Read Khoekhoegowab 1 Timoteub 3 Bible Online

1 Timoteub 3 - Khoekhoegowab bible

1 Timoteub 3

¹ǂGomǂgomsa mîs ge nēsa: Khoe-i ga mûǂamsis ǃoabasa hō ǂgao-o, ǁnā-i ge ǃgâi sîsenna ra tura.

²Tsîb ge mûǂamaoba nî ūo, ǀgui taras di ao, tsîb nî ǂkhaisa, ǃnomsa, îǂhôa, ǃhaokhoena ǃkhōǃoaxa, ǁkhāǁkhās di ǁkhāsiba nî ūhâ;

³ā-ao tide, tsî ǃkhamao tama, tsî taotaosa hōbasen-i ǃgôaǃgonao tama xaweb nî khoexaǃnâ, tsî ǂkhîxaǃnâ, tsî tā nî mariǃgunuxa;

⁴ommi âba ǃgâise ra ǂgaeǂguib, ǀgôan âba ǁaposasib hoab ǃnaga ra ūhâba;

⁵(khoe-i ga ǁî-i ommi ǂûba ǂgaeǂguisa ǀūo, mati i kha nî Elob ǀhaohâba ǂhansenba?)

⁶ǀAse ǃhobasen hâba tama, îb tā khūkhūsen, îb tā ǁgâuab di ǀgoraǃgâs ǃnâ ǁnā;

⁷tsîb ge ǁkhāti ǃgâi gom-e ǃauga hân tawa nî ūhâ; îb tā ǃharaxūhes tsî ǁgâuab di ǁnoab ǃnâ ǁnā.

⁸ǁNās ǁkhās xase a gu diakenga ǃgôa-anusa; î gu tā ǀgamnamxa, î gu tā kaise ǂauxûi-i ǃnâ māsen, î gu tā taotaosa hōbasen-e ôa;

⁹î gu ǂgoms di ǂganǃgâsiba ǃanu ǂâis ǃnâ ūhâbasen.

¹⁰Î gu aibe ǃâitsâhe, tsî ūose gu ga hōheo, a gu ǁnās khaoǃgâ ǃoaba, ūose gu ga io.

¹¹ǁNās ǁkhās xase a di tarade ǃgôa-anusa, î di tā ǃkhāǃkhā-ao, î di ǀkhaiǃnâ, î di ǂgomǂgomsa xūn hoan ǃnâ.

¹²A gu diakenga ǀgui taras di ao, î gu ǀgôana ǃgâise gaoba tsî ǁîgu omdi ǂûdi tsîna.

¹³ǃGâise kara ǃoaban ge ǃgâi amǃnâsa ra ǃoaǂuibasen, tsî kai ǁkhoaǂgaosib ǂgoms Xristub Jesub ǃnâ hâs di xui-ao.

¹⁴Nēna ta ra xoaba tsi, ǃhaese ta nî sats tawa sī, ti ta ra ǃâubasen xawe;

¹⁵tsî ǀhawe ta ga xawets nî ǂanga, matits nî Elob ommi ǃnâ tanisensa, ǁîb ge ûitsama Elob di ǀhaohâb, amab di ǂkhâǃnâb tsî ǃgaoǃgaoba.

¹⁶Tsî ǂhaisaseb ge a kai, eloǃgâiǃōsib di ǂganǃgâsiba: Elob ge ǁgans ǃnâ ǂhaiǂhaihe hâ, tsîb ge Gagab ǃnâ ǂhanu-ai kaihe hâ, tsîb ge ǀhomǃgāgu xa mûhe hâ, tsîb ge ǀūben ǃnâ aoǁnâhe hâ, tsîb ge ǃhūbaib xa ǂgomhe hâ, tsîb ge ǂkhaisib ǃnâ ūǃapahe hâ.