Xristub Jesub,

⁶ǁî-aitsama hoan ǃaroma xoremarib ase ge māsenna, ǁîb ǁaegu di mîdans ǃoa.

⁷ǁÎb ǃoa ta tita aoǁnâ-aose tsî apostelse mâihe hâ, (amaba ta ra mî Xristub ǃnâ, tsî ta ǂhumi tama) ǀūben di ǁkhāǁkhā-aose ǂgoms tsî amab tsîra ǃnâ.

⁸O ta ra ǂgao, aogu nî ǃkhaidi hoadi tawa ǀgoresa, ǃanu ǃomga ra ūkhâise, ǁaib tsî îganǀgēb tsîkha ose.

⁹ǁNās ǁkhās xase di ge tarade anu hâ sara-i ǃnâ taob tsî îǂhôasib tsîkha ǀkha nî ani; ǀûna ǂgapus ǃnâ tama, tsî ǁkhāti ǃhuniǀurib ǃnâs kas, karan ǁgās ǃnâs kas, ǃgomǀgausa saran ǃnâs kasa tama;

¹⁰î di (eloǃaoǃgâsiba ra ǂhôa tarade a anu khami,) ǃgâi dīgu ǀkha anisen.

¹¹Tarasa as ǃnōsasib ǃnâ ǁkhāǁkhākaisen, ǃnaga hâsib hoab ǀkha;

¹²xawe ta tara-e ǁkhāǁkhāsa mā-am tama, tsî ǁkhāti aob ǂama gaosa; as ǃnōsase tanisen.

¹³Adammi ge ǂguro kuruhe xuige, tsî ǁnās khaoǃgâ Evasa;

¹⁴tsî Adammi ge ǂgaeǂhapuhe tama; xawe taras ge ǂgaeǂhapuhe, tsî ǃûǂams ǃnâ ge ǁnā;

¹⁵xawes ge nîra ǃgâiǃō ǀgôaǁoras ǃnâ, ǂgoms ǃnâs ga hâo, tsî ǀnammi ǃnâ, tsî ǃanuǃanusis ǃnâ îǂhôasib ǀkha.