Read Khoekhoegowab 1 Timoteub 6 Bible Online

1 Timoteub 6 - Khoekhoegowab bible

1 Timoteub 6

¹ǃNaob ǃnâ hâ ǃgān ge ǁîn di ǀhonkhoena ǃgôasib hoab ǃnâ nî ūhâ, î ra Elob ǀons tsî ǁkhāǁkhās tsîra tā ǃkhāǃkhāhe.

²Tsî ǂgomsa ǀhonkhoena ūhân ge ǁîna, ǃgâsan ao, ǃharaxū tide, tsîn nî ǁîna ǁnās ǃgâ-ai ǃoaba, ǂgomsa tsîn a ǀnamsa, tsî ǁkhā ǃgâidīs ǃnân ra amǃnâxa amaga. Nēna ǁkhāǁkhā, î ǁnama,

³Khoe-i ga ǀkharase ǁkhāǁkhā, tsî i ga ǂuru mîdi sada ǃKhūb Jesub Xristub didi tsî ǃgâiǃōsib di ǁkhāǁkhās tawa hâ tama io,

⁴ǁnā-i ge ra khūkhūsen tsî xū-e ǂan tama hâ; tsî i ge ra ǀaesen ǂnoagudîdi tsî khomgudi ǃaroma, ǁîde xun surib tsî ǂnoagus tsî ǃkhāǃkhādi tsî ǂkhaba ǂâiǂâisendi tsîna ra ǀkhīde,

⁵ǂkhaba ǃkhamgudi, ǁgao hâ ǁnâuǃāba ūhâ tsî amaba ūǀhanahe hâ khoen dide, eloǃgâiǃōsib a ǃoaǂuibasen, ti ra ǂâina. Nēti īna ǂgōxū.

⁶Tsî eloǃgâiǃōsib ge a kai ǃoaǂuibasen, ǂâuts kao.

⁷Xū-i xare-e da ǃhūbaib ai ūhâ tama amaga i a ǂhaisa, xū-e da ǁkhāti ūǂoa ǁoasa;

⁸xawe ǂûn tsî saran tsîna da ga ūhâo, a da ǁîn ǀkha ǂâu.

⁹ǃKhū ǂgao ran ge ǃâitsâb tsî ǁnoagu ǃnâ ra ǁnā tsî ǂgui gâre tsî ǂkhôasa tura-aigu ǃnâ, khoena ǁgaoǁgaosib tsî kāǁōsib ǃnâ ra ǂgâ kaiga;

¹⁰xūǃgunuxasib a ǂkhaban hoan di ǃnoma xui-ao; ǁîban ge ǀnîna tura, tsî ǂgomsa xu ge ǃkhoeǂnâ, tsî ǂgui tsûn ǀkha ge ǃkhāǃganusen.

¹¹Xawe sats Elob khoetsa nēna ǁhâxū, î sauruǃgon ǂhanu-aisib, eloǃaoǃgâxasib, ǂgoms, ǀnammi, taniǀnamxasib tsî tsauraǃnâsib tsîna.

¹²ǂGoms di ǃgâi ǃkhamguba ǃkham, î ǀamo ûiba ǃkhōǀgaipe, ǁîb ǃoats ǂgaihe hâb, tsî ǁîb ǃaromats ǃgâi ǁguiǁnâsa ge ǁguiǁnâba ǂgui ǀhûǀguitimî-aon aiǃâ.

¹³Mîmā tsi ta ra Elob, hoana ra ûi-ûib aiǃâ, tsî Xristub Jesub, Pontiub Pilatub tawa ǃgâi ǁguiǁnâsa ge ǁguiǁnâb aiǃâ,

¹⁴nē mîmāsats nî ǂnao-ose tsî ūose ǃkhōǀgaipe ǃkhaisa, sada ǃKhūb Jesub Xristub di ǂhaiǂhaisens kōse;

¹⁵ǁîs, ǁîb di ǁaeb aib nîra ǁgausa ǃgâiǃō hâ tsî ǀguri ǀgaiba ūhâ ǃKhūb, gao-aogu di Gao-aob, tsî ǃkhūgu di ǃKhūb,

¹⁶ǀguri ǁōǁoasiba ūhâb, tsî khoe-i xare-i a sī ǁoa ǃnâb ǃnâ ǁan hâb, khoe-i xare-i mû tamab tsî ǁkhāti mû ǁoaba; ǁîba ab ǃgôasib tsî ǀamo ǁkhāsiba ūhâ! Amen.

¹⁷Nē ǃhūbaib di ǃkhū hâna mîmā, în tā ǃguri, în ǁkhāti tā mâǁapo tama ǃkhūsib ai ǂgomaiǂnûi, în ûitsama Elob, ǃkhū hâse hoana ǂûs ǃoa ra mā dab ai ǂgomaiǂnûi;

¹⁸în ǃgâidī, în ǃgâidīgu ǃnâ ǃkhū, în māǂgaoxa, în amǃnâxa kai ǂgao;

¹⁹în ǁui-e ǁguibēbasen ǃgâi ǃgaoǃgao-i ǃgoaxa xūn di-e, ǀamo ûiban nî hōga.

²⁰O Timoteutse, ǂgomǃgâbahets hâ-e sâubasen, î ǂgōxū gagaoǃnâ tsî ǁau ǃhoan tsî ǂkhabase gā-aisise ra ǂgaihe ǂans di ǂnoagudi tsîna.

²¹ǁÎnan ge ǀnîna ǂan, tsî ǂgomsa xu ǂgōna. Ab ǀkhomma hâǀkhā tsi! Amen.