Read Khoekhoegowab 1 Timoteub 5 Bible Online

1 Timoteub 5 - Khoekhoegowab bible

1 Timoteub 5

¹Kaira aoba tā ǁkhōse ǂgōǀau, î ǁgûse ǁnama bi; ǂkhamga ǃgâsase ǁnama.

²Kaira tarade ǁgûse; ǂkhamde ǃgâsase îǂhôasib hoab ǀkha.

³ǃGôa ǁnā ǃoataradi, ǂhauǃnâ ǃoatarase ide.

⁴Tsî ǃoatara-i ga ǀgôan tsî ǀgôan di ôana ūhâo, an aibe ǁîn di ommi ǂûba ǃaoǃgâxase ǃoabasa ǁkhāpesen, în kaikhoena mādawa-amsa dī; ǁîs a Elob aiǃâ ǃgâi tsî ǃkhōǃoasa xuige.

⁵Ama-ai ǃoatara-i tsî ǀguri ǁnāxūhe hâ-i ge Elob ai ǂgomǃgâ hâ, tsîs ge tsuxub tsî tsēs tsîra ǀgores tsî ǀkhomas tsîra ǃnâ ra hâhâ;

⁶xawe turagu ǃnâ ra ûi ǃoatara-i ge ûitsamase ǁō hâ-e.

⁷Nēna mîmā, î di ūose i.

⁸Tsî khoe-i ga ǁî-i din tsî ǀō-ai ǁî-i ommi dina sâu tama io, ǁnā-i ge ǂgomsa ge ǀūxū, tsî i ge ǂgomoǃnâ-i ǃgâ-ai a tsū.

⁹ǃOatarasa as ǃkhōǂuihe, ǃnanidisi kurigu ǃnaga hâ tamas, ǀgui aob di tara ge is,

¹⁰ǃgâi sîsengu di gom-e ūhâs, ǀgôana ge kaikais, ǃgûkhoena ge ǃkhōǂhomis, ǃanun di ǂaide gere ǁās, ǁgâiǀāb ǃnâ hâna gere huis, tsî mâ ǃgâi sîsenni hoaba gere ǁgūbasa.

¹¹Xawe ǂkham ǃoatarade ǂkhā; Xristub ǃoagu di ga ǁgans turaba hō-o, o di ra ǃgame ǂgao xuige;

¹²tsî di ge ǀgoraǃgâs âde ūhâ, ǂguro ǂgomsa di ge ǁauxūdī xui-ao;

¹³tsî ǁkhā ǁaeb ai di ge ǁause omdi ǃnâ ǃgûmasa ra ǁkhāǁkhāsen, tsî ǁause di hâs ǀguisa hî tama, xawe di ge a ǂhôaxa, tsî ǁau xūna ra dī, tsî anu tama hâ xūna ra ǃhoa.

¹⁴O ta ra ǂgao, a di ǂkham ǃoatarade ǃgame, î di ǀgôana ǁora, î di ǁîdi omde ǂgaeǂgui, î di khākhoeba ǃkhāǃkhāb nî ǃkhaisa tā mā-am.

¹⁵ǀNai di ge ǀnîde Satanni ǃoa ge oa.

¹⁶Tsî ǂgom hâb kas ǂgom hâs kas ga ǃoatarade ūhâo, a-i ǁîde ǂâu hâse hui, ǀhaohâb ǃgomǃgomhe tidega, îb naudi ǂhauǃnâ ǃoatarade ǂâu hâse hui ǁkhā.

¹⁷ǃGâise ra gao ǂnomdomga a gu ǃhonarisase ǃgôab ǃnâ ūhâhe, ǀō-ai mîs tsî ǁkhāǁkhās tsîra ǃnâ ra ǃoaba gu.

¹⁸Xoas ra mî xui-ao: “Dāǃnâ ra goma-ets ge amsa ǃgae-amǃgâ tide,” tsî: “Sîsenao-i ge ǁî-i amǃnâsa anu hâ.”

¹⁹ǂNomdomgu ǃoagu ǀanaǃgâ-e tā ǃkhōǃoa, ǀgam, ǃnona ǀhûǀguitimî-aon di ams ǃnâs ga ī tama io.

²⁰ǁOre rana hoan aiǃâ ǂgōǀau, în naun ona ǃao.

²¹Elob tsî Xristub Jesub tsî ǃkhōǂuibasensa ǀhomǃgāgu aiǃâ ta kaise ra ǀkhoma tsi, nēnats nî aiǀgoras ose ǃkhōǀgaipe ǃkhaisa, tsî ǂōsenǀîsa xuts xū-e dī tide ǃkhaisa.

²²Tā ǃhaese khoe-e ǃomkha ǁgui-ai, î tā ǀkhara ǁoren tawa amǃnâxa. Îǂhôase ūhâsen re.

²³ǃAruǀî tā ǁgam-i ǀgui-e ā, î ǂauxûiro-e ā re sa ǃnāb tsî ǃnurise ra hāǂam tsi ǀae ǂkhabusasin ǃaroma.

²⁴ǀNî khoen di ǁoren ge aiǃâ ǂhai hâ, tsî ǀgoraǃgâs âna ra aiǃgûba, tsî ǀnîn din ge ǁkhāti ra saoǃgon;

²⁵ǁnās ǁkhās xasen ge ǀnî ǃgâidīna aiǃâ ǂhai hâ, tsî naun ge ǁkhāti ǂganǃgâsase a hâ ǁoa.